ନୂଆଦିଲ୍ଲୀ. ୬।୯: ବୟସ ମାତ୍ର ୮ ବର୍ଷ । ଚତୁର୍ଥ ଶ୍ରେଣୀର ପାଠ ପଢ଼ୁଛନ୍ତି । ପୁଲିସ ବିଭାଗରେ କନେଷ୍ଟବଳ ଚାକିରି କରିଛନ୍ତି । ଏତେ କୁନି ବୟସରୁ ପୂରା ପରିବାରର ଭରଣପୋଷଣ ଦାୟିତ୍ୱ ତୁଲାଉଛନ୍ତି । ମଧ୍ୟପ୍ରଦେଶ ଉଜ୍ଜୟିନୀର ଜଣେ ଚତୁର୍ଥ ଶ୍ରେଣୀ ଛାତ୍ରୀ । ଯାହାଙ୍କୁ ପୁଲିସ ବିଭାଗରେ ଚାକିରି ମିଳିଛି । ଆପଣଙ୍କ ମନରେ ପ୍ରଶ୍ନ ଆସୁଥିବ, ଏତେ କମ୍ ବୟସରୁ ଝିଅଟିକୁ ପୁଲିସ ଚାକିରି କେମିତି ମିଳିଛି ? ଝିଅଟିର ନାଁ ଇଚ୍ଛା ରଘୁବଂଶୀ । ତାଙ୍କ ବାପାଙ୍କର ହୃଦ୍ଘାତରେ ମୃତ୍ୟୁ ହୋଇଥିଲା । ପୂର୍ବରୁ ସେ ପୋଲିସ ବିଭାଗରେ କାମ କରୁଥିଲେ । ବାପା ଚାଲିଯିବା ପରେ ବାପାଙ୍କ ଜାଗାରେ ଇଚ୍ଛା ଚାକିରି ପାଇଁ ଆବେଦନ କରିଥିଲେ । ସବୁଠାରୁ ଖୁସିର କଥା ଯେ, ଏସ୍ପି ମାତ୍ର ୨୫ ମିନିଟ୍ ମଧ୍ୟରେ ଇଚ୍ଛାଙ୍କ ଆବେଦନ ଗ୍ରହଣ କରିଥିଲେ । କେବଳ ଏତିକି ନୁହେଁ, ସେ ତାଙ୍କୁ ଚାକିରି ପାଇଁ ନିଯୁକ୍ତି ପତ୍ର ମଧ୍ୟ ଦେଇଥିଲେ ।
ମହାକାଳ ପୋଲିସ ଷ୍ଟେସନରେ ହେଡ୍ କନେଷ୍ଟବଳ ନମ୍ବର ୯୮୮ ଦେବେନ୍ଦ୍ର ସିଂହ ରଘୁବଂଶୀ ନିଯୁକ୍ତ ଥିଲେ । ୧୭ ମେ, ୨୦୨୫ରେ ହୃଦ୍ଘାତରେ ତାଙ୍କର ମୃତ୍ୟୁ ହୋଇଥିଲା । ଇଚ୍ଛା ରଘୁବଂଶୀ ହେଡ୍ କନଷ୍ଟେବଳ ସ୍ୱର୍ଗତ ଦେବେନ୍ଦ୍ର ସିଂହ ରଘୁବଂଶୀଙ୍କ ଏକମାତ୍ର ସନ୍ତାନ । ସେଥିପାଇଁ ତାଙ୍କୁ ଏହି ନିଯୁକ୍ତି ମିଳିଛି । ଇଚ୍ଛା ବର୍ତ୍ତମାନ ସେଣ୍ଟ ମେରୀ ସ୍କୁଲରେ ପାଠ ପଢ଼ୁଛନ୍ତି । କହିରଖୁଛୁ କି, ପୋଲିସ କର୍ମଚାରୀଙ୍କ ଅକାଳ ମୃତ୍ୟୁ ହେଲେ, ପରିବାର ପ୍ରତିପୋଷଣ ପାଇଁ ତାଙ୍କ ପରିବାରର ନାବାଳକ କିମ୍ୱା ନାବାଳିକା ପିଲାଙ୍କୁ ଶିଶୁ କନଷ୍ଟେବଳ ଭାବେ ନିଯୁକ୍ତି ଦିଆଯାଏ । ପିଲାଙ୍କୁ ୧୮ ବର୍ଷ ହେବା ପର୍ଯ୍ୟନ୍ତ ପାଠପଢ଼ିବା ସହ ବିଭାଗର ଛୋଟ ଛୋଟ କାମ କରନ୍ତି । ଏପରିକି କିଛି ସମୟରେ ସେମାନେ ପୋଲିସର ଶୃଙ୍ଖଳା ଏବଂ ବିଭାଗର ପ୍ରକ୍ରିୟାକୁ ମଧ୍ୟ ବୁଝନ୍ତି । ୧୮ ବର୍ଷ ହେବା ପରେ, ସେମାନଙ୍କୁ କାମ କରିବାକୁ ସୁଯୋଗ ମିଳେ । ନାବାଳକ ପିଲାମାନଙ୍କୁ ଶିଶୁ କନଷ୍ଟେବଳ କରିବା ପଛରେ ଏକ ମୁଖ୍ୟ କାରଣ ହେଉଛି, ପରିବାର ମୁଖ୍ୟଙ୍କ ମୃତ୍ୟୁପରେ ସେମାନଙ୍କ ପରିବାରକୁ ଆର୍ଥିକ ସହାୟତା ଦେବା ।
ପୋଲିସ ନିୟମ ଅନୁଯାୟୀ, ଇଚ୍ଛା ଯେତେବେଳେ ଦଶମ ଶ୍ରେଣୀ ପାସ୍ କରିବେ, ସେତେବେଳେ ସେ ସ୍ଥାୟୀ କନଷ୍ଟେବଳ ହୋଇପାରିବେ । ଇଚ୍ଛାଙ୍କୁ ମିଳୁଥିବା ଦରମା ବିଷୟରେ ସୂଚନା ଦେଇ ଅଧିକାରୀ କହିଛନ୍ତି, ବାଲ ରକ୍ଷକ ଜଣେ ନୂତନ କନଷ୍ଟେବଳଙ୍କ ଦରମାର ଅଧା ଦରମା ପାଆନ୍ତି । ଏହି ନିୟମ ଅନୁଯାୟୀ, ଇଚ୍ଛାଙ୍କୁ ପ୍ରତି ମାସରେ ୧୫,୧୧୩ ଟଙ୍କା ଦରମା ମିଳିବ । ଏହା ସହିତ, ତାଙ୍କୁ ମାସରେ ଥରେ ପୋଲିସ ଷ୍ଟେସନକୁ ଆସି ଦସ୍ତଖତ କରିବାକୁ ପଡ଼ିବ ଏବଂ ଏହି ସମୟ ମଧ୍ୟରେ ତାଙ୍କ ଶିକ୍ଷା ସମ୍ବନ୍ଧୀୟ ସୂଚନା ମଧ୍ୟ ନିଆଯିବ । ଇଚ୍ଛା ଦଶମ ଶ୍ରେଣୀରେ ଉତ୍ତୀର୍ଣ୍ଣ ହେବା ସହ ଯେତେବେଳେ ୧୮ ବର୍ଷ ବୟସ ପୂରଣ କରିବେ, ସେତେବେଳେ ତାଙ୍କୁ ସ୍ଥାୟୀ କନଷ୍ଟେବଳ ଭାବେ ନିଯୁକ୍ତି ମିଳିବ । ଏସ୍ପି ପ୍ରଦୀପ ଶର୍ମା କହିଛନ୍ତି, ଶିଶୁ କନଷ୍ଟେବଳ ନିଯୁକ୍ତି ମାମଲାଗୁଡ଼ିକୁ ଯଥାଶୀଘ୍ର ସମାଧାନ କରିବା ମୋର ପ୍ରାଥମିକତା । ଇଚ୍ଛା ରଘୁବଂଶୀଙ୍କ ପୂର୍ବରୁ ମଧ୍ୟ ଅନ୍ୟ ଶିଶୁ କନଷ୍ଟେବଳଙ୍କୁ ନିଯୁକ୍ତି ଦିଆଯାଇଛି । ଆମର ଏକମାତ୍ର ଉଦ୍ଦେଶ୍ୟ ହେଉଛି ପୋଲିସ ଚାକିରିରେ ଥିବା କୌଣସି ଅଧିକାରୀଙ୍କ ମୃତ୍ୟୁ ପରେ ତାଙ୍କ ପରିବାରର କୌଣସି ସଦସ୍ୟଙ୍କୁ ଯଥାଶୀଘ୍ର ଚାକିରି ମିଳିବା ଏବଂ ସେମାନଙ୍କ ଉପରେ ଆସୁଥିବା ଆର୍ଥିକ ସଙ୍କଟକୁ ଦୂର କରିବା ।
