ନୂଆଦିଲ୍ଲୀ, ୨୭।୭: ଦକ୍ଷିଣ ଲେବାନନରେ ଜୋରଦାର ହମଲା କରିଛି ଇସ୍ରାଏଲ ପ୍ରତିରକ୍ଷା ବାହିନୀ (IDF) । ଏହି ଡ୍ରୋନ୍ ଆକ୍ରମଣରେ ଟପ୍ ହିଜବୁଲା କମାଣ୍ଡର ଅଲି ଆବେଦ ଅଲ୍-କାଦର ଇସମାଇଲ୍‌ଙ୍କ ମୃତ୍ୟୁ ଘଟିଛି । ଆଇଡିଏଫ୍ କହିଛି ଯେ, ଲେବାନନର ବିଣ୍ଟ ଜବେଲ୍ ଅଞ୍ଚଳରେ ଏହି ଡ୍ରୋନ୍ ଆକ୍ରମଣ ହୋଇଛି । ହିଜବୁଲାର କ୍ଷମତା ପୁନରୁଦ୍ଧାର ପ୍ରୟାସରେ ସାମିଲ ଥିବା ଇସମାଇଲ୍‌ଙ୍କୁ ହତ୍ୟା କରିଛି । ଆଇଡିଏଫ୍ କହିଛି ଯେ, ଏହି ଆକ୍ରମଣ ଗତ ସପ୍ତାହ ମଧ୍ୟରେ ବିଣ୍ଟ ଜବେଲ ସେକ୍ଟରରେ ହିଜବୁଲା ଆତଙ୍କବାଦୀଙ୍କ ଉପରେ ତୃତୀୟ ଆକ୍ରମଣ । 

ଏକ ସାମରିକ ବିବୃତ୍ତିରେ କୁହାଯାଇଛି ଯେ, ଇସମାଇଲ୍‌ "ଦକ୍ଷିଣ ଲେବାନନର ବିଣ୍ଟ ଜବେଲ ଅଞ୍ଚଳରେ ଆତଙ୍କବାଦୀ ସଙ୍ଗଠନକୁ ପୁନର୍ବାସ କରିବା ପାଇଁ ପ୍ରୟାସରେ ସାମିଲ ଥିଲେ । ଯୁଦ୍ଧ ସମୟରେ ଆତଙ୍କବାଦୀମାନଙ୍କୁ ନିଯୁକ୍ତି ଦେବା ପାଇଁ କାର୍ଯ୍ୟ କରୁଥିଲେ । ଗୁରୁବାର ଇସ୍ରାଏଲ କହିଛି ଯେ, ଏହା ହିଜବୁଲା ଅସ୍ତ୍ରଶସ୍ତ୍ର ଡିପୋ ଏବଂ ଏକ ରକେଟ୍ ଲଞ୍ଚର ଉପରେ ଆକ୍ରମଣ କରିଛି ଏବଂ ଲେବାନନର ଦକ୍ଷିଣରେ ଜଣେ ହିଜବୁଲା ଆତଙ୍କବାଦୀଙ୍କୁ ହତ୍ୟା କରିଛି । ଏହି ଯୁଦ୍ଧବିରାମ ଅନୁଯାୟୀ, ହିଜବୁଲା ଇସ୍ରାଏଲ ସୀମାରୁ ପ୍ରାୟ ୩୦ କିଲୋମିଟର ଦୂରରେ ଲିଟାନି ନଦୀର ଉତ୍ତରରେ ତା’ର ଯୋଦ୍ଧାମାନଙ୍କୁ ପ୍ରତ୍ୟାହାର କରିବାକୁ ଯୋଜନା କରିଥିଲା । ଯାହା ଫଳରେ ଲେବାନନର ସେନା ଏବଂ ଜାତିସଂଘ ଶାନ୍ତିରକ୍ଷୀମାନେ ଏହି ଅଞ୍ଚଳରେ ଏକମାତ୍ର ସଶସ୍ତ୍ର ଦଳ ଭାବରେ ରହିପାରିବେ । ଇସ୍ରାଏଲ ଲେବାନନରୁ ତା’ର ସୈନ୍ୟ ପ୍ରତ୍ୟାହାର କରିଥିଲା । କିନ୍ତୁ, ଲେବାନନ ଦାବି କରୁଛି ଯେ ଇସ୍ରାଏଲୀ ସୈନ୍ୟମାନେ ପ୍ରାୟ ୫ଟି ଅଞ୍ଚଳରେ ଲୁଚି ରହିଛନ୍ତି । 

ଇସ୍ରାଏଲ-ଲେବାନନ୍ ଉତ୍ତେଜନା :

ଅକ୍ଟୋବର ୭ ତାରିଖରେ ହମାସ ଆକ୍ରମଣ ପରେ ଇସ୍ରାଏଲ ଲେବାନନର ଆତଙ୍କବାଦୀ ଗୋଷ୍ଠୀ ହିଜବୁଲା ଉପରେ ଆକ୍ରମଣକୁ ଦ୍ୱିଗୁଣିତ କରିଥିଲା । ଏହା ୨୦୨୪ରେ ଲେବାନନରେ ଇସ୍ରାଏଲ ଆକ୍ରମଣର କାରଣ ହୋଇଥିଲା, ଯାହା ୨୦୦୬ ଲେବାନନ ଯୁଦ୍ଧ ପରେ ଦୁଇ ଦେଶ ମଧ୍ୟରେ ଉତ୍ତେଜନା ବୃଦ୍ଧି କରିଥିଲା । ୨୦୨୪ରେ ଇସ୍ରାଏଲ ପ୍ରମୁଖ ହିଜବୁଲା ନେତା ହାସନ ନାସରାଲ୍ଲା ଏବଂ ତାଙ୍କ ଉତ୍ତରାଧିକାରୀ ହାସେମ ସାଫିଦ୍ଦାଇନଙ୍କୁ ହତ୍ୟା କରିବା ପରେ ଉତ୍ତେଜନା ବୃଦ୍ଧି ପାଇଥିଲା । ନଭେମ୍ବର ୨୦୨୪ରେ, ହିଜବୋଲା ଏବଂ ଇସ୍ରାଏଲ ମଧ୍ୟରେ ଏକ ଯୁଦ୍ଧବିରତି ଚୁକ୍ତିନାମା ହୋଇଥିଲା । ଆମେରିକା ନେତୃତ୍ୱରେ ୫ଟି ଦେଶର ଏକ ପ୍ୟାନେଲ ଦ୍ୱାରା ଏହି ଯୁଦ୍ଧବିରତି ଉପରେ ନଜର ରଖାଯାଇଛି । ଯଦିଓ ଇସ୍ରାଏଲ ଏହି ସମୟ ମଧ୍ୟରେ ଲେବାନନରେ ଆକ୍ରମଣ କରିବାର ଅଧିକାର ବଜାୟ ରଖିଛି । ଏହି ଯୁଦ୍ଧବିରତିକୁ ୧୮ ଫେବୃଆରୀ ୨୦୨୫ ପର୍ଯ୍ୟନ୍ତ ବୃଦ୍ଧି କରାଯାଇଥିଲା ।