ନୂଆଦିଲ୍ଲୀ: ଲୋକସଭା ଏବଂ ରାଜ୍ୟସଭାରେ ବହୁମତ ପାଇବା ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମଞ୍ଜୁରୀ ପରେ ୱାକଫ ସଂଶୋଧନ ବିଲ୍ ୨୦୨୫ ମଞ୍ଜୁରୀ ପାଇଲା ଏବଂ ଏହା ଆଇନରେ ପରିଣତ ହେଲା। ଏହି ସମୟରେ ତାମିଲାଗା ଭେଟ୍ରି କାଜଗାମ (ଟିଭି କେ) ଦଳର ସଭାପତି ତଥା ଅଭିନେତା ଥଲାପତି ବିଜୟ ଏହି ନିୟମକୁ ପସନ୍ଦ କରିନାହାଁନ୍ତି। ଏପରି ପରିସ୍ଥିତିରେ, ଅଭିନେତା ଏହି ଆଇନକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି । 

ୱାକଫ (ସଂଶୋଧନ) ଆଇନ ୨୦୨୫କୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଅନେକ ଆବେଦନ ପୂର୍ବରୁ ଦାଖଲ ହୋଇଛି। ଦାବି କରାଯାଇଛି ଯେ ଏହି ଆଇନ ମୁସଲିମ ସମ୍ପ୍ରଦାୟ ସହିତ ପକ୍ଷପାତିତା କରୁଛି ଏବଂ ସେମାନଙ୍କର ମୌଳିକ ଅଧିକାରକୁ ଉଲ୍ଲଂଘନ କରୁଛି । ଏହି ସମୟରେ, ଏବେ ଥଲାପତି ବିଜୟ ମଧ୍ୟ ୱାକଫ (ସଂଶୋଧନ) ଆଇନ ୨୦୨୫କୁ ଚ୍ୟାଲେଞ୍ଜ କରିଛନ୍ତି। ANI ଅନୁଯାୟୀ, ଅଭିନେତା ଏହି ଆଇନ ବିରୋଧରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରିଛନ୍ତି।

ପୂର୍ବରୁ, ପିଟିଆଇ ଅନୁଯାୟୀ, ଥଲାପତି ବିଜୟ ଏକ ବିବୃତ୍ତିରେ ୱାକଫ (ସଂଶୋଧନ) ଆଇନକୁ 'ମୁସଲମାନ ବିରୋଧୀ' ବୋଲି ବର୍ଣ୍ଣନା କରିଥିଲେ। ସେ କହିଛନ୍ତି, 'ସଂସଦର ତଳ ସଦନରେ ପାରିତ ହୋଇଥିବା ବିଲ୍ ପୁଣିଥରେ ସମ୍ବିଧାନର ମର୍ଯ୍ୟାଦା ଏବଂ ଧର୍ମନିରପେକ୍ଷ ଭାରତୀୟ ଗଣତନ୍ତ୍ରର ମୌଳିକ ନୀତି ଉପରେ ପ୍ରଶ୍ନବାଚୀ ଲଗାଇଛି।'

ଥଲାପତି ବିଜୟ ଏହା ମଧ୍ୟ କହିଥଲେ ଯେ, ଟିଭିକେ ଦାବି କରୁଛି ଯେ ସମସ୍ତ ଗଣତାନ୍ତ୍ରିକ ଶକ୍ତିର ସ୍ୱରକୁ ଧ୍ୟାନରେ ରଖି ଗଣତନ୍ତ୍ର ବିରୋଧୀ ବିଲ୍ ତୁରନ୍ତ ପ୍ରତ୍ୟାହାର କରାଯାଉ।' ଯଦି ବିଜେପି ନେତୃତ୍ୱାଧୀନ କେନ୍ଦ୍ର ସରକାର ଏପରି ନ କରନ୍ତି, ତେବେ ଟିଭିକେ ମୁସଲିମ ଭାଇମାନଙ୍କ ସହିତ ସେମାନଙ୍କର ୱାକଫ ଅଧିକାର ପାଇଁ ଆଇନଗତ ଲଢ଼େଇରେ ସାମିଲ ହେବ।