କଟକ,୦୭/୦୧: ସଡ଼କ ଦୁର୍ଘଟଣା ହ୍ରାସ ପାଇଁ ପ୍ରତି ବର୍ଷ ସଚେତନତା ସପ୍ତାହ ପାଳନ କରାଯାଉଛି । ଏବେ ସପ୍ତାହ ପରିବର୍ତ୍ତେ ମାସ ପାଳନ କରାଗଲାଣି । ଏଥିପାଇଁ ଲକ୍ଷ ଲକ୍ଷ ଟଙ୍କା ଉଡ଼ାଇ ଦିଆଯାଉଛି । କିନ୍ତୁ ଦୁର୍ଘଟଣା କମିବା ପରିବର୍ତ୍ତେ ବଢ଼ିବାରେ ଲାଗିଛି । ଏହା ସହ ତାଳ ଦେଇ ବଢୁଛି ମୃତାହତଙ୍କ ସଂଖ୍ୟା । ତେଣୁ ସଡ଼କ ସୁରକ୍ଷା ସଚେତନତା ଏକରକମ ପ୍ରହସନରେ ପରିଣତ ହୋଇଛି । ସଚେତନତା ନାଁରେ ଯେଉଁ ଟଙ୍କା ଖର୍ଚ୍ଚ କରାଯାଉଛି ତାହା ପ୍ରକୃତ କାହା ପକେଟ୍କୁ ଯାଉଛି ତାହା ପ୍ରଶ୍ନବାଚୀ ସୃଷ୍ଟି କରିଛି ।
ସୂଚନା ଅନୁସାରେ, ୨୦୨୨ ଜାନୁଆରୀରରୁ ଡିସେମ୍ବର ମଧ୍ୟରେ ରାଜ୍ୟରେ ୧୧ ହଜାର ୬୬୩ଟି ଦୁର୍ଘଟଣା ସଂକ୍ରାନ୍ତ ମାମଲା ରୁଜୁ ହୋଇଥିଲା । ଏହି ଦୁର୍ଘଟଣାରେ ୫ ହଜାର ୪୬୭ ଜଣଙ୍କ ଜୀବନ ଯାଇଥିବା ବେଳେ ୧୦ ହଜାର ୩୦୨ ଜଣ ଗୁରୁତର ଆହତ ହୋଇଥିଲେ । ସେହିପରି ୨୦୨୩ ଜାନୁଆରୀ ଡିସେମ୍ବର ମଧ୍ୟରେ ଦୁର୍ଘଟଣା ସଂଖ୍ୟା ୧୨ ହଜାର ୫୨କୁ ବୃଦ୍ଧି ପାଇଥିଲା । ଏଥିରେ ୫ ହଜାର ୬୯୬ ଜଣଙ୍କ ମୃତ୍ୟୁ ହୋଇଥିବାବେଳେ ୧୦ ହଜାର ୪୧୯ ଜଣ ଗୁରୁତର ଆହତ ହୋଇଥିଲେ । ୨୦୨୨ ତୁଳନାରେ ୨୦୨୩କୁ ଦୁର୍ଘଟଣାରେ ମୃତକଙ୍କ ହାର୍ ୪.୨% ବୃଦ୍ଧି ପାଇଛି । ଆହତଙ୍କ ସଂଖ୍ୟାରେ ୩.୩% ବୃଦ୍ଧି ଘଟିଛି । ଆଗାମୀ ଦିନରେ ୨୦୨୪ର ସଡ଼କ ରିପୋର୍ଟ ଆସିବ ।
୨୦୨୪ରେ ଅନେକ ବଡ଼ ଦୁର୍ଘଟଣା ଘଟିଥିବାରୁ ୨୦୨୩ ତୁଳନାରେ ଉଭୟ ମୃତକ ଓ ଆହତଙ୍କ ସଂଖ୍ୟା ଅଧିକ ରହିବ ବୋଲି ଆଶଙ୍କା କରାଯାଉଛି । ସଡ଼କ ଦୁର୍ଘଟଣା ବୃଦ୍ଧି ପାଉଥିବାରୁ ସଚେତନତା ନାଁରେ ଯାହାସବୁ ପଦକ୍ଷେପ ନିଆଯାଉଛି ସେସବୁର କୌଣସି ଅର୍ଥ ରଖୁନାହିଁ । ଅନ୍ୟପକ୍ଷରେ ସଚେତନତା ପାଇଁ ବିଭିନ୍ନ ଆଞ୍ଚଳିକ ପରିବହନ କାର୍ଯ୍ୟାଳୟ (ଆର୍ଟିଓ)କୁ ରାଜ୍ୟ ସରକାର ୪ରୁ ୬ଲକ୍ଷ ଟଙ୍କା ପର୍ଯ୍ୟନ୍ତ ପ୍ରଦାନ କରିଥାନ୍ତି । ଯେଉଁ ଆରଟିଓ ଅଧୀନରେ ଅପେକ୍ଷାକୃତ କମ୍ ଗାଡ଼ି ପଞ୍ଜୀକରଣ ହେଉଛି ସେହିସବୁ କାର୍ଯ୍ୟାଳୟକୁ ୪ଲକ୍ଷ ଏବଂ ବଡ଼ବଡ଼ ଆରଟିଓଙ୍କୁ ୬ଲକ୍ଷ ଟଙ୍କା ଦିଆଯାଇଛି । ଏହି ଅର୍ଥରେ ଆରଟିଓଙ୍କ ପକ୍ଷରୁ ବିଭିନ୍ନ ଅଞ୍ଚଳରେ ସଚେତନତା ରଥ ପରିକ୍ରମା କରାଯାଉଛି । ସେହିପରି ସ୍କୁଲ୍ ପିଲାଙ୍କ ମଧ୍ୟରେ ଚିତ୍ରାଙ୍କନ ପ୍ରତିଯୋଗିତା, ବିଭିନ୍ନ ସ୍ଥାନରେ ହୋର୍ଡିଂ, ଡ୍ରାଇଭରମାନଙ୍କ ଆଖି ପରୀକ୍ଷା ଆଦି କରାଯାଉଛି । କିନ୍ତୁ ଏହାର ସୁଫଳ କାହିଁକି ମିଳୁନାହିଁ ତାହାର ଉତ୍ତର କାହା ପାଖରେ ନାହିଁ ।
ଦୁଇ ବର୍ଷ ତଳେ ସଚେତନତା ପାଇଁ ପ୍ରତ୍ୟେକ ଆର୍ଟିଓଙ୍କୁ ଗୋଟେ ଲେଖାଏଁ ଏଲ୍ଇଡି ଗାଡ଼ି ଦିଆଯାଇଥିଲା । ଏହି ଏଲ୍ଇଡି ଗାଡ଼ି ରାଜ୍ୟ ବାହାରୁ ଅଣାଯାଇଥିଲା । ପ୍ରତି ଗାଡ଼ି ୨ଲକ୍ଷରୁ ଅଧିକ ଟଙ୍କା ବ୍ୟୟ କରାଯାଇଥିଲା । କିନ୍ତୁ ରାଜ୍ୟରେ ଏହିଭଳି ଗାଡ଼ି ୧ ଲକ୍ଷ ଟଙ୍କା ଭିତରେ ମଧ୍ୟ କରାଯାଇ ପାରିଥାନ୍ତା ବୋଲି କୁହାଯାଉଛି । ତେଣୁ ବାହାରୁ ଗାଡ଼ି ଆଣିବା ଆଳରେ ଲକ୍ଷାଧିକ ଟଙ୍କା ହରିଲୁଟ୍ କରାଯାଇଥିବା ଅଭିଯୋଗ ହେଉଛି ।
ଏ ସଂକ୍ରାନ୍ତରେ ପରିବହନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ଯଦିଓ ସଚେତନତା ପାଇଁ ପ୍ରତିବର୍ଷ ବିପୁଳ ଅର୍ଥ ଖର୍ଚ୍ଚ ହେଉଛି କିନ୍ତୁ ଏହାର ପ୍ରଭାବ ଲୋକଙ୍କ ଉପରେ ପଡ଼ିପାରୁ ନାହିଁ । ଫଳରେ ଦୁର୍ଘଟଣା ବୃଦ୍ଧି ପାଇବାରେ ଲାଗିଛି । ଯେ ପର୍ଯ୍ୟନ୍ତ ଲୋକେ ନିଜ ସ୍ତରରେ ସଚେତନ ହେବେନି, ସେ ପର୍ଯ୍ୟନ୍ତ ଦୁର୍ଘଟଣା ହ୍ରାସ ହେବ ନାହିଁ ବୋଲି ସେ କ୍ଷୋଭର ସହ ପ୍ରକାଶ କରିଛନ୍ତି ।
