ପୁଲିସ୍ ସେବା ଭବନରେ ସେରୋ ସର୍ଭେ : ସମସ୍ତ ଅଫିସର ଓ କର୍ମଚାରୀଙ୍କର ରକ୍ତ ନମୁନା ପରୀକ୍ଷା କରାଯାଇଛି
ଭୁବନେଶ୍ୱର,୫।୮: କମିଶନରେଟ୍ ପୁଲିସ୍ ମୁଖ୍ୟାଳୟ (ପୁଲିସ୍ ସେବା ଭବନ)ରେ ମଙ୍ଗଳବାର ସେରୋଲୋଜିକାଲ୍ ସର୍ଭେ(ସେରୋ ସର୍ଭେ)କରା ଯାଇଥିଲା । ଏଠାରେ କାର୍ଯ୍ୟରତ ସମସ୍ତ ଅଫିସର ଓ କର୍ମଚାରୀଙ୍କର ରକ୍ତ ନମୁନା ପରୀକ୍ଷା କରାଯାଇଛି । ଆରଏମ୍ଆରସି ପକ୍ଷରୁ ଏକ ଟିମ୍ ପୁଲିସ୍ ସେବା ଭବନକୁ ଆସି ରକ୍ତନମୁନା ନେଇଛି । ସେରୋ ସର୍ଭେ ରିପୋର୍ଟରୁ ଆଣ୍ଟିବଡି ସମ୍ପର୍କରେ ଜଣାପଡ଼ିବ ।
ରକ୍ତ ନମୁନା ଦେଇଥିବା ବ୍ୟକ୍ତି ଜଣଙ୍କ ଅଜାଣତରେ କରୋନା ପଜିଟିଭ୍ ହେବା ପରେ ତା ଶରୀରରେ ଆଣ୍ଟିବଡି ସୃଷ୍ଟି ହୋଇଥାଏ । ଯାହା ଏହି ରିପୋର୍ଟରୁ ସ୍ପଷ୍ଟ ହୋଇପାରିବ । ସେପଟେ ରୋଟାରି କ୍ଲବ୍ର ବରିଷ୍ଠ ଅଧିକାରୀମାନେ ପୁଲିସ୍ କମିଶନର ଡ. ସୁଧାଂଶୁ ଷଡଙ୍ଗୀଙ୍କୁ ଭେଟି କରୋନା ଯୋଦ୍ଧାଙ୍କ ପାଇଁ ସାନିଟାଇଜର ଓ ମାସ୍କ ପ୍ରଦାନ କରିଛନ୍ତି । କ୍ଲବ୍ର ଏଭଳି ସହଯୋଗ ପାଇଁ କମିଶନର ଶ୍ରୀ ଷଡଙ୍ଗୀ ତାଙ୍କୁ ଧନ୍ୟବାଦ ଦେଇଛନ୍ତି ।
