ନୂଆ ସଂସଦ ଭବନ ମାମଲା: ରାଷ୍ଟ୍ରପତିଙ୍କ ଦ୍ବାରା ଉଦଘାଟନ ପ୍ରସ୍ତାବକୁ ଖାରଜ କଲେ ସୁପ୍ରିମକୋର୍ଟ, ଆବେଦନକାରୀଙ୍କୁ କହିଲେ ଏମିତି କଥା…
ନୂଆଦିଲ୍ଲୀ : ନୂତନ ସଂସଦ ଭବନର ଉଦଘାଟନ ମାମଲାରେ ସୁପ୍ରିମକୋର୍ଟରେ ଦାଖଲ ହୋଇଥିବା ପିଟିସନ ଆଜି (ଶୁକ୍ରବାର) ଖାରଜ କରାଯାଇଛି । ସୁପ୍ରିମକୋର୍ଟ ଏହି ପିଆଇଏଲ ଉପରେ ଶୁଣାଣି କରିବାକୁ ମନା କରି ଆବେଦନକାରୀଙ୍କୁ ତାଗିଦ କରିଛନ୍ତି । ସୁପ୍ରିମକୋର୍ଟର ଦୁଇ ଜଣିଆ ଖଣ୍ଡପୀଠ ପିଆଇଏଲ ଦାଖଲ କରିଥିବା ଓକିଲଙ୍କୁ କହିଛନ୍ତି ଯେ ଏହି ପିଟିସନ କାହିଁକି ଦାଖଲ ହୋଇଛି ତାହା ଆମେ ଜାଣୁ । ଏଭଳି ପିଟିସନକୁ ଦେଖିବା ସୁପ୍ରିମକୋର୍ଟଙ୍କ କାମ ନୁହେଁ ।
ସୁପ୍ରିମକୋର୍ଟ ଏହି ମାମଲାର ଶୁଣାଣି ବେଳେ କହିଛନ୍ତି ଯେ, ଆମେ ଏହି ମାମଲାରେ ହସ୍ତକ୍ଷେପ କରିବାକୁ ଚାହୁଁନାହୁଁ । ଯଦି ଆପଣ ଚାହାଁନ୍ତି, ଆପଣ ହାଇକୋର୍ଟ ଯାଇପାରନ୍ତି । ତେବେ ଆବେଦନକାରୀ ଓକିଲ ହାଇକୋର୍ଟ ଯିବା ପରିବର୍ତ୍ତେ ତାଙ୍କ ଆବେଦନ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି । ତେବେ ଆସନ୍ତୁ ଜାଣିବା ପିଆଇଏଲରେ କେଉଁ ଯୁକ୍ତିଗୁଡିକ ସୁପ୍ରିମକୋର୍ଟ ଖାରଜ କରିଛନ୍ତି ଏବଂ ଶୁଣାଣି କରିବାକୁ ମନା କରିଦେଇଛନ୍ତି ।
ସୁପ୍ରିମକୋର୍ଟର ଜଷ୍ଟିସ୍ ଜେ.କେ ମହେଶ୍ୱରୀ ଏବଂ ପିଏସ୍ ନରସିଂହଙ୍କ ଏକ ଖଣ୍ଡପୀଠ ଆବେଦନକାରୀ ଓକିଲ ସିଆର ଜୟା ସୁକିନଙ୍କୁ ପଚାରିଥିଲେ ଯେ, ଏଥିରେ ଆପଣଙ୍କର ଭୂମିକା କ’ଣ ? ଯେଉଁଥିରେ ଓକିଲ କହିଛନ୍ତି ଯେ ରାଷ୍ଟ୍ରପତି ହେଉଛନ୍ତି ସମସ୍ତ ସାଂସଦଙ୍କ ମୁଖ୍ୟ । ସେ ମଧ୍ୟ ମୋର ରାଷ୍ଟ୍ରପତି । ଏହା ଉପରେ ସୁପ୍ରିମକୋର୍ଟ କହିଛନ୍ତି ଯେ ଆପଣ କାହିଁକି ଏପରି ଆବେଦନ କରୁଛନ୍ତି ତାହା ଆମେ ଜାଣୁ । ଧାରା ୩୨ ଅନୁଯାୟୀ ଆମେ ଏହି ଆବେଦନ ଶୁଣିବାକୁ ଇଚ୍ଛୁକ ନୁହଁ ।
ଧାରା ୩୨ ଅନୁଯାୟୀ, ଭାରତର ପ୍ରତ୍ୟେକ ନାଗରିକ ସମ୍ବିଧାନରୁ ପ୍ରାପ୍ତ ମୌଳିକ ଅଧିକାରର କାର୍ଯ୍ୟକାରିତା ପାଇଁ ସୁପ୍ରିମକୋର୍ଟରେ ଆବେଦନ କରିବାର ଅଧିକାର ପାଇଛନ୍ତି । ଏହା ପରେ ଆବେଦନକାରୀ ଓକିଲ ସମ୍ବିଧାନର ଧାରା ୭୯ କୁ ଉଲ୍ଲେଖ କରିଛନ୍ତି । ଧାରା ୭୯ରେ କୁହାଯାଇଛି ଯେ ସଂଘ ପାଇଁ ଏକ ସଂସଦ ହେବ, ଯାହା ରାଷ୍ଟ୍ରପତି ଏବଂ ଦୁଇଟି ଗୃହକୁ ନେଇ ଗଠିତ ହେବ । ଏହା ଉପରେ ସୁପ୍ରିମକୋର୍ଟ ପଚାରିଛନ୍ତି ଯେ ଉଦଘାଟନ ସହିତ ଧାରା ୭୯ କିପରି ଜଡିତ ? ଏହି ପ୍ରଶ୍ନର ଉତ୍ତରରେ ଓକିଲ କହିଛନ୍ତି ଯେ ରାଷ୍ଟ୍ରପତି ସଂସଦର ମୁଖ୍ୟ, ସେ ନୂତନ ସଂସଦ ଗୃହର ଉଦଘାଟନ କରିବା ଉଚିତ୍।
ଏହା ସହିତ, ସିଆର ଜୟା ସୁକିନ୍, ଧାରା ୮୫ ଏବଂ ଧାରା ୮୭ କୁ ଉଲ୍ଲେଖ କରି କହିଛନ୍ତି ଯେ ସଂସଦର ଅଧିବେଶନ ଡାକିବା ପାଇଁ ରାଷ୍ଟ୍ରପତିଙ୍କର ଆଇନଗତ ଅଧିକାର ଅଛି । ଏହା ସହିତ ସେ ସଂସଦରେ ସମ୍ବୋଧିତ କରିଛନ୍ତି । ଓକିଲଙ୍କ ଏହି ଯୁକ୍ତିରେ ସୁପ୍ରିମକୋର୍ଟ ରାଜି ହୋଇନଥିଲେ ଏବଂ ଆବେଦନ ଖାରଜ ହୋଇଯାଇଥିଲା ।
