ବଡ଼ବିଲ,୨୩।୫ :ଯୋଡ଼ା ଆଜାଦ୍ ବସ୍ତିରେ ଅଘଟଣ। ମାମୁଁ ଘରକୁ ବୁଲିବାକୁ ଆସିଥିବା ବେଳେ  କୂଅରେ ପଡ଼ିଯିବାରୁ ଶିଶୁପୁତ୍ରର ମୃତ୍ୟୁ ଘଟିଛି।  ମୃତକ ଜଣକ ହେଲେ  ରାଇରଙ୍ଗପୁର ନିବାସୀ ପ୍ରହଲ୍ଲାଦ ଅଗ୍ରୱାଲଙ୍କ ୩ ବର୍ଷର ପୁଅ ଗୋପାଳ ଅଗ୍ରୱାଲ । ଖବର ପାଇ  ଯୋଡ଼ା ପୋଲିସ କୂଅରୁ ମୃତଦେହ ଜବତ କରି ଘଟଣାର ତଦନ୍ତ କରୁଛି। 

ସୂଚନା ଅନୁଯାୟୀ, ଗୋପାଳ ନିଜ ମା'ଙ୍କ ସହ ଯୋଡ଼ା ସ୍ଥିତ ମାମୁଁ ଘରକୁ ଆସିଥିଲେ ।  ଆଜି ମଧ୍ୟାହ୍ନ ସମୟରେ ସୁବାସ ଅଗ୍ରୱାଲଙ୍କ ପରିବାର ଲୋକେ ଘର ଭିତରେ ଥିବାବେଳେ,  ଗୋପାଳ ଘର ଅଗଣାରେ ଏକାକୀ ଖେଳୁଥିଲେ । କିଛି ସମୟ ପରେ ପରିବାର ଲୋକେ ଗୋପାଲକୁ ଦେଖିବାକୁ ନ ପାଇବାରୁ ଏଣେତେଣେ ଖୋଜିଥିଲେ ବି ପାଇ ନଥିଲେ । ପରେ ସନ୍ଦେହ ହେବାରୁ ଅଗଣାରେ ଥିବା କୂଅ ଭିତରକୁ ଦେଖିବା ପରେ ଘଟଣା ଜଣାପଡିଥିଲା । ଶିଶୁ ପୁତ୍ରକୁ ଉଦ୍ଧାର କରିବା ପରେ ନିକଟସ୍ଥ ମେଡିକାଲକୁ ନିଆ ଯାଇଥିଲେହେଁ ସେଠାରେ  ଡାକ୍ତର ମୃତ ଘୋଷଣା କରିଥିଲେ । ସୂଚନା ପାଇ ଯୋଡ଼ା ପୋଲିସ୍ ମୃତ ଦେହକୁ ଜବତ୍ କରି ଶବ ବ୍ୟବଚ୍ଛେଦ କରାଇବା ସହ ତଦନ୍ତ ଜାରୀ ରଖିଛି । ଏହି ଘଟଣା ପରେ ପରିବାର ମଧ୍ୟରେ ଶୋକର ଛାୟା ଖେଳିଯାଇଛି । ପୁଅକୁ ହରାଇ ଶୋକ ସଂତପ୍ତ ପରିବାର ଦୁଃଖରେ ଭାଙ୍ଗି ପଡିଛନ୍ତି ।

ଆହୁରି ପଢନ୍ତୁ : ସ୍କୁଟି ସହ ୧୨ କିଲୋ ଗଞ୍ଜେଇ ଜବତ, ୨ ଗିରଫ