ହାଇଦ୍ରାବାଦ,୨୮/୦୨: ତେଲଙ୍ଗାନାର ନାଗରକୁର୍ଣ୍ଣୁଲରେ ନିର୍ମାଣାଧୀନ ଶ୍ରୀଶୈଲମ ଲେଫ୍ଟ ବ୍ୟାଙ୍କ କେନାଲ (ଏସ୍ଏଲ୍ବିସି) ସୁଡ଼ଙ୍ଗର ଏକ ଅଂଶ ଚଳିତମାସ ୨୨ ତାରିଖରେ ଭୁଶୁଡ଼ି ପଡ଼ିଥିଲା । ଏଥିରେ ସେବେଠାରୁ ୮ କର୍ମଚାରୀ ଫସିରହିଛନ୍ତି ସେମାନଙ୍କୁ ସୁରକ୍ଷିତ ଭାବେ ବାହାର କରିବା ପାଇଁ ଉଦ୍ଧାର ଅଭିଯାନ ଚାଲିଛି ।
ତାଜା ତଥ୍ୟ ମୁତାବକ, ଉଦ୍ଧାରକାରୀ ଟିମ୍ଗୁଡ଼ିକ ଫସିରହିଥିବା ଲୋକଙ୍କ ପାଖରେ ପହଞ୍ଚିବା ପାଇଁ ଏବେ ସୁଡ଼ଙ୍ଗ ବୋରିଂ ମେସିନ୍ (ଟିବିଏମ୍) ର ଅଂଶ ଏବଂ ଅନ୍ୟ ପ୍ରତିବନ୍ଧକକୁ କାଟି ରାସ୍ତାରୁ ହଟାଉଛନ୍ତି । ସେହିଭଳି ସୁଡ଼ଙ୍ଗରେ କାମ କରୁଥିବା କିଛି ଶ୍ରମିକ ଭୟରେ କାମ ଛାଡ଼ି ପଳାୟନ କରୁଛନ୍ତି ।
ଏ ନେଇ ଜଣେ ବରିଷ୍ଠ ସରକାରୀ ଅଧିକାରୀ କହିଛନ୍ତି, ଏସ୍ଏଲ୍ବିସି ପ୍ରକଳ୍ପରେ ୮୦୦ ଲୋକ କାମ କରୁଛନ୍ତି । ଏମାନଙ୍କ ମଧ୍ୟରୁ ୩୦୦ ସ୍ଥାନୀୟ ଅଞ୍ଚଳର ଓ ଅନ୍ୟମାନେ ଝାଡ଼ଖଣ୍ଡ, ଓଡ଼ିଶା ଏବଂ ଉତ୍ତର ପ୍ରଦେଶର । ତାଙ୍କ ମୁତାବକ, ଶ୍ରମିକଙ୍କୁ କାମ କରିବାକୁ ଡର ଲାଗିବା ସ୍ୱାଭାବିକ କଥା । ତେବେ କମ୍ପାନି ସେମାନଙ୍କ ପାଇଁ ଆବାସିକ ଶିବିର ନିର୍ମାଣ କରିଛି । କିଛି ଲୋକ ଫେରିଯିବାକୁ ଚାହିଁପାରନ୍ତି । କିନ୍ତୁ ସମସ୍ତେ ଏକସଙ୍ଗେ ଛାଡ଼ି ଯାଉଥିବା ନେଇ ରିପୋର୍ଟ ଆମ ପାଖରେ ନାହିଁ ।
