ଆଶ୍ଚର୍ଯ୍ୟ ହେଲେ ବି ସତ, ଆପଣା ଛାଏଁ ଚାଲୁଛି ବାଇକ୍
ମାଲକାନଗିରି/ଚିତ୍ରକୋଣ୍ଡା,୫।୨: ଆଶ୍ଚର୍ଯ୍ୟ ହେଲେ ବି ସତ,ବିନା ଚାଳକରେ ବାଇକଟି ରାତିରେ ଚାଲୁଥିବାର ଜଣାପଡିଛି । ଏମିତି ଏକ ସିସିଟିଭି ଫୁଟେଜ ରବିବାର ମୋବାଇଲ ରୁ ମୋବାଇଲ ଘୁରି ବୁଲୁଛି। ଏପରି ଘଟଣା ଘଟିଛି ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବଜାର ସାହିରେ। ଏଭଳି ଏକ ଅଦ୍ଭୃତ ଦୃଶ୍ୟକୁ ନେଇ ସମଗ୍ର ଚିତ୍ରକୋଣ୍ଡା ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି।
ଚିତ୍ରକୋଣ୍ଡା ସଦର ମହକୁମା ସ୍ଥିତ ଦୈନିକ ବଜାର ମାର୍କେଟର ଚିତ୍ରକୋଣ୍ଡା ପଞ୍ଚାୟତ ଅଫିସ କାର୍ଯ୍ୟାଳୟ ସମ୍ମୁଖରେ ସୁରେନ୍ଦ୍ର ଦାସଙ୍କ ଏକ ଦୋକାନ ରହିଛି। ଗତ କିଛି ଦିନ ହେବ ନିଜ ଦୋକାନ ଘର ମରାମତି ଚାଲିଥିବାରୁ ସୁରେନ୍ଦ୍ର ୩ତାରିଖ ରାତିରେ ନିଜ ଘର ଆଗରେ ଥିବା ସୀତାରାମ ଏଣ୍ଟରପ୍ରାଇଜେସ ନାମକ ଏକ ଦୋକାନ ସମ୍ମୁଖରେ ନିଜ ବାଇକକୁ ହ୍ୟାଣ୍ଡେଲ ଲକ କରି ପାର୍କିଂ କରିଥିଲେ । ୪ ତାରିଖ ସକାଳୁ ଉଠି ଦେଖନ୍ତି ଯେ ନିଜ ମୋଟର ସାଇକେଲଟି କିଛି ଦୂରରେ ପଡି ଯାଇଛି । ଅସାବଧାନତା ହେତୁ ବାଇକଟି ତଳେ ପଡି ଯାଇଛି ଭାବି ପୁଣି ବାଇକକୁ ଉଠାଇ ଯଥା ସ୍ଥାନରେ ରଖିଥିଲେ।
ସେହିଦିନ ରାତିରେ ମଧ୍ୟ ନିଜ ମୋଟର ସାଇକେଲକୁ ସେଇ ସ୍ଥାନରେ ପାର୍କିଂ କରିଥିଲେ। ପୁଣି ୪ତାରିଖ ସକାଳୁ ଉଠି ଦେଖନ୍ତି ଯେ ପୂର୍ବ ଦିନ ଭଳି ମୋଟର ସାଇକେଲଟି ପାର୍କିଂ କରିଥିବା ଜାଗାରୁ କିଛି ଦୂରରେ ପଡିଛି। ବାରମ୍ବାର ଏଭଳି ହେଉଥିବା ଦେଖି ଘଟଣା ସମ୍ପର୍କରେ ସୀତାରାମ ଏଣ୍ଟରପ୍ରାଇଜେସର ମାଲିକ ସୁନୀଲଙ୍କୁ ଘଟଣା ସମ୍ପର୍କରେ କହିଥିଲେ। କିଏ ଜଣେ ଜାଣି ଶୁଣି ଏଭଳି କାମ କରୁଛି ବୋଲି ଭାବି ସୀତାରାମ ଏଣ୍ଟରପ୍ରାଇଜେସରେ ଲାଗିଥିବା ସିସିଟିଭି ଦେଖିଥିଲେ । ସିସିଟିଭିରେ ଘଟଣା ସମୟର ଦୃଶ୍ୟ ଦେଖିବା ପରେ ସମସ୍ତେ ଚକିତ ହୋଇଯାଇଥିଲେ। ବାଇକର ହ୍ୟାଣ୍ଡେଲ ଲକ ଥିବା ସତ୍ବେ ବିନା ଚାଳକରେ ମୋଟରସାଇକେଲଟି ଷ୍ଟାର୍ଟ ହୋଇ କିଛି ଦୂର ଆଗକୁ ଯିବା ସହ ଓଲଟି ପଡୁଥିଲା। ପୂର୍ବ ଦିନ ଭଳି ଦ୍ଵିତୀୟ ଦିନ ମଧ୍ୟ ମୋଟରସାଇକେଲଟି ସେଭଳି ଆଗକୁ ଯାଇ ଓଲଟି ପଡ଼ିଥିଲା। ବିଜ୍ଞାନ ଯୁଗରେ ଏଭଳି ଏକ ଅଦ୍ଭୁତ ଘଟଣା ସମ୍ପର୍କରେ ଚାରିଆଡେ ପ୍ରସାରିତ ହେବା ପରେ ଘଟଣା ସମୟର ଭିଡିଓଟି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ରାତି ପ୍ରାୟ ୧୨ଟା ପରେ ମୋଟରସାଇକେଲ ଆପେ ଆପେ ଚାଲୁଥିବା ଦୃଶ୍ୟ ରହସ୍ୟମୟ ଭଳି ଲାଗୁଥିଲେ ମଧ୍ୟ ସତ । ଏହା କୌଣସି ଭୌତିକ କାଣ୍ଡ କିମ୍ବା ଗୁଣିଗାରେଡି ହୋଇଥାଇ ପାରେ ବୋଲି ଗ୍ରାମବାସୀମାନେ କୁହା କୁହି ହେଉଛନ୍ତି।
