ଗାଁରେ ବାଘ ଆତଙ୍କ, ପୁଣି ଗୁହାଳରୁ ଗାଈକୁ ଟାଣି ନେଇ ଖାଇଲା
ନୂଆପଡ଼ା, ୨।୪: ନୂଆପଡ଼ା ଜିଲ୍ଲା କୋମନା ବ୍ଳକ ବେଲରଦନା ଗାଁରେ ବାଘ ଆତଙ୍କ । ଗତକାଲି ରାତିରେ କଲରା ପତାରିଆ ବାଘ ଗୁହାଳରୁ ଗାଈକୁ ଟାଣି ନେଇ ଖାଇଯାଇଛି । ବେଲରଦନା ଗାଁର ଅର୍ଜୁନ ଧରୁଆଙ୍କ ଗାଈକୁ ଗୁହାଳରେ ବାନ୍ଧି ରଖିଥିଲେ । ଆଜି ସକାଳୁ ଉଠି ଦେଖିବା ବେଳକୁ ଗାଈ ଗୁହାଳରେ ନଥିଲା । ପରିବାର ଲୋକେ ଖୋଜାଖୋଜି କରିବାରୁ ଗାଁ ନିକଟ ବଙ୍ଗାଘାଟି ଜଙ୍ଗଲରେ ଗାଈର ମୃତଦେହ ପଡ଼ିଥିଲା । ତେବେ ପାରିପାର୍ଶ୍ୱିକ ସ୍ଥିତିରୁ ଗାଈକୁ ବାଘ ଶିକାର କରିଥିବା ଗାଁ ଲୋକେ ଅନୁମାନ କରିଛନ୍ତି । ବର୍ତ୍ତମାନ ସୁଦ୍ଧା ଘଟଣା ସ୍ଥଳରେ ବନ ବିଭାଗ ପହଞ୍ଚି ନଥିବା ଗାଁ ଲୋକେ କହିଛନ୍ତି ।
