ଚନ୍ଦନେଶ୍ଵର, ୬|୭: ଓଡିଶା-ପଶ୍ଚିମବଙ୍ଗ ସୀମାନ୍ତ ଉଦୟପୁର ବେଳାଭୂମିରେ ରବିବାର ଏକ ଅଘଟଣ ଘଟି ଯାଇଛି। ବିହାରର ଭାଗଲପୁର ଓ ପଶ୍ଚିମବଙ୍ଗର ମୋଟ ୮ଜଣ ପର୍ଯ୍ୟଟକ ଗାଧୋଉ ଥିବା ବେଳେ ଅଚାନକ ୪ଜଣ ଭାସି ଯାଇଥିଲେ। ଚିତ୍କାର ଶୁଣି ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଦୀଘା ଷ୍ଟେଟ ଜେନେରାଲ ହସ୍ପିଟାଲକୁ ପଠାଇ ଥିଲେ। ତେବେ ସେଠାରେ ଭାଗଲପୁର ଅଞ୍ଚଳର ଜନୈକ ପର୍ଯ୍ୟଟକଙ୍କର ମୃତ୍ୟୁ ହୋଇଥିବର ବେଳେ ଆଉ ୩ଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ସୂଚନା ମିଳିଛି।
ଥାନାରେ କୌଣସି ସୂଚନା ନଥିବା କଥା ସାମୁଦ୍ରିକ ଥାନା ଅଧିକାରିଣୀ ଚମ୍ପାବତୀ ସୋରେନ ପ୍ରକାଶ କରିଛନ୍ତି। ରାଜ୍ୟର ଅନ୍ୟତମ ପ୍ରମୁଖ ମନୋରମ ବେଳାଭୂମି ବାଲେଶ୍ବର ଜିଲ୍ଲାର ଉଦୟପୁର। ପ୍ରତିଦିନ ବିଭିନ୍ନ ରାଜ୍ୟର ହଜାର ହଜାର ପର୍ଯ୍ୟଟକ ବେଳାଭୂମିରେ ବୁଲିବା ସହିତ ସମୁଦ୍ରରେ ବୁଡ଼ ପକାଇ ଥାନ୍ତି। ରବିବାର ଅବସରରେ ବେଳାଭୂମି ବେଶ ଚଳଚଞ୍ଚଳ ଥିଲା। ଅପରାହ୍ନ ପ୍ରାୟ ୩ଟା ବିହାର ରାଜ୍ୟ ଭାଗଲପୁର ଅଞ୍ଚଳର ୩ ଓ ପଶ୍ଚିମବଙ୍ଗର ୫ଜଣ ଗୋଟିଏ ସ୍ଥାନରେ ଗାଧୋଉ ଥିବା ବେଳେ ଏହି ଅଘଟଣ ଘଟିଥିଲା। ଗୁରୁତ୍ବପୂର୍ଣ୍ଣ ସୂଚନା ହେଉଛି, ଉଦୟପୁର ବେଳାଭୂମିରେ ବେଆଇନ ନିଶା କାରବାର ଦିନକୁ ଦିନ ବଡ଼ି ଚାଲିଛି। ଉଠା ଦୋକାନୀ ମାନେ ପର୍ଯ୍ୟଟକ ମାନଙ୍କୁ ମାଛ ଓ କଙ୍କଡ଼ା ତରକାରୀ ପରଶିବା ସହିତ ମଦ୍ୟପାନର ଖୋରାକ ମଧ୍ୟ ଯୋଗାଇ ଦିଅନ୍ତି। ଯାହା ଫଳରେ ନିଶାଶକ୍ତ ପର୍ଯ୍ୟଟକମାନଙ୍କ କ୍ଷେତ୍ରରେ ବାରମ୍ବାର ଏଭଳି ଘଟୁଥିବା ଲୋକେ ଅଭିଯୋଗ କରନ୍ତି।
