ନୂଆଦିଲ୍ଲୀ ୨୧/୧୨: ବେଶ୍ ଦୁଃଖଦ ଏବଂ ଯନ୍ତ୍ରଣାମୟ ଥିଲା ବିଦାୟୀ ବର୍ଷ । ଏକାଧିକ ଦୁର୍ଘଟଣା, ବିପର୍ଯ୍ୟୟ ହଜାର ହଜାର ପରିବାରର ଜୀବନ ସବୁଦିନ ପାଇଁ ବଦଳାଇ ଦେଇଥିଲା । କେଉଁଠି ଖୁସିର ମାହୋଲ ହଠାତ୍ ଶୋକରେ ପରିଣତ ହୋଇଥିଲା ତ କେଉଁଠି ଦୈନନ୍ଦିନ ଜୀବନ ଜିଉଁଥିବା ଲୋକେ ଅଚାନକ ଦୁର୍ଘଟଣାର ଶିକାର ହୋଇଥିଲେ । ଛାତି ଥରାଇ ଦେଇଥିଲା ଏୟାର ଇଣ୍ଡିଆ ବିମାନ ଦୁର୍ଘଟଣା । ଲାଲକିଲା ନିକଟରେ କାର୍ ବିସ୍ଫୋରଣ ରାଜଧାନୀ ଦିଲ୍ଲୀକୁ ରକ୍ତରଞ୍ଜିତ କରିଥିଲା । ବର୍ଷ ଶେଷଆଡ଼କୁ ଯନ୍ତ୍ରଣାକୁ ଆହୁରି ତାଜା କରିଥିଲା ଗୋଆ ନାଇଟ୍ କ୍ଲବ୍ ଅଗ୍ନିକାଣ୍ଡ । ଶତାଧିକ ନୀରିହ ଲୋକଙ୍କୁ ଭିଡ଼, ଅବ୍ୟବସ୍ଥା, ଅବହେଳା, ଅଣଦେଖାର ମୂଲ୍ୟ ବଦଳରେ ନିଜ ଜୀବନ ଦେବାକୁ ପଡ଼ିଥିଲା ।
ବିମାନ ସହ ଜଳିଗଲେ ୨୬୦ :
ଦେଶର ସବୁଠୁ ଅନ୍ୟତମ ବଡ଼ ବିମାନ ଦୁର୍ଘଟଣା ଘଟିଥିଲା ଜୁନ୍ ୧୨ରେ । ଅହମଦାବାଦରୁ ଲଣ୍ଡନ ଅଭିମୁଖେ ବାହାରିଥିବା ଏୟାର ଇଣ୍ଡିଆର ବୋଇଂ ବିମାନ ୧୭୧ ଟେକଅଫ୍ କରିବାର କିଛି ସମୟ ଭିତରେ ହିଁ ଦୁର୍ଘଟଣାଗ୍ରସ୍ତ ହୋଇଥିଲା । ବିମାନର ଦୁଇଟି ଯାକ ଇଞ୍ଜିନ ଫେଲ୍ ହୋଇଯିବାରୁ ଏହା ନିକଟରେ ଥିବା ହସ୍ପିଟାଲ ହଷ୍ଟେଲ ବିଲ୍ଡିଂରେ ଧକ୍କା ହୋଇଥିଲା । ଭୟଙ୍କର ଶବ୍ଦ ସହ ବିମାନଟି ବିରାଟ ନିଆଁ ପେଣ୍ଡୁଳାରେ ପରିଣତ ହୋଇଥିଲା । ଏଥିରେ ୨୬୦ ଯାତ୍ରୀ, କ୍ରୁ ସଦସ୍ୟ ଏବଂ ଉକ୍ତ ହଷ୍ଟେଲରେ ଥିବା ଡାକ୍ତରୀ ଛାତ୍ରଛାତ୍ରୀଙ୍କ ମୃତ୍ୟୁ ଘଟିଥିଲା । ବିମାନର ଜଣେ ଯାତ୍ରୀ ହିଁ ସୌଭାଗ୍ୟବଶତଃ ଜୀବନ୍ତ ବର୍ତ୍ତି ଯାଇଥିଲେ । ମୃତ ବିମାନଯାତ୍ରୀଙ୍କ ମଧ୍ୟରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀ ମଧ୍ୟ ଥିଲେ ।
ବିସ୍ଫୋରଣରେ ଥରିଲା ଦିଲ୍ଲୀ :
ନଭେମ୍ବର ୧୦ରେ ଦିଲ୍ଲୀସ୍ଥିତ ଲାଲକିଲା ନିକଟରେ ଏକ କାର୍ ବିସ୍ଫୋରଣ ଜାତୀୟ ରାଜଧାନୀ ସମେତ ପୂରା ଦେଶକୁ ଦୋହଲାଇ ଦେଇଥିଲା । ବିସ୍ଫୋରଣରେ ଅନ୍ୟୁନ ୧୫ ଜଣଙ୍କ ଜୀବନ ଯାଇଥିଲା । ୨୦ରୁ ଅଧିକ ଆହତ ହୋଇଥିଲେ । ତଦନ୍ତରୁ ଏହା ଆତଙ୍କବାଦୀ ଆକ୍ରମଣ ବୋଲି ଜଣାପଡ଼ିଥିଲା । ଏହାର ଲିଙ୍କ୍ ପାକିସ୍ତାନରେ ରହିଥିବା ଏବଂ ସେଠାରୁ ହିଁ ଆତଙ୍କୀ ଆକ୍ରମଣର ଯୋଜନା ହୋଇଥିବା ଜଣାପଡ଼ିଥିଲା । ହରିୟାଣାର ଫରିଦାବାଦରେ ଆତଙ୍କୀ ମଡ୍ୟୁଲ ସହ ଏହାର ଲିଙ୍କ୍ ବାହାରିଥିଲା । ଘଟଣାରେ ଏକ ହାଇ ପ୍ରୋଫାଇଲ ଡାକ୍ତର ଆତଙ୍କୀ ମଡ୍ୟୁଲର ପର୍ଦ୍ଦାଫାଶ ହେବା ପରେ ଅଲଫଲାହ ୟୁନିଭର୍ସିଟିର ଏକାଧିକ ଡାକ୍ତର ଗିରଫ ହୋଇଥିଲେ । କୌଣସି ବୃତ୍ତିଗତ ପେଶାରେ ରହି ସନ୍ଦେହରୁ ବର୍ତ୍ତି ଡାକ୍ତର କର୍ମଚାରୀଙ୍କ ଏଭଳି ଆତଙ୍କୀ ମଡ୍ୟୁଲ ଦେଶର ସୁରକ୍ଷାରେ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି ।
ତିରୁପତି ଦଳାଚକଟା :
ଜାନୁଆରୀ ୮ରେ ଆନ୍ଧ୍ର ପ୍ରଦେଶ ସ୍ଥିତ ତିରୁପତିର ବୈକୁଣ୍ଠ ଦ୍ୱାରା ସର୍ବଦର୍ଶନମଠାରେ ଟୋକନ ବଣ୍ଟନ ବେଳେ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା । ଏହି ସମୟରେ ହଠାତ୍ ଦ୍ୱାର ଖୋଲାହେବାରୁ ଶ୍ରଦ୍ଧାଳୁମାନେ ଦ୍ରୁତଗତିରେ ଆଗକୁ ମାଡ଼ିଚାଲିବା ଫଳରେ ଦଳାଚକଟା ହୋଇଥିଲା । ଏଥିରେ ୭ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିଲା ।
ଶ୍ରୀକାକୁଲମ ମନ୍ଦିର ଦଳାଚକଟା :
ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲ୍ଲା ସ୍ଥିତ ଶ୍ରୀ ଭେଙ୍କଟେଶ୍ୱର ସ୍ୱାମୀ ମନ୍ଦିରରେ ନଭେମ୍ବର ୧ରେ ଦଳାଚକଟା ହୋଇଥିଲା । ଏଥିରେ ୯ ଶ୍ରଦ୍ଧାଳୁ ସେମାନଙ୍କ ଜୀବନ ହରାଇଥିଲେ । ମନ୍ଦିରଟି ନିର୍ମାଣାଧୀନ ଥିବାବେଳେ ଯିବା ଏବଂ ଫେରିବା ପାଇଁ କେବଳ ଗୋଟିଏ ବାଟ ଥିବାରୁ ସେଠାରେ ବହୁସଂଖ୍ୟାରେ ଶ୍ରଦ୍ଧାଳୁ ଜମା ହୋଇଯାଇଥିଲେ । ପରେ ଏହା ଦଳାଚକଟାର ରୂପ ନେଇଥିଲା ।
କରୁର ଦଳାଚକଟା :
ସେପ୍ଟେମ୍ବର ୨୭ରେ ତାମିଲନାଡ଼ୁର କରୁର ଜିଲ୍ଲାରେ ଅଭିନେତା ତଥା ତାମିଲଗା ଭେଟ୍ରି କାଝଗମ୍ (ଟିଭିକେ) ପ୍ରତିଷ୍ଠାତା ବିଜୟ ଏକ ରାଜନୈତିକ ଶୋଭାଯାତ୍ରା ଆୟୋଜନ କରିଥିବା ବେଳେ ଭିଡ଼ ଅନିୟନ୍ତ୍ରିତ ହୋଇପଡ଼ିଥିଲା । ହଜାର ହଜାର ଲୋକ ଅଭିନେତା ବିଜୟଙ୍କୁ ଦେଖିବା ଲାଗି ଉତ୍ସାହିତ ହୋଇପଡ଼ିଥିଲେ । ଫଳରେ ସେଠାରେ ଦଳାଚକଟା ସ୍ଥିତି ଉପୁଜିଥିଲା । ଏଥିରେ ଅନ୍ୟୁନ ୪୧ ଜଣଙ୍କ ମୃତ୍ୟୁ ଘଟିଥିଲା ।
ମହାକୁମ୍ଭ ଦଳାଚକଟା :
ଉତ୍ତରପ୍ରଦେଶର ପ୍ରୟାଗରାଜରେ ବିଦାୟୀ ବର୍ଷରେ ଦୁନିଆର ସବୁଠୁ ବଡ଼ ଧାର୍ମିକ ସମାଗମ ମହାକୁମ୍ଭ ଆୟୋଜିତ ହୋଇଥିଲା । ଗୋଟିଏ ସ୍ଥାନରେ ଏକଜୁଟ ହୋଇଥିଲେ ଲକ୍ଷାଧିକ ଶ୍ରଦ୍ଧାଳୁ । କିନ୍ତୁ ଜାନୁଆରୀ ୨୯ରେ ହୋଇଥିଲା ଭୟଙ୍କର ଦଳାଚକଟା । ଏଥିରେ ୩୦ରୁ ଊଦ୍ଧ୍ୱର୍ ଲୋକଙ୍କ ଜୀବନ ଯାଇଥିଲା । ଏହି ଘଟଣା ଏତେ ବଡ଼ ଆୟୋଜନରେ ସୁରକ୍ଷା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଥିଲା ।
ଦିଲ୍ଲୀ ରେଳ ଷ୍ଟେସନ ଦଳାଚକଟା :
ମହାକୁମ୍ଭ ଦଳାଚକଟା ଘଟଣା ପରେ ଫେବ୍ରୁଆରୀ ୧୫ରେ ଦିଲ୍ଲୀ ରେଳଷ୍ଟେସନରେ ଦଳାଚକଟା ହୋଇଥିଲା । କୁମ୍ଭମେଳା ଲାଗି ପ୍ରୟାଗରାଜ ଯିବାକୁ ଦିଲ୍ଲୀ ରେଳଷ୍ଟେସନରେ ଟ୍ରେନକୁ ଅପେକ୍ଷା କରିଥିବା ଶ୍ରଦ୍ଧାଳୁ ଟ୍ରେନ୍ ମିସ୍ କରିବାରୁ ବର୍ତ୍ତିବା ଲାଗି ଧାଁଦଉଡ଼ କରିଥିଲେ । ଫଳରେ ଦଳାଚକଟା ହୋଇଥିଲା । ଏଥିରେ ଅନ୍ୟୁନ ୧୮ ଜଣ ପ୍ରାଣ ହରାଇଥିଲେ । ସେମାନଙ୍କ ମଧ୍ୟରେ ଅନେକ ମହିଳା ଏବଂ ଶିଶୁ ରହିଥିଲେ ।
ଆରସିବି ବିଜୟ ଉତ୍ସବ ଦଳାଚକଟା :
ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ୨୦୨୫ ବର୍ଷର ଆଇପିଏଲ ଟ୍ରଫି ଜିତିବା ଖୁସିରେ ଜୁନ୍ ୪ରେ ଆୟୋଜନ କରିଥିଲା ବିଜୟ ଉତ୍ସବ । କିନ୍ତୁ ଏହି ବିଜୟ ଉତ୍ସବ ଶୋକରେ ପରିଣତ ହୋଇଥିଲା । ହଜାର ହଜାର ସଂଖ୍ୟାରେ ଆରସିବି ପ୍ରଶଂସକମାନେ ନିଜ ନିଜ ପ୍ରିୟ ଖେଳାଳିଙ୍କୁ ଦେଖିବା ସହ ଖୁସି ମନାଇବାକୁ ସେହି ବିଜୟ ଉତ୍ସବରେ ସାମିଲ ହୋଇଥିଲେ ହେଁ ସେଠାରେ ଭିଡ଼ ନିୟନ୍ତ୍ରଣ ବିଫଳ ହୋଇଥିଲା । ଫଳରେ ଦଳାଚକଟା ଯୋଗୁ ଅକାଳରେ ୧୧ ଜଣଙ୍କ ଜୀବନ ଯାଇଥିଲା । ୫୦ରୁ ଊଦ୍ଧ୍ୱର୍ ଆହତ ହୋଇଥିଲେ ।
ଗୁଜରାଟ ବାଣ କାରଖାନା ବିସ୍ଫୋରଣ :
ଏପ୍ରିଲ ୧ରେ ଗୁଜରାଟର ଦିସାରେ ଥିବା ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ ହୋଇଥିଲା । କାରଖାନା ଭିତରେ ୨୪ ଜଣ ଥିବାବେଳେ ସେମାନଙ୍କ ମଧ୍ୟରୁ ୨୧ ଜଣଙ୍କ ମୃତ୍ୟୁ ଘଟିଥିଲା । ଅତ୍ୟନ୍ତ ଦହନଶୀଳ ଏବଂ ଶସ୍ତା ଆଲୁମିନିୟମ ପାଉଡର ଯୋଗୁ ଅଗ୍ନିକାଣ୍ଡ ଘଟିଥିବା ଜଣାପଡ଼ିଥିଲା ।
କୋଲକାତା ଅଗ୍ନିକାଣ୍ଡ :
କୋଲକାତାର ଋତୁରାଜ ହୋଟେଲରେ ଏପ୍ରିଲ ୨୯ ସନ୍ଧ୍ୟାରେ ଭୟାବହ ଅଗ୍ନିକାଣ୍ଡ ଘଟିଥିଲା । ଏଥିରେ ଅନ୍ୟୁନ ୧୫ ଜଣଙ୍କ ଜୀବନ ଯାଇଥିଲା । ଅଗ୍ନିକାଣ୍ଡରୁ ବର୍ତ୍ତିବାକୁ ଯାଇ କେତେଜଣ କୋଠାରୁ ଡେଇଁ ପଡ଼ିବାରୁ ସେମାନଙ୍କ ମୃତ୍ୟୁ ଘଟିଥିଲା ।
ଗୁଲଜାର ହାଉଜ୍ ନିଆଁ :
ମେ ୧୮ରେ ହାଇଦ୍ରାବାଦ ସ୍ଥିତ ଗୁଲଜାର ହାଉଜରେ ଭୟାବହ ଅଗ୍ନିକାଣ୍ଡ ଘଟିଥିଲା । ଏଥିରେ ୧୭ ଜଣଙ୍କ ମୃତ୍ୟୁ ଘଟିଥିଲା । ମୃତକଙ୍କ ମଧ୍ୟରେ ୮ ଶିଶୁ ଥିଲେ । ସମସ୍ତ ମୃତକ ଗୋଟିଏ ପରିବାରର ଥିଲେ । ସେମାନେ ଏକ ପାରିବାରିକ କାର୍ଯ୍ୟକ୍ରମରେ ଏକାଠି ହୋଇଥିବାବେଳେ ଏହି ଦୁର୍ଘଟଣା ଘଟିଥିଲା ।
