ଭୁବନେଶ୍ୱର, ୨୧/୦୫ : ରାଜ୍ୟରେ ପ୍ରଚଣ୍ଡ ଗ୍ରୀଷ୍ମପ୍ରବାହ। କଲବଲ କରୁଛି ଅସହ୍ୟ ଗୁଳୁଗୁଳି। ଦିନ ୯ଟାରେ ଘରୁ ବାହାରିବା ହୋଇଯାଉଛି ମୁସ୍କିଲ। ତତଲା କଡ଼େଇରେ ସନ୍ତୁଳି ହେଉଛନ୍ତି ଲୋକେ। ତେବେ ତାତିରୁ ସାମାନ୍ୟ ଆଶ୍ଵସ୍ତି ଦେଇପାରେ କାଳବୈଶାଖୀ। କାଳବୈଶାଖୀ ପ୍ରଭାବରେ ଉତ୍ତର ଓ ଦକ୍ଷିଣ ଓଡ଼ିଶାରେ ଅଧିକ ବର୍ଷା ହୋଇପାରେ। ଗଞ୍ଜାମ, ଗଜପତି ରାୟଗଡ଼ା, କୋରାପୁଟ, ମାଲକାନଗିରି, କନ୍ଧମାଳ, କେନ୍ଦୁଝର ଓ ମୟୂରଭଞ୍ଜରେ ଘଡ଼ଘଡ଼ି ସହିତ ବର୍ଷା ହେବାର ସମ୍ଭାବନା ଅଛି । ତେବେ ଉପକୂଳ ଓଡ଼ିଶା ଓ ପଶ୍ଚିମ ଓଡ଼ିଶାରେ ଗରମ ଓ ଗୁଳୁଗୁଳି ଜାରି ରହିବ ବୋଲି ପାଣିପାଗ ବିଭାଗ ଆକଳନ କରିଛି।
ବୁଧବାର ସମ୍ବଲପୁରର ଦିନ ତାପମାତ୍ରା ସର୍ବାଧିକ ୪୧ ଡିଗ୍ରୀ ଛୁଇଁବ । ବଲାଙ୍ଗିରରେ ୪୦, ଝାରସୁଗୁଡ଼ା, ବୌଦ୍ଧ, ବରଗଡ଼ ଓ ଟିଟଲାଗଡ଼ରେ ୩୯ ଡିଗ୍ରୀ ରହିପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଗୁରୁବାର(୨୨ ତାରିଖ) ସମ୍ବଲପୁର ଓ ବଲାଙ୍ଗିରରେ ୪୦ ଡିଗ୍ରୀ ଛୁଇଁବ । ପଶ୍ଚିମ ଓଡ଼ିଶାର ଅଧିକାଂଶ ସ୍ଥାନରେ ତାତି ୩୮ରୁ ୪୦ ଡିଗ୍ରୀ ରହିପାରେ । ମଙ୍ଗଳବାର ସମ୍ବଲପୁରରେ ତାତି ୪୧.୬ ଡିଗ୍ରୀ ରହିଥିଲା । ହୀରାକୁଦ, ବଲାଙ୍ଗିର, ଟିଟିଲାଗଡ଼ ଓ ଅନୁଗୁଳରେ ତାତି ୪୦ ଡିଗ୍ରୀ ଉପରେ ଥିଲା। ପଶ୍ଚିମ ଓଡ଼ିଶାର ଅଧିକାଂଶ ସ୍ଥାନରେ ୪୦ ଡିଗ୍ରୀ ପାଖାପାଖି ରହିଥିଲା।
ମଙ୍ଗଳବାର ସକାଳୁ ରାଜଧାନୀ ତାତି ୩୩ ଡିଗ୍ରୀ ଅତିକ୍ରମ କରିଥିଲା। ସକାଳ ସାଢ଼େ ୮ଟା ବେଳକୁ ଭୁବନେଶ୍ୱରରେ ତାତି ୩୩.୬ ଡିଗ୍ରୀ ଏବଂ ଆର୍ଦ୍ରତା ୬୨.୩% ରହିଥିଲା । ଏଥିପାଇଁ ପ୍ରବଳ ଗୁଳୁଗୁଳି ହୋଇଥିଲା । ଦିନ ସାଢ଼େ ୧୧ଟାରେ ତାତି ୩୭.୪ ଡିଗ୍ରୀ ହୋଇଥିଲା । ସେବେ ଆର୍ଦ୍ରତା ଥିଲା ୪୮.୭% । ଏଥିପାଇଁ ୪୬ ଡିଗ୍ରୀ ଭଳି ତାତି ଅନୁଭୂତ ହୋଇଥିଲା । ମଧ୍ୟାହ୍ନ ବେଳକୁ ତାତି ୩୮.୪ ଡିଗ୍ରୀରେ ପହଞ୍ଚିଥିଲା । ଏବେ ଆକାଶକୁ ବାଦଲ ଘୋଡ଼ାଇ ରଖୁଥିବାରୁ ଆଗକୁ ତାତି ଓ ଗୁଳୁଗୁଳି ବଢ଼ିପାରେ ବୋଲି ପାଣିପାଗ ବିଶେଷଜ୍ଞ କହିଛନ୍ତି ।
ଆସନ୍ତା ୪ରୁ ୫ ଦିନ ଭିତରେ ଦକ୍ଷିଣ ପଶ୍ଚିମ ମୌସୁମୀ ବାୟୁ କେରଳ ଛୁଇଁପାରେ ବୋଲି ପୂର୍ବାନୁମାନ ରହିଛି । ଗତ ୨୪ ଘଣ୍ଟାରେ କାଳବୈଶାଖୀ ପ୍ରଭାବରେ ଝାରସୁଗୁଡ଼ା କିରମାରାରେ ୫୫.୪ ମିମି ବର୍ଷା ହୋଇଛି । ଭଦ୍ରକ ଆଖୁଆପଦାରେ ୩୮.୮, ସୁନ୍ଦରଗଡ଼ ଟାଙ୍ଗରାପାଲ୍ଲୀରେ ୩୨.୪, ଢେଙ୍କାନାଳରେ ୨୯.୪, ଭଦ୍ରକରେ ୨୬.୪, ଯାଜପୁରରେ ୨୪.୬, ଝାରସୁଗୁଡ଼ାରେ ୨୦ମିମି ବର୍ଷା ରେକର୍ଡ ହୋଇଛି ।
