ନୂଆଦିଲ୍ଲୀ,୧୫।୩: ତେଲେଙ୍ଗାନା ପୋଲିସ ରଙ୍ଗା ରେଡ୍ଡୀ ଜିଲ୍ଲାର ଏକ ଫାର୍ମହାଉସରେ ଏକ ବଡ଼ ଧରଣର ଚଢାଉ କରିଛି। କୁହାଯାଉଛି ଯେ, ପୋଲିସ ରାତି ପ୍ରାୟ ସାଢ଼େ ୯ଟା ସମୟରେ ଫାର୍ମହାଉସରେ ପହଞ୍ଚିଥିବା ଜଣାପଡ଼ିଛି। ଅଭିଯୋଗ ହୋଇଛି ଯେ ସେଠାରେ ଉପସ୍ଥିତ ଦିଲ୍ଲୀର ଜଣେ ରିଅଲ୍ ଇଷ୍ଟେଟ୍ ବ୍ୟବସାୟୀ ନମିତ ଶର୍ମା ବନ୍ଧୁକରୁ ଏକ ରାଉଣ୍ଡ ଗୁଳି ଚଳାଇଥିଲେ। ତେବେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତଙ୍କୁ ଗିରଫ କରିଥିଲା।
ପୋଲିସ ତଦନ୍ତରୁ ଜଣାପଡିଛି ଯେ ଲାଇସେନ୍ସପ୍ରାପ୍ତ ବନ୍ଧୁକ ରିତେଶ ରେଡ୍ଡୀଙ୍କର। ରିତେଶ ହେଉଛନ୍ତି ପୂର୍ବତନ ବିଧାୟକ ରୋହିତ ରେଡ୍ଡିଙ୍କ ସାନ ଭାଇ। ପୋଲିସ ଘଟଣାସ୍ଥଳରୁ ଦୁଇ ଗ୍ରାମ ଧଳା ପାଉଡର ମଧ୍ୟ ଜବତ କରିଛି, ଯାହା ନିଶାଦ୍ରବ୍ୟ ବୋଲି ସନ୍ଦେହ କରାଯାଉଛି। ପାର୍ଟିରେ ମୋଟ ୧୧ ଜଣ ଲୋକ ଉପସ୍ଥିତ ଥିଲେ, ଯେଉଁଥିରେ ୧୦ ଜଣ ପୁରୁଷ ଏବଂ ଜଣେ ମହିଳା ଥିଲେ। ଏଥିରେ ପୂର୍ବତନ ବିଧାୟକ ପାଇଲଟ୍ ରୋହିତ ରେଡ୍ଡି ଏବଂ ଟିଡିପିର ଏଲୁରୁ ସାଂସଦ ପୁଟ୍ଟା ମହେଶ କୁମାର, ରିତେଶ ରେଡ୍ଡି, ନମିତ ମିଶ୍ର, ଏମ୍. ରମେଶ, ଶ୍ରବଣ କୁମାର, ବିଜୟ କୃଷ୍ଣ, ରବି ଏବଂ ଅର୍ଜୁନ ରେଡ୍ଡି ମଧ୍ୟ ଉପସ୍ଥିତ ଥିଲେ। ସେଠାରୁ ଧରାପଡିଥିବା ମହିଳାଙ୍କ ପରିଚୟ ଶରିଫ୍ ରେଡ୍ଡୀଙ୍କ ପତ୍ନୀ ଶ୍ରୀଧର ରେଡ୍ଡୀ କିକୋଙ୍କ ରୂପରେ ମିଳିଛି।
ପୋଲିସ କହିଛି ଯେ, ସେମାନେ ସେଠାରେ ମିଳିଥିବା ସମସ୍ତଙ୍କର ଡ୍ରଗ୍ସ ପରୀକ୍ଷା କରିଥିଲେ। ଏଥିରେ ପାଞ୍ଚ ଜଣ ବ୍ୟକ୍ତି ପଜିଟିଭ୍ ବୋଲି ଜଣାପଡିଛନ୍ତି। ଏଥିରେ ରୋହିତ ରେଡ୍ଡୀ, ନମିତ ମିଶ୍ର, ରିତେଶ ରେଡ୍ଡୀ, କୌଶିକ ରବି ଏବଂ ଅର୍ଜୁନ ରେଡ୍ଡୀ ରହିଛନ୍ତି। ଚେଭେଲା ଡିସିପି ଯୋଗେଶ ଗୌତମ କହିଛନ୍ତି ଯେ ଅଧିକ ପରୀକ୍ଷା ପାଇଁ ନମୁନା ପଠାଯାଇଛି। ଫଳାଫଳ ପାଇବା ପରେ, ପୋଲିସ ଆଇନ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏହି ସମ୍ପୂର୍ଣ୍ଣ ମାମଲା ସମ୍ପର୍କରେ କଂଗ୍ରେସ ନେତା ଭି. ହନୁମନ୍ତ ରାଓ କହିଛନ୍ତି ଯେ ସରକାର ଡ୍ରଗ୍ସ ବ୍ୟବହାର ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି।
