ଦୁବାଇ, ୦୮/୦୩: ଆଇସିସି ପକ୍ଷରୁ ଗତ ଫେବ୍ରୁଆରୀ ମାସର ଶ୍ରେଷ୍ଠ ଖେଳାଳି ପୁରସ୍କାର ପାଇଁ ତାଲିକା ଘୋଷଣା ହୋଇଛି । ଏହି ତାଲିକାରେ ୩ଜଣ ବ୍ୟାଟର ସ୍ଥାନ ପାଇଛନ୍ତି । ସେମାନେ ହେଲେ ଟିମ୍ ଇଣ୍ଡିଆର ଶୁଭମନ ଗିଲ, ଅଷ୍ଟ୍ରେଲିଆର ଷ୍ଟିଭେନ୍ ସ୍ମିଥ୍ ଓ ନ୍ୟୁଜିଲାଣ୍ଡର ଗ୍ଲେନ୍ ଫିଲିପ୍ସ । ଗିଲ୍ ଫେବ୍ରୁଆରୀ ମାସରେ ଇଂଲଣ୍ଡ ବିପକ୍ଷ ୫ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ୧୦୧.୫୦ ଆଭରେଜରେ ମୋଟ ୪୦୬ରନ୍ କରିଥିଲେ । ସେ ୮୭, ୬୦ ଏବଂ ୧୧୨ରନ୍ର ଜବରଦସ୍ତ ଇନିଂସ୍ ଖେଳି ଦଳକୁ ୩-୦ରେ ସିରିଜ ବିଜୟୀ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ ଏବଂ ପ୍ଲେୟାର ଅଫ୍ ଦ ସିରିଜ ବିବେଚିତ ହୋଇଥିଲେ । ଏହାପରେ ସେ ଚାମ୍ପିଅନ୍ସ ଟ୍ରଫିରେ ବାଂଲାଦେଶ ବିପକ୍ଷରେ ୧୦୧, ପାକିସ୍ତାନ ବିପକ୍ଷରେ ୪୬ରନର ଇନିଂସ୍ ଖେଳିଥିଲେ । ଭାରତ ଉଭୟ ମ୍ୟାଚ୍ ଜିତିଥିଲା ।
Three high-class candidates for the ICC Men's Player of the Month award for February 2025 🤔
— ICC (@ICC) March 8, 2025
Cast your vote now 👇https://t.co/T9uPlY7UIZ
ସ୍ମିଥ୍ ଗତ ମାସ ଶ୍ରୀଲଙ୍କା ବିପକ୍ଷ ୨ଟି ଟେଷ୍ଟରେ ଯଥାକ୍ରମେ ୧୪୧, ୧୩୧ରନ୍ର ଦମ୍ଦାର ଇନିଂସ୍ ଖେଳିଥିଲେ ଏବଂ ପ୍ଲେୟାର ଅଫ୍ ଦ ସିରିଜ ପୁରସ୍କାର ପାଇଥିଲେ । ମାତ୍ର ସେ ଦିନିକିଆ ସିରିଜରେ ବିଫଳ (୧୨ ଓ ୨୯ରନ୍) ହୋଇଥିଲେ । ଚାମ୍ପିଅନ୍ସ ଟ୍ରଫି ପ୍ରଥମ ୨ଟି ମ୍ୟାଚ୍ (ଯଥାକ୍ରମେ ୫, ଅପରାଜିତ ୧୯)ରେ ମଧ୍ୟ ନିରାଶ କରିଥିଲେ । ସେହିପରି ଫିଲିପ୍ସ ୫ଟି ଦିନିକିଆ ଖେଳି ୧୨୪.୨୧ ଷ୍ଟ୍ରାଇକ୍ ରେଟ୍ରେ ୨୩୬ରନ୍ କରିଥିଲେ । ସେ ପାକିସ୍ତାନରେ ଆୟୋଜିତ ତ୍ରି-ରାଷ୍ଟ୍ରୀୟ ସିରିଜରେ ଦଳକୁ ଚାମ୍ପିଅନ୍ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । ଚଳିତ ଚାମ୍ପିଅନ୍ସ ଟ୍ରଫିର ପ୍ରଥମ ୨ଟି ମ୍ୟାଚ୍ରେ ସେ ପାକିସ୍ତାନ ବିପକ୍ଷରେ ୬୧ ଓ ବାଂଲାଦେଶ ବିପକ୍ଷରେ ଅପରାଜିତ ୨୧ରନ୍ କରିଥିଲେ । ବ୍ୟାଟିଂ ଅପେକ୍ଷା ଅବିଶ୍ୱସନୀୟ ଫିଲ୍ଡିଂ ପାଇଁ ସମ୍ପ୍ରତି ସେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି ।
