ୱାଶିଂଟନ,୨୫/୦୨: ଆମେରିକାର ନ୍ୟୁୟର୍କ ସହରରେ ଥିବା ପାକିସ୍ତାନୀ ସରକାରଙ୍କ ଅଧିକୃତ ରୁଜ୍ଭେଲ୍ଟ ହୋଟେଲକୁ ବନ୍ଦ କରିଦେବା ପାଇଁ ଶେଷରେ ନିଷ୍ପତ୍ତି ହୋଇଛି । ଏଥିଲାଗି ପାକ୍ ସହ ହୋଇଥିବା ୨୨୦ ନିୟୁତ ଡଲାରର ଏକ ଚୁକ୍ତିରେ ନାଲିଗାର ଟଣାଯାଇଛି । ହୋଟେଲରୁ ପାକିସ୍ତାନର ଶାହବାଜ ସରକାର ବିପୁଳ ଲାଭ ପାଉଥିବା ନେଇ ଅଭିଯୋଗ ହୋଇଆସୁଥିଲା ।
ନ୍ୟୁୟର୍କସ୍ଥିତ ରୁଜ୍ଭେଲ୍ଟ ହୋଟେଲରେ ଶରଣାର୍ଥୀମାନେ ରହୁଥିଲେ । ଏଥିପାଇଁ ବର୍ଷକୁ ୨୨୦ ନିୟୁତ ଡଲାର ଖର୍ଚ୍ଚ ହେଉଥିଲା । ଆମେରିକୀୟ କରଦାତାଙ୍କଠାରୁ ଏହାକୁ ଅସୁଲ କରାଯାଉଥିଲା । ହୋଟେଲକୁ ବନ୍ଦ କରାଯିବା ନିଷ୍ପତ୍ତି ପଛରେ ଟ୍ରମ୍ପ୍ଙ୍କ ସମର୍ଥକ ‘ମାଗା (ମେକ୍ ଆମେରିକା ଗ୍ରେଟ୍ ଏଗେନ୍)’ ଗ୍ରୁପ୍ ଓ ସଂଘୀୟ ସରକାରଙ୍କ ହାତ ଥିବା କୁହାଯାଉଛି ।
ଡେମୋକ୍ରାଟ୍ ମେୟର ଏରିକ୍ ଆଡାମ୍ସ ରୁଜ୍ଭେଲ୍ଟ ହୋଟେଲ ବନ୍ଦ ହେବା ନେଇ ଘୋଷଣା କରିଛନ୍ତି । ଜୋ ବାଇଡେନ୍ଙ୍କ ସରକାର ବେଳେ ଏରିକ୍ଙ୍କ ବିରୋଧରେ ଦୁର୍ନୀତି ଅଭିଯୋଗ ଆସିଥିଲା । ଏହାପରେ ସେ ଟ୍ରମ୍ପ୍ଙ୍କ ସମର୍ଥକଙ୍କ ମଧ୍ୟରେ ସାମିଲ ହୋଇଥିଲେ । ରୁଜ୍ଭେଲ୍ଟ ହୋଟେଲରେ ୧,୦୨୫ ରୁମ୍ ରହିଛି । ଏଠାରେ ପ୍ରବାସୀଙ୍କ ପାଇଁ ରହଣି ବ୍ୟବସ୍ଥା ହୋଇଛି । ଗୋଟିଏ ରାତି ପାଇଁ ଜଣ ପିଛା ୨୦୦ ଡଲାର ଖର୍ଚ୍ଚ କରିବାକୁ ପଡ଼ିଥାଏ ।
୨୦୨୩ ମେ ମାସରେ ଆରମ୍ଭ ହୋଇଥିବା ଏହି ଆଶ୍ରୟସ୍ଥଳପାଇଁ ନ୍ୟୁୟର୍କ ପ୍ରଶାସନ ପାକିସ୍ତାନ ଇଣ୍ଟରନ୍ୟାସନାଲ ଏୟରଲାଇନ୍ସ ସହ ୩ ବର୍ଷ ପାଇଁ ୨୨୦ ନିୟୁତ ଡଲାରର ଚୁକ୍ତି କରିଥିଲା । ୨୦୨୩ରେ ଯେତେବେଳେ ପ୍ରତି ସପ୍ତାହରେ ପ୍ରାୟ ୪ ହଜାର ପ୍ରବାସୀ ନ୍ୟୁୟର୍କରେ ପହଞ୍ଚୁଥିଲେ, ସେତେବେଳେ ଏହି ହୋଟେଲ ବାହାରେ ଶିବିର ଲଗାଉଥିବା ପ୍ରବାସୀଙ୍କ ଫଟୋକୁ ନେଇ ‘ମାଗା’ ସମର୍ଥକ ଓ ନ୍ୟୁୟର୍କର କିଛି ଲୋକ ଅସନ୍ତୋଷ ବ୍ୟକ୍ତ କରିଥିଲେ । ଟ୍ରମ୍ପ୍ ଓ ତାଙ୍କର ସମର୍ଥକମାନେ ତତ୍କାଳୀନ ଡେମୋକ୍ରାଟ୍ ସରକାରଙ୍କ ବିରୋଧରେ ‘ଅବୈଧ ପ୍ରବାସୀଙ୍କୁ ବିଳାସମୟ ହୋଟେଲରେ ରହିବାକୁ ଅନୁମତି ଦିଆଯିବା’ ନେଇ ଅଭିଯୋଗ ଆଣିଥିଲେ ।
ଟ୍ରମ୍ପ୍ଙ୍କ ସମର୍ଥକ ବିବେକ ରାମାସ୍ୱାମୀ ବି ଏହି ପାକିସ୍ତାନୀ ହୋଟେଲ ପ୍ରସଙ୍ଗ ଉଠାଇଥିଲେ । ସେ ଗତବର୍ଷ ଡିସେମ୍ବରରେ ସୋସିଆଲ ମିଡିଆରେ ଲେଖିଥିଲେ, ଏକ ବିଦେଶୀ ସରକାରଙ୍କ ଅଧିକୃତ ହୋଟେଲ ଆମେରିକୀୟ କରଦାତାଙ୍କ ଟଙ୍କା ଦ୍ୱାରା ଅବୈଧ ପ୍ରବାସୀଙ୍କୁ ଆଶ୍ରୟ ପ୍ରଦାନ କରୁଛି । ଏହା ଏକ ପାଗଳାମି । ଏବେ ରିପବ୍ଲିକାନ୍ ଡୋନାଲ୍ଡ ଟ୍ରମ୍ପ୍ ରାଷ୍ଟ୍ରପତି ହେବା ପରେ ହୋଟେଲ୍କୁ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି ।
