ପୁରୀ,୨୧/୧୧: ମହାପ୍ରଭୁ ଶ୍ରୀଜଗନ୍ନାଥଙ୍କ ମାଟିତୋଟାରେ ଥିବା ୬୪ ଏକର ଜମି ଉପରେ ରହିଥିବା ଘର ଉପରେ ବୁଲିବ ବୁଲ୍ଡୋଜୋର । ମହାପ୍ରଭୁଙ୍କ ଜମିକୁ ବେଆଇନ ଭାବେ ଜମି ମାଫିଆଙ୍କଠାରୁ ହାତେଇ ଘର କରିଥିବା ୧୨୫ ଜଣଙ୍କ ତାଲିକା ପ୍ରସ୍ତୁତ କରିଛନ୍ତି ପୁରୀ ତହସିଲଦାର ଓ ଶ୍ରୀମନ୍ଦିର ରାଜସ୍ୱ ବିଭାଗର ଅଧିକାରୀ ।
ମଙ୍ଗଳବାର ପ୍ରଶାସନିକ ଏକ ଯୁଗ୍ମ ସ୍କ୍ୱାଡ ମହାପ୍ରଭୁଙ୍କ ଏହି ପ୍ଲଟ୍କୁ ଯାଇ ମାପଚୁପ୍ କରିବା ସହ ବେଆଇନ ଭାବେ ଘର କରିଥିବା ଲୋକଙ୍କ ନାମ ସଂଗ୍ରହ କରିଛନ୍ତି । ଏହି ଟିମ୍ରେ ବାସେଳିସାହି ଥାନା ଅଧିକାରୀ, ଶ୍ରୀମନ୍ଦିର ପ୍ରଶାସନର ଅଧିକାରୀ, ପୁରୀ ସଦର ତହସିଲଦାରଙ୍କ ସମେତ ଅନ୍ୟ ପ୍ରାଶାସନିକ କର୍ମଚାରୀ ଓ ପୁଲିସ ଫୋର୍ସ ଉପସ୍ଥିତ ଥିଲେ । ସମସ୍ତ ୧୨୫ ଜଣ ଜବରଦଖଲକାରୀଙ୍କୁ ଆସନ୍ତା ସପ୍ତାହକ ଭିତରେ ନୋଟିସ୍ କରାଯିବ । ଜବରଦଖଲକାରୀଙ୍କ ଜବାବକୁ ଅନୁଧ୍ୟାନ ପରେ ୩୦ ଦିନ ପରେ ଉଚ୍ଛେଦ ନିମନ୍ତେ ପଦକ୍ଷେପ ନିଆଯିବ ବୋଲି ପୁରୀ ସଦର ତହସିଲଦାର ଅଭିଷେକ ଦାଶ କହିଛନ୍ତି । ଏହି ଜମି ଜବରଦଖଲ ନେଇ ବାସେଳିସାହି ଥାନାରେ ମାମଲା ରୁଜୁ ହୋଇଥିବାରୁ ତଦନ୍ତ ପ୍ରକ୍ରିୟାକୁ ଜୋର୍ଦାର୍ କରିଛି ପୁଲିସ।
ମାଟିତୋଟା ମୌଜା ୟୁନିଟ୍ ନଂ-୧, ଖାତା ନମ୍ବର-୩୮ର ସମୁଦାୟ ୧୦୯ଟି ପ୍ଲଟର ଏହି ଜମିକୁ ବେଆଇନ୍ ଭାବେ ହସ୍ତାନ୍ତର କରାଯାଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକ ଏନେଇ ଅବଗତ ହେବା ପରେ ବେଆଇନ ଜମି ଜବରଦଖଲକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିମନ୍ତେ ନିର୍ଦ୍ଦେଶ ଦେଇଛନ୍ତି । ଏ ବାବଦରେ ବାସେଳିସାହି ଥାନାରେ ଶ୍ରୀମନ୍ଦିର ରାଜସ୍ୱ ଉପବିଭାଗ ଓଏସ୍ଡି ଏତଲା ଦେବା ପରେ ମହାବୀର ଜନସେବା ସଂଘର ୭ ଜଣଙ୍କ ନାମରେ ମାମଲା ହୋଇଛି । ଜିଲ୍ଲାପାଳଙ୍କ ନିର୍ଦ୍ଦେଶକୁ ଭିତ୍ତି କରି ତହସିଲଦାର ଓ ଶ୍ରୀମନ୍ଦିର ରାଜସ୍ୱ ଉପବିଭାଗ ମହାପ୍ରଭୁଙ୍କ ଜମି ସୁରକ୍ଷା ନିମନ୍ତେ ଗୋଡ଼ କାଢ଼ିଛନ୍ତି । ରାଜ୍ୟର ୭ ଜିଲ୍ଲା ଅନ୍ତର୍ଗତ ୭ ତହସିଲ ଅଞ୍ଚଳରେ ମହାପ୍ରଭୁଙ୍କ ୧୬୯ ଏକରରୁ ଅଧିକ ଜମିରୁ ଜବରଦଖଲ ଉଚ୍ଛେଦ ନେଇ ୯୭୪ଟି ମାମଲା ରୁଜୁ ହୋଇଛି । ଯାହା ଭିତରେ ପୁରୀ ତହସିଲରେ ୨୨ ଏକରରୁ ଅଧିକ ଜମିରୁ ଜବରଦଖଲ ମୁକ୍ତ ନିମନ୍ତେ ୩୮୪ଟି ମାମଲା ରହିଛି।
