ମନ୍ଦିରରୁ ନାଗ ମୂର୍ତ୍ତି ଚୋରି କଲା, ସମ୍ଭାଳି ପାରିଲାନି.. ନାଗପୁରରେ ଛାଡ଼ି ପଳାଇଲା ଚୋର
ଗୋପ,୨୫/୦୫: ନାଗପୁର ବଜାରର ଏକ ପରିତ୍ୟକ୍ତ ସ୍ଥାନରୁ ନାଗ ମୂର୍ତ୍ତି ଜବତ କରାଯାଇଛି । ସ୍ଥାନୀୟ ଲୋକେ ଏହାକୁ ପୂଜାର୍ଚ୍ଚନା ଲାଗି ନିକଟସ୍ଥ ଏକ ମନ୍ଦିରରେ ରଖିଛନ୍ତି । ତେବେ ଏହି ମୂର୍ତ୍ତିଟି କେଉଁ ମନ୍ଦିରର ତାହା ଏ ପର୍ଯ୍ୟନ୍ତ ଜଣାପଡ଼ିନି । ଏହା ତମ୍ବା କିମ୍ବା ପିତ୍ତଳ ତାହା ମଧ୍ୟ ସ୍ପଷ୍ଟ ହୋଇନି ।
ଗୋପ ଅଞ୍ଚଳର ଅନେକ ଶିବ ମନ୍ଦିରରୁ ଚୋରି ହେଉଛି । ଦୁର୍ବୃତ୍ତମାନେ ଆଖଣ୍ଡଳେଶ୍ୱର ଶିବ ମନ୍ଦିର ଓ ବିରୁତୁଙ୍ଗର ଭଳି କେତେକ ବଡ଼ ମନ୍ଦିରରୁ ଠାକୁରଙ୍କ ବିଭିନ୍ନ ପୂଜା ସାମଗ୍ରୀ ଲୁଟି ନେଇଛନ୍ତି । ଏନେଇ ଥାନାରେ ଅଭିଯୋଗ ହୋଇଛି । ପୁଲିସ୍ ମାମଲା ରୁଜୁ କରି ତଦନ୍ତ ଜାରି ରଖିଛି । ହେଲେ ଏ ପର୍ଯ୍ୟନ୍ତ କାହାରିକୁ ଗିରଫ କରିପାରିନି । ନାଗପୁର ବଜାରରୁ ଉଦ୍ଧାର ମୂର୍ତ୍ତି କୌଣସି ପ୍ରତ୍ୟକ୍ଷ ଠାକୁରଙ୍କ ବୋଲି କୁହାଯାଉଛି । ଦୁର୍ବୃତ୍ତ ଏହାକୁ ଚୋରି କରିବା ପରେ ଠାକୁରଙ୍କ କୋପ ସମ୍ଭାଳି ପାରିଲାନି । ତେଣୁ ଏହି ପରିତ୍ୟକ୍ତ ସ୍ଥାନରେ ଛାଡ଼ି ପଳାଇଲା ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି ।
