ପାଟଣାଗଡ,୫।୬ : ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଳକ ପଟାମୁଣ୍ଡା ପଞ୍ଚାୟତ ପାଣ୍ଡେସରା ଗାଁ ର ବିଧବା ବୃଦ୍ଧା ସୁରେଖା ନାଗ ଗତ ଶନିବାର ରାସ୍ତାରେ ଗୁରୁଣ୍ଡି ଗୁରୁଣ୍ଡି ଭତ୍ତା ଆଣିବା ପାଇଁ ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ। ଏହି ଦୃଶ୍ୟ ସାମାଜିକ ଗଣମାଧ୍ୟମରେ ଭାଇରାଲ ପରେ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ଖବର ପ୍ରକାଶ ପରେ ଗତ ରବିବାର ବ୍ଳକ ପ୍ରଶାସନ ତରଫରୁ ପ୍ରଥମେ ବ୍ଳକ ସାମାଜିକ ସୁରକ୍ଷା ଅଧିକାରୀ ଓ ପଟାମୁଣ୍ଡା ସରପଞ୍ଚଙ୍କ ସ୍ବାମୀ ସୁରେଖାଙ୍କ ଘରେ ପହଞ୍ଚିଥିଲେ। ଚଳିତ ମାସ ଠାରୁ ହାତରେ ତାଙ୍କୁ ଭତ୍ତା ଟଙ୍କା ଦିଆଯିବ ବୋଲି ବିଏସଏସଓ ପ୍ରତିଶ୍ରୁତି ଦେଇଥିଲେ।
ଗୁରୁବାର ବିଡ଼ିଓ ସୁମନ୍ତ ମିଞ୍ଜ ସୁରେଖାଙ୍କ ଘରେ ପହଞ୍ଚି ଏକ ହ୍ୱିଲ ଚେୟାର ପ୍ରଦାନ କରିଥିଲେ। ଏଥି ସହ ଅନ୍ତୋଦୟ ଯୋଜନାରେ ଆବାସ ଗୃହ ଯୋଗାଇଦେବା ସହ ତାଙ୍କ ସାଥିରେ ନେଇଥିବା ସ୍ବାସ୍ଥ୍ୟକର୍ମୀ ମାନଙ୍କ ଦ୍ଵାରା ବୃଦ୍ଧାଙ୍କ ସ୍ୱାସ୍ଥ୍ୟବସ୍ଥା ପରୀକ୍ଷା କରି ଆବଶ୍ୟକ ଔଷଧପତ୍ର ଦେଇଥିବା ଜଣାପଡିଛି। ଅପର ପକ୍ଷରେ ଅନ୍ତୋଦୟ ଯୋଜନାରେ ଦିଆଯିବା ଥିବା ଆବାସ ଗୃହ ପାଇଁ ଜାଗା ମଧ୍ୟ ଚିହ୍ନଟ କରିଥିବା ଜଣାପଡିଛି।
