ନୂଆଦିଲ୍ଲୀ,୫।୬: ଟିଏମସି ସାଂସଦ ମହୁଆ ମୋଇତ୍ରଙ୍କୁ ବିବାହ କଲେ ବିଜେଡିର ପୂର୍ବତନ ସାଂସଦ ପିନାକୀ ମିଶ୍ର । ଉଭୟ ନେତା ଜର୍ମାନୀରେ ବାହା ହେବା ନେଇ ଖବର ମିଳିଛି। ଏନେଇ ଜାତୀୟ ଗଣମାଧ୍ୟମ ‘ଦ ଟେଲିଗ୍ରାଫ’ ରେ ଏକ ରିପୋର୍ଟ ପ୍ରକାଶ ପାଇଛି। ଦୁହେଁ ଗତ ମେ ୩୦ ତାରିଖରେ ଜର୍ମାନୀରେ ବିବାହ କରିଛନ୍ତି। ତେବେ ଏନେଇ ବିଧିବଦ୍ଧ ଭାବେ କିନ୍ତୁ କୌଣସି ଘୋଷଣା କରାଯାଇନି ।
ଉଭୟଙ୍କ ଏକ ଫଟୋ ମଧ୍ୟ ସାମ୍ନାକୁ ଆସିଛି। ଏଥିରେ ମହୁଆ ଓ ପିନାକୀଙ୍କୁ ପାରମ୍ପାରିକ୍ ପୋଷାକରେ ଦେଖିବାକୁ ମିଳିଛି। ଫଟୋରେ ଉଭୟ ପରସ୍ପରର ହାତ ଧରିଛନ୍ତି। ତେବେ ବିବାହ ବିଷୟରେ ଉଭୟଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇ ନାହିଁ। ମହୁଆ ଏବଂ ପିନାକୀ ଉଭୟ ପୂର୍ବରୁ ବିବାହିତ। ମହୁଆ ପୂର୍ବରୁ ଦାନିଶଙ୍କୁ ବିବାହ କରିଥିଲେ । ହେଲେ ତାଙ୍କ ସହ ମହୁଆଙ୍କର ବିବାହ ବିଚ୍ଛେଦ ହୋଇଥିଲା ଏହାପରେ ୩ ବର୍ଷ ଧରି ସେ ଓକିଲ ଅନନ୍ତ ଦେହାଦରାଇଙ୍କ ସହ ମଧ୍ୟ ସମ୍ପର୍କରେ ଥିଲେ । ଅନ୍ୟପଟେ ପିନାକୀଙ୍କ ପ୍ରଥମ ବିବାହ ୧୯୮୫ରେ ସଙ୍ଗୀତା ମିଶ୍ରଙ୍କ ସହିତ ହୋଇଥିଲା। ସେମାନଙ୍କର ଗୋଟିଏ ପୁଅ ଏବଂ ଗୋଟିଏ ଝିଅ ମଧ୍ୟ ଅଛନ୍ତି। ମହୁଆଙ୍କୁ ୫୦ ବର୍ଷ ହୋଇଥିବା ବେଳେ ପିନାକୀଙ୍କୁ ଏବେ ୬୫ ବର୍ଷ। ଉଭୟଙ୍କ ଦ୍ବିତୀୟ ବିବାହକୁ ନେଇ ବଢିଛି ଜୋରଦାର ଚର୍ଚ୍ଚା।
ମହୁଆଙ୍କ ପ୍ରଥମ କାର୍ଯ୍ୟକାଳ ବେଶ ବିବାଦୀୟ ଥିଲା। ତାଙ୍କ ଉପରେ ଟଙ୍କା ନେଇ ପ୍ରଶ୍ନ ପଚାରିବାର ଅଭିଯୋଗ ହୋଇଥିଲା। ମହୁଆ ‘କ୍ୟାସ ଫର୍ କ୍ୱେରୀ’ ମାମଲାରେ ଗମ୍ଭୀର ଭାବରେ ଫସିଥିଲେ। ତାଙ୍କର ଲୋକସଭା ସଦସ୍ୟତା ବାତିଲ କରାଯାଇଥିଲା, ଏହାପରେ ମହୁଆ ସୁପ୍ରିମକୋର୍ଟରେ ନିଷ୍ପତ୍ତିକୁ ଚ୍ୟାଲେଞ୍ଜ କରିଥିଲେ। ମହୁଆଙ୍କ ଉପରେ ତାଙ୍କ ବନ୍ଧୁ ହିରାନନ୍ଦନୀଙ୍କ ସହ ସଂସଦ ଲଗଇନ ଆଇଡି ଏବଂ ପାସୱାର୍ଡ ସେୟାର କରିବାର ମଧ୍ୟ ଅଭିଯୋଗ ହୋଇଥିଲା। ମହୁଆ ଏବେ ତୃଣମୂଳ କଂଗ୍ରେସର ସାଂସଦ ରହିଛନ୍ତି । ଆଉ ଲଗାତାର ଦୁଇଥର ସାଂସଦ ଭାବେ ନିର୍ବାଚିତ ହୋଇଛନ୍ତି । ସେଭଳି ପିନାକୀ ବିଜୁ ଜନତା ଦଳରୁ ୪ଥର ସାଂସଦ ଭାବେ ନିର୍ବାଚିତ ହୋଇଥିଲେ । ୧୯୯୬ ମସିହାରେ ପ୍ରଥମ କରି ସାଂସଦ ହେବା ପରେ, ୨୦୦୯, ୨୦୧୪ ଏବଂ ୨୦୧୯ରେ ପୁରୀରେ ସାଂସଦ ଥିଲେ । ପିନାକୀ ସେଣ୍ଟ ଷ୍ଟିଫେନ କଲେଜରୁ ହିଷ୍ଟ୍ରିରେ ଗ୍ରାଜୁଏସନ୍ କରିବା ପରେ ଦିଲ୍ଲୀ ୟୁନିଭର୍ସିଟିରୁ ଲ’ କରିଥିଲେ। ପିନାକୀ ବିଜେଡିର ଜଣେ ବରିଷ୍ଠ ଓ ଟାଣୁଆ ନେତା ସହ ସୁପ୍ରିମକୋର୍ଟର ଜଣାଶୁଣା ଓକିଲ ଭାବରେ ମଧ୍ୟ ପରିଚିତ।
