ମୁମ୍ବାଇ: ଆଇଆରଏସ ଅଧିକାରୀ ସମୀର ୱାଙ୍ଖଡେ ଦିଲ୍ଲୀ ହାଇକୋର୍ଟରେ ଏକ ମାନହାନି ମାମଲା ଦାୟର କରିଛନ୍ତି । ଏହି ମାମଲା ଅଭିନେତା ଶାହରୁଖ ଖାନ ଏବଂ ଗୌରୀ ଖାନଙ୍କ କମ୍ପାନୀ ରେଡ ଚିଲିଜ୍ ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡ୍, ଓଟିଟି ପ୍ଲାଟଫର୍ମ ନେଟଫ୍ଲିକ୍ସ ଏବଂ ଅନ୍ୟାନ୍ୟ ପକ୍ଷଙ୍କ ବିରୁଦ୍ଧରେ ଦାୟର କରାଯାଇଛି । ସମୀର ୱାଙ୍ଖଡେ ଅଭିଯୋଗ କରିଛନ୍ତି ଯେ, ରେଡ୍ ଚିଲିଜ୍ ଦ୍ୱାରା ନିର୍ମିତ ଏବଂ ନେଟଫ୍ଲିକ୍ସରେ ପ୍ରସାରିତ ୱେବ୍ ସିରିଜ୍ ‘ବ୍ୟାଡ୍ସ ଅଫ୍ ବଲିଉଡ୍’ ମିଥ୍ୟା, ଦୂଷିତ ଏବଂ ମାନହାନି କରୁଛି ।
ଏହି ସିରିଜ୍ ନିଶା ନିବାରଣ ଏଜେନ୍ସିଗୁଡ଼ିକର ଏକ ନକାରାତ୍ମକ ଏବଂ ଭ୍ରାମକ ପ୍ରତିଛବି ଉପସ୍ଥାପନ କରୁଛି । ଏହା ଆଇନ ପ୍ରବର୍ତ୍ତନ ସଂସ୍ଥା ଉପରେ ସାଧାରଣ ଲୋକଙ୍କ ବିଶ୍ୱାସକୁ ହ୍ରାସ କରୁଛି । ୱାଙ୍ଖଡେ କହିଛନ୍ତି ଯେ, ଏହି ସିରିଜ୍ ଜାଣିଶୁଣି ତାଙ୍କ ପ୍ରତିଷ୍ଠାକୁ ଖରାପ କରିବା ପାଇଁ ତିଆରି କରାଯାଇଛି । ଏବେ ସମୀର ୱାଙ୍ଖଡେ ବନାମ ଆର୍ଯ୍ୟନ୍ ଖାନ ମାମଲା ବମ୍ବେ ହାଇକୋର୍ଟ ଏବଂ ମୁମ୍ବାଇର NDPS ସ୍ୱତନ୍ତ୍ର କୋର୍ଟରେ ବିଚାରାଧୀନ ଅଛି ।
ଶାହରୁଖ ଖାନଙ୍କ ପୁଅ ଆର୍ଯ୍ୟନ ଖାନଙ୍କ ଅଭିନୀତି ୱେବ୍ ସିରିଜରେ ‘ସତ୍ୟମେବ ଜୟତେ’ ଉଚ୍ଚାରଣ କରିବା ପରେ ଏକ ଅଶ୍ଳୀଳ ଇଙ୍ଗିତ କରାଯାଇଛି । ଏହି କାର୍ଯ୍ୟ ଜାତୀୟ ପ୍ରତୀକ ପ୍ରତି ଅପମାନ ଏବଂ ଜାତୀୟ ସମ୍ମାନ ଅପମାନ ନିବାରଣ ଆଇନ, ୧୯୭୧ର ଉଲ୍ଲଂଘନ । ୱେବ୍ ସିରିଜର ବିଷୟବସ୍ତୁ ସୂଚନା ପ୍ରଯୁକ୍ତି ଆଇନ ଏବଂ ଭାରତୀୟ ଦଣ୍ଡ ସଂହିତା (BNS) ର ବିଭିନ୍ନ ଧାରା ଉଲ୍ଲଂଘନ କରୁଛି ବୋଲି ସମୀର ୱାଙ୍ଖଡେ ଅଭିଯୋଗ କରିଛନ୍ତି । ମାନହାନି ମକଦ୍ଦମା କରି ସେ ୨ କୋଟି ଟଙ୍କା କ୍ଷତିପୂରଣ ଦାବି କରିଛନ୍ତି । ଆଉ ଏହି ଅର୍ଥ ଯାହା କର୍କଟ ରୋଗୀଙ୍କ ଚିକିତ୍ସା ପାଇଁ ଟାଟା ମେମୋରିଆଲ୍ କର୍କଟ ହସ୍ପିଟାଲକୁ ଦାନ କରାଯିବା ଉଚିତ ବୋଲି ସେ କହିଛନ୍ତି ।
