ମାହାଙ୍ଗା, ୦୧/୦୮ : ମହଙ୍ଗା ପଡ଼ିଲା କାର୍ଯ୍ୟରେ ଅବହେଳା। ସରକାରୀ ନିୟମ ଉଲ୍ଲଙ୍ଘନ ପରେ ଆକ୍ସନ୍। କଟକ ଜିଲ୍ଲା ମାହାଙ୍ଗା ବ୍ଲକର ସମସ୍ତ କର୍ମଚାରୀଙ୍କ ଦରମା ବନ୍ଦ। ଜରୁରୀକାଳିନ ପରିସ୍ଥିତିରେ ଅଫିସ ନଆସିବା ଏବଂ ଅଚଳ ବାୟୋମେଟ୍ରିକ୍ ନବଦଳାଇବା ପାଇଁ ସମସ୍ତ କର୍ମଚାରୀଙ୍କ ଜୁଲାଇ ମାସର ଦରମା ବନ୍ଦ ପାଇଁ ବିଡିଓଙ୍କୁ ଚିଠି କରିଛନ୍ତି ଜିଲ୍ଲା ପ୍ରକଳ୍ପ ନିର୍ଦ୍ଦେଶକ।
ସୂଚନାନୁଯାୟୀ, ଜୁଲାଇ ୨୬ ତାରିଖ ଶନିବାର ବଡ଼ ବର୍ଷା ନେଇ ମାହାଙ୍ଗା ବ୍ଲକର ସମସ୍ତ କର୍ମଚାରୀଙ୍କ ଛୁଟି ବାତିଲ କରାଯାଇଥିଲା। ସେଦିନ ବ୍ଲକକୁ କୌଣସି କର୍ମଚାରୀ ଆସିନଥିଲେ। ଯେଉଁଥିପାଇଁ ଜୁଲାଇ ମାସର ଦରମା ବନ୍ଦ ପାଇଁ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ବିଡିଓଙ୍କୁ ଚିଠି କରିଛନ୍ତି। ଖାଲି ସେତିକି ନୁହେଁ ମାହାଙ୍ଗା ବ୍ଲକରେ ହେଉଥିବା ଜିଲ୍ଲାପାଳଙ୍କ ଅଭିଯୋଗ ଶିବିରରେ ବାୟୋମେଟ୍ରିକ ମେସିନ ଖରାପ ଥିବା ନେଇ ଜିଲ୍ଲାପାଳଙ୍କୁ ଅଭିଯୋଗ ହୋଇଥିଲା। ତୁରନ୍ତ ଉକ୍ତ ମେସିନକୁ ଠିକ୍ କରିବା ପାଇଁ ବ୍ଲକ ଅଧିକାରୀଙ୍କୁ ଜିଲ୍ଲାପାଳ ଏକ ଚିଠି କରିଥିଲେ। ହେଲେ ବ୍ଲକ କର୍ମଚାରୀମାନେ ଚିଠିଟିକୁ କାର୍ଯ୍ୟକାରୀ କରିନଥିବା ନେଇ ମଧ୍ୟ ଦରମା ବନ୍ଦ ହୋଇଛି ବୋଲି ଚିଠିରେ ଉଲ୍ଲେଖ କରାଯାଇଛି। ଜିଲ୍ଲାପାଳଙ୍କ ଚିଠିକୁ କାହିଁକି ବ୍ଲକ କତ୍ତୃପକ୍ଷ ମାନି ନଥିଲେ ତାହା ଏବେ ସାଧାରଣରେ ଚର୍ଚ୍ଚା ଜୋର ଧରିଛି। ଗତ ୩୦ ତାରିଖରେ ମାହାଙ୍ଗା ବିଡ଼ିଓଙ୍କୁ ଏହି ଚିଠି କରାଯାଇଛି।
