ନୂଆଦିଲ୍ଲୀ: ଫାଶୀଦଣ୍ଡ ଦେବା ମାମଲାରେ ଇରାନ୍‌ ଶୀର୍ଷରେ ଥିବା ଚର୍ଚ୍ଚା ହୁଏ । ଇସ୍ରାଏଲର ଆକ୍ରମଣ ପରେ ଇରାନ୍‌ରେ ଫାଶୀଦଣ୍ଡ ମାମଲା ଆହୁରି ବୃଦ୍ଧି ପାଇଛି । ସରକାରଙ୍କ ବିରୋଧରେ ସ୍ବର ଉଠାଉଥିବା ଏବଂ ଇସ୍ରାଏଲ ପାଇଁ ଗୁଇନ୍ଦାଗିରି କରୁଥିବା ଲୋକଙ୍କୁ ଫାଶୀ ଦେଇଛି ଇରାନ୍‌ । ଆଉ ଏନେଇ ଚଳିତବର୍ଷ ଜୁନ୍‌ରେ ମାନବାଧିକାର ପରିଷଦର ୫୯ ତମ ଅଧିବେଶନରେ ଚିନ୍ତା ପ୍ରକାଶ ପାଇଥିଲା । କିନ୍ତୁ ଏବେ ଆସିଥିବା ଆଉ ଏକ ନୂଆ ରିପୋର୍ଟକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଫାଶୀ ଦେବା ମାମଲାରେ ଇରାନ୍‌ ଭଳି ଅନ୍ୟ ଏକ ମୁସଲିମ ଦେଶ ସାଉଦି ଆରବ ବହୁ ଆଗରେ ରହିଛି । 

ଜାତିସଂଘର ଏହି ରିପୋର୍ଟ ଅନୁସାରେ, ଇରାନ ୨୦୨୪ରେ ୯୭୫ ଜଣଙ୍କୁ ଫାଶୀଦଣ୍ଡ ଦେଇଛି । କିନ୍ତୁ ସୋମବାର ପ୍ରକାଶ ପାଇଥିବା ଏକ ନୂଆ ରିପୋର୍ଟରୁ ଜଣାପଡ଼ିଛି ଯେ, ଜାନୁଆରୀ ୨୦୧୪ରୁ ଜୁନ ୨୦୨୫ ମଧ୍ୟରେ ସାଉଦି ଆରବ ୧୮୧୬ ଜଣଙ୍କୁ ମୃତ୍ୟୁଦଣ୍ଡ ଦେଇଛି । ଆମନେଷ୍ଟି ଇଣ୍ଟରନ୍ୟାସନାଲ ସାଉଦି ଆରବରେ ମୃତ୍ୟୁଦଣ୍ଡ ସଂଖ୍ୟାରେ ଏକ ଆଶ୍ଚର୍ଯ୍ୟଜନକ ବୃଦ୍ଧି ହୋଇଥିବା ଜାଣିବାକୁ ପାଇଛି ।  ଏଥିରେ  ଡ୍ରଗ୍ସ ସମ୍ବନ୍ଧୀୟ ଅପରାଧରେ ଦୋଷୀ ସାବ୍ୟସ୍ତ ହୋଇଥିବା ଅନେକ ବିଦେଶୀ ନାଗରିକ ମଧ୍ୟ ଅଛନ୍ତି।  ଡ୍ରଗ୍ସ ସହ ଜଡ଼ିତ ଅପରାଧ ପାଇଁ ପ୍ରାୟ ତିନି ଜଣଙ୍କ ମଧ୍ୟରୁ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି । ସେମାନଙ୍କ ମଧ୍ୟରୁ ୭୫ ପ୍ରତିଶତ ବିଦେଶୀ ନାଗରିକ ।

ସାଉଦି ଆରବ କେବଳ ଜୁନ୍ ୨୦୨୫ ରେ ୪୬ ଜଣଙ୍କୁ ମୃତ୍ୟୁଦଣ୍ଡ ଦେଇଛି । ସେମାନଙ୍କ ମଧ୍ୟରୁ ୩୭ ଜଣଙ୍କୁ ନିଶା ସମ୍ବନ୍ଧୀୟ ଅପରାଧ ପାଇଁ ଫାଶୀ ଦିଆଯାଇଛି । ଆମନେଷ୍ଟି ରିପୋର୍ଟ ଅନୁସାରେ, ପ୍ରତିଦିନ ହାରାହାରି ଗୋଟିଏରୁ ଅଧିକ ନିଶା ସମ୍ବନ୍ଧୀୟ ମୃତ୍ୟୁଦଣ୍ଡ ଦିଆଯାଇଛି । 

ନରୱେ ସ୍ଥିତ ଇରାନ ମାନବାଧିକାର (IHRNGO) ଅନୁଯାୟୀ, ୨୦୨୫ ର ପ୍ରଥମ ଚାରି ମାସରେ ଇରାନରେ ପ୍ରାୟ ୩୪୩ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି । ୨୦୨୪ ର ସମାନ ସମୟ ତୁଳନାରେ ୭୫ ପ୍ରତିଶତ ଅଧିକ । ସେତେବେଳେ ଏହି ୪ ମାସ ମଧ୍ୟରେ ୧୯୫ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା । କେବଳ ଏପ୍ରିଲ ମାସରେ ୧୧୦ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି । ଏହି ବର୍ଷ ଏପର୍ଯ୍ୟନ୍ତ ସର୍ବାଧିକ ମାସିକ ଫାଶୀଦଣ୍ଡ । ଇରାନ ଜୁନ୍ ଶେଷ ଭାଗରେ ଇସ୍ରାଏଲ ସହିତ ଜଡିତ ଅନେକ ଲୋକଙ୍କୁ ଫାଶୀ ଦେଇଛି । ଯାହାର ପ୍ରକୃତ ସଂଖ୍ୟା ଏପର୍ଯ୍ୟନ୍ତ ଆସିବାକୁ ବାକି ଅଛି । କିନ୍ତୁ ଉଭୟ ଦେଶ ମୃତ୍ୟୁଦଣ୍ଡ ମାମଲାରେ ଶୀର୍ଷରେ ରହିଛନ୍ତି ।