ମାଲକାନଗିରି, ୮।୩(ଆପ୍ର ): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ଦାନ୍ତେୱାଡା ପୋଲିସ ନିକଟରେ ୩ ଲକ୍ଷ ଇନାମି ଦୁଇ ମହିଳା ମାଓବାଦୀଙ୍କ ଆତ୍ମସମର୍ପଣ କରିଛନ୍ତି। ଦୁଇ ମହିଳା ମାଓବାଦୀ ମାଲାଙ୍ଗିର ମାଓ ଏରିଆ କମିଟିରେ ସକ୍ରିୟ ଥିଲେ। ଆତ୍ମସମର୍ପଣ କାରୀ ମହିଳା ମାଓବାଦ ମାନେ ହେଲେ  ମାଓବାଦୀ କୁମାରୀ ଭୀମେ ବେଟ୍ଟି ଓ  କୁମାରୀ ଯୋଗୀ କୁଞ୍ଜମ।

 ଛତିଶଗଡରେ ମାଓ ଦମନ ଲାଗି ପୋଲିସ ପକ୍ଷରୁ କଡା ଆଭିମୁଖ୍ୟ ଗ୍ରହଣ କରାଯାଇଥିବା ବେଳେ ଅନେକ ମାଓବାଦୀ ପୋଲିସର ଆତ୍ମସମର୍ପଣ ନୀତିରେ ଆକର୍ଷିତ ହୋଇ ଏବଂ ମାଓ ସଙ୍ଗଠନ ନୀତି ଆଦର୍ଶ ହରାଉଥିବାରୁ ସାଧାରଣ ଜୀବନ ଜାପାନ ପାଇଁ ପୋଲିସ ନିକଟରେ ଆତ୍ମସମର୍ପଣ କରୁଛନ୍ତି। ମାଲାଙ୍ଗିର ମାଓ ଏରିଆ କମିଟିରେ ସକ୍ରିୟ ଥିବା ଦୁଇ ମହିଳା ମାଓବାଦୀ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ଆତ୍ମସମର୍ପଣ କାରୀ ମହିଳା ମାଓବାଦୀ ମାନେ ହେଲେ ପ୍ଲାଟୁନ ନମ୍ବର ୨୦ର ସଦସ୍ୟା ତଥା ୨ ଲକ୍ଷ ଇନାମି ମାଓବାଦୀ କୁମାରୀ ଭୀମେ ବେଟ୍ଟି ଓ ଏଲଓଏସ ସଦସ୍ୟା ୧ ଲକ୍ଷ ଇନାମି କୁମାରୀ ଯୋଗୀ କୁଞ୍ଜମ। ତେବେ ଭୀମେ ଓଡ଼ିଶାର ମାଲକାନଗିରି ଜିଲ୍ଲା ମାଥିଲି ଥାନା ଅନ୍ତର୍ଗତ ଗୁଗାପଦର ଗ୍ରାମର ବାସିନ୍ଦା ବୋଲି ଜଣାପଡିଛି। ଦାନ୍ତେୱାଡା ପୋଲିସ ଉପ ନିରିକ୍ଷକ କମଳଲୋଚନ କଶ୍ୟପ, ପୋଲିସ ଅଧୀକ୍ଷକ ଦାନ୍ତେୱାଡା ଗୌରବ ରାୟ, ଅତିରିକ୍ତ ପୋଲିସ ଅଧୀକ୍ଷକ ସ୍ମୃତିକ ରାଜନାଲା, ଅତିରିକ୍ତ ପୋଲିସ ଅଧୀକ୍ଷକ ପୂଜା କୁମାର ଏବଂ ଦାନ୍ତେୱାଡାର ଅତିରିକ୍ତ ପୋଲିସ ଅଧୀକ୍ଷକ ରାମକୁମାର ବର୍ମନଙ୍କ ସମ୍ମୁଖରେ ଏହି ଦୁଇଜଣ ଆତ୍ମସମର୍ପଣ କରିଛନ୍ତି। ଆତ୍ମସମର୍ପଣ ନୀତି ଅନୁଯାୟୀ ସେମାନଙ୍କୁ ଥଇଥାନ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି।