ନୂଆଦିଲ୍ଲୀ: ଥଣ୍ଡାରୁ ରକ୍ଷା ପାଇବା ପାଇଁ ଘରେ ନିଆଁ ଜାଳିଥିଲେ। ହେଲେ କିଏ ଜାଣିଥିଲା ଥଣ୍ଡାରୁ ବଞ୍ଚିବା ପାଇଁ ଲଗାଯାଇଥିବା ନିଆଁ ମୃତ୍ୟୁର କାରଣ ସାଜିବ ବୋଲି। ତେବେ ଉତ୍ତରାଖଣ୍ଡର ଏକ ଗାଁରେ ଦୁଇଜଣ ସ୍ୱାମି ସ୍ତ୍ରୀ ଥଣ୍ଡାରୁ ରକ୍ଷା ପାଇବା ପାଇଁ ଜାଳିଥିବା ନିଆଁ ଯୋଗୁ ଅଣନିଶ୍ୱାସୀ ହୋଇ ମୃତ୍ୟୁବରଣ କରିଥିବା ନେଇ ସୂଚନା ମିଳିଛି।
ଭିଲାନଗନା ଅଞ୍ଚଳର ଥିବା ଦ୍ୱାରି-ଥାଲପା ଗାଁରେ ଗତ ଗୁରିବାର ଦିନ ରାତିରେ କିଛି ଏମିତି ଘଟିଛି। ମୃତ ଦୁଇ ଦମ୍ପତ୍ତିଙ୍କ ନାମ ମଦନ ମୋହନ ସେମୱାଲ ଓ ତାଙ୍କ ପତ୍ନୀ ଯଶୋଦା ଦେବୀ ବୋଲି ଜଣାପଡିଛି। ଉଭୟ ଦମ୍ପତ୍ତି ଗାଁରେ ହେଉଥିବା ନିଜ ସମ୍ପର୍କିୟଙ୍କ ବିବାହ ଉତ୍ସବରେ ଯୋଗ ଦେବାକୁ ଆସିଥିବା ବେଳେ କିଛି ଏପରି ଘଟିଛି।
ଅତ୍ୟଧିକ ଥଣ୍ଡାରୁ ରକ୍ଷା ପାଇବା ପାଇଁ ଗୁରୁବାର ରାତି ପ୍ରାୟ ୧୧ଟା ବେଳେ ଦମ୍ପତ୍ତି ଦ୍ୱୟ ନିଜ ଶୋଇବା ଘରେ ନିଆଁ ଜାଲି ଶୋଇଥିଲେ। ତେବେ ଅଜାଣତରେ ଉଭୟେ ଘରର କବାଟ ବନ୍ଧ କରିଦେଇଥିଲେ। ଯେଉଁଥିପାଇଁ ଅଣନିଶ୍ୱାସୀ ହୋଇ ଉଭୟ ମୃତ୍ୟୁବରଣ କରିଥିବା ନେଇ ସୂଚନା ମିଳିଛି। ତେବେ ଶୁକ୍ରବାର ସକାଳେ ସେମାନଙ୍କ ପୁଅ ସେମାନଙ୍କୁ ଡାକିବାକୁ କବାଟ ବାଡେଇବାରୁ ବିତରୁ କେହି କବାଟ ଖୋଲିନଥିଲେ।
ଭିତରୁ କୌଣସି ପ୍ରତିକ୍ରିୟା ନମିଳିବାରୁ ତାଙ୍କ ପୁଅ ସ୍ଥାନିୟ ଲୋକଙ୍କ ସହାୟତାରେ ଘରର କବାଟ ଭାଙ୍ଗିଥିଲେ। ତେବେ କବାଟ ଭାଙ୍ଗିବା ପରେ ଉଭୟ ଦମ୍ପତ୍ତିଙ୍କ ମୃତ୍ୟୁ ହୋଇଥିବା ଜଣାପଡିଥିଲା। ତେବେ ସ୍ଥାନିୟ ଲୋକ ଏ ସଂକ୍ରାନ୍ତରେ ପୋଲିସକୁ ଖବର ନଦେଇ ମୃତ ଶରୀର ଗୁଡିକର ଅନ୍ତିମ ସଂସ୍କାର କରିଦେଇଥିଲେ।
ସେମୱାଲ ସ୍ଥାନୀୟ ସରକାରୀ ଇଣ୍ଟର କଲେଜରେ କିରାମୀ ଭାବେ କାମ କରୁଥିଲେ। କଲେଜ ଅଧ୍ୟକ୍ଷଙ୍କ ନିକଟରେ ଏ ସଂକ୍ରାନ୍ତିୟ ଖବର ପହଞ୍ଚିବା ପରେ ସେ ଏନେଇ ସ୍ଥାନିୟ ପ୍ରଶାସନ ସହ ପୋଲିସକୁ ଜଣାଇଥିଲେ ବୋଲି ସ୍ଥାନିୟ ପ୍ରଶାସନ ସୂଚନା ପ୍ରଦାନ କରିଛି।
