ନୂଆଦିଲ୍ଲୀ, ୧୫/୧୧: ଧନୀ ଓ ଦାନୀ କହିଲେ ଆମ ମନକୁ ସାଧାରଣତଃ ଅମ୍ବାନୀ ଓ ଆଦାନୀ ପରିବାର କଥା ସାମ୍ନାକୁ ଆସିଥାଏ । ମୁକେଶ ଅମ୍ବାନୀ ଓ ନିତା ଅମ୍ବାନୀ, ଗୌତମ ଓ ପ୍ରୀତି ଆଦାନୀଙ୍କ ନାମ ଆଗକୁ ଆସିଥାଏ । ବର୍ତ୍ତମାନ ଏହି ତାଲିକା ଆଉ ଏକ ଦମ୍ପତିଙ୍କ ନାମ ସାମିଲ ହୋଇଛି । ସୁବ୍ରତ ବାଗଚୀ ଓ ସୁସ୍ମିତା ବାଗଚୀ ଏକ ପରୋଉପକାରୀ ଯୋଡି । ସମାଜର କଲ୍ୟାଣ ପାଇଁ ଲୋକଙ୍କ ହିତ ନେଇ ସର୍ବଦା କାର୍ଯ୍ୟ କରୁଥିବା ବାଗଚୀ ଦମ୍ପତି ଏବେ ଚର୍ଚ୍ଚାରେ । ପ୍ରତିବର୍ଷ ବିଭିନ୍ନ ସେକ୍ଚରକୁ ଦାନ କରିଥାନ୍ତି ସୁବ୍ରତ ବାଗଚୀ ଓ ତାଙ୍କ ପତ୍ନୀ ସୁସ୍ମିତା ବାଗଚୀ । ଏବେ ଏହି ଯୋଡିଙ୍କୁ ଦେଶରେ ଦାନୀ ଦମ୍ପତି ଭାବରେ ନୂଆ ପରିଚୟ ମିଳିଛି । ୧୭୯ କୋଟି ଟଙ୍କା ଦାନ କରି ୧୦ ଜଣ ବଡ ବଡ ଦାନୀଙ୍କ ତାଲିକାରେ ରହିଛନ୍ତି ଓଡିଶାର ବାଗଚୀ ଦମ୍ପତି ।
ବାଗଚୀ ଦମ୍ପତିଙ୍କ ଦାନ- ସ୍ବାସ୍ଥସେବା କ୍ଷେତ୍ରରେ ଉନ୍ନତି ପାଇଁ ବାଗଚୀ ଦମ୍ପତି ୨୦୨୨ରେ ୨୧୩ କୋଟି ଦାନ କରିଥିଲେ । ୨୦୨୩ରେ ୧୧୦ କୋଟି ଟଙ୍କା ଓ ୨୦୨୪ରେ ୧୭୯ ଦାନ କରି ଚର୍ଚ୍ଚାକୁ ଆସିଛନ୍ତି ଏହି ଦମ୍ପତି । ୨୦୨୧ରେ ଓଡିଶାରେ କ୍ୟାନ୍ସର ହସ୍ପିଟାଲ ନିର୍ମାଣ ନେଇ ୩୪୦ କୋଟି ଦାନ କରିଥିଲେ । ହୁରୁନ ଇଣ୍ଡିଆ ଜାରି କରିଥିବା ତାର ସଦ୍ୟ ତାଲିକାରେ ୧୦ ଜଣ ବଡ ବଡ ଦାନୀଙ୍କ ମଧ୍ୟରେ ରହିଛନ୍ତି ବାଗଚୀ ଦମ୍ପତି । ୧୦ ଜଣଙ୍କ ମଧ୍ୟରେ ନବମ ସ୍ଥାନରେ ରହିଛନ୍ତି ଏହି ଯୋଡି ।
ମାଇଣ୍ଡଟ୍ରିର ପ୍ରତିଷ୍ଠାତା- ବାଗଚୀ ଦମ୍ପତି ମାଇଣ୍ଡଟ୍ରିର ସହ ପ୍ରତିଷ୍ଠାତା । ମାଇଣ୍ଡିଟ୍ରି ଏକ ଆଇଟି କମ୍ପାନୀ । ଭାରତ ଓ ବିଦେଶରେ ଏହି କମ୍ପାନୀ ରହିଛି । ସୁସ୍ମିତା ବାଗଚୀ ଜଣେ ଓଡିଆ ଲେଖିକା । ସେ ୫ଟି ଉପନ୍ୟାସ ଲେଖିଛନ୍ତି । ଇଂରାଜୀ ଭାଷାରେ ମଧ୍ୟ ତାଙ୍କର ଅନେକ ଲେଖା ରହିଛି । ସମାଜର କଲ୍ୟାଣ ପାଇଁ ଏହି ଦମ୍ପତି ସର୍ବଦା କାର୍ଯ୍ୟରତ ।
ଲାଇମ ଲାଇଟଠୁ ଦୂରରେ- ସମାଜର କଲ୍ୟାଣ ପାଇଁ ଚିନ୍ତିତ ଥିବା ଲୋକ ହିତରେ କାମ କରୁଥିବା ବ୍ୟକ୍ତିତ୍ବ ତଥା ବାଗଚୀ ଦମ୍ପତି ସବୁବେଳେ ଲାଇମ ଲାଇଟରୁ ଦୂରରେ ରହିବାକୁ ପସନ୍ଦ କରନ୍ତି । ପ୍ରତି ବର୍ଷ କୋଟି କୋଟି ଟଙ୍କା ଦାନ କରନ୍ତି ହେଲେ ସୋସିଆଲ ମିଡିଆ, ଲୋକଙ୍କ ଦୃଷ୍ଟି ଆକର୍ଷିତ ହେବାଠୁ ଦୂରରେ ରହିଛନ୍ତି । ଭାରତର ପ୍ରତିଷ୍ଠିତ ଉଦ୍ୟୋଗବିତ୍ ତଥା ସମାଜସେବୀ ସୁବ୍ରତ ବାଗଚୀ ଓ ତାଙ୍କ ପତ୍ନୀ ସୁସ୍ମିତା ବାଗଚୀ ସର୍ବଦା ଶିକ୍ଷା, ସ୍ବାସ୍ଥ୍ୟ ସେକ୍ଟରରେ ଉନ୍ନତି ପାଇଁ କାର୍ଯ୍ୟ କରି ଆସୁଛନ୍ତି ।
