ରାଉରକେଲା/ନୂଆଗାଁ, ୩୦ା୩(ବ୍ୟୁରୋ/ଆପ୍ର): ଅସହ୍ୟ ଗରମରୁ ରକ୍ଷା ପାଇବାକୁ ସ୍ନାନ କରୁଥିବାବେଳେ କୋଏଲ୍ ନଦୀରେ ଘଟିଛି ବଡ଼ ଅଘଟଣ । ଭଉଁରୀରେ ଫସିଯିବାରୁ ଦୁଇ ବନ୍ଧୁଙ୍କ ଜୀବନ ଯାଇଛି । ରାଉରକେଲା ଉପକଣ୍ଠ ତଥା ବିଶ୍ରା ଥାନା ଅନ୍ତର୍ଗତ କେର୍କେଟା ଘାଟରେ ରବିବାର ଅପରାହ୍ଣରେ ଘଟିଛି ଏହି ଦୁଃଖଦ ଘଟଣା । ମୃତକ ହେଲେ ଆଶୀର୍ବାଦ ବାରିକ (୧୮) ଏବଂ ପ୍ରଦୀପ ତରାଇ (୧୯) । ଅନ୍ୟ ଦୁଇ ସାଙ୍ଗ ଅଳ୍ପକେ ବର୍ତ୍ତି ଯାଇଛନ୍ତି ।
ସେକ୍ଟର-୧୭ ଅନ୍ତର୍ଗତ କ୍ୱାର୍ଟର୍ସ ନଂ. ବି/୧୭୭ରେ ରହୁଥିବା ଯତୀନ୍ଦ୍ର କୁମାର ତରାଇଙ୍କ ପୁଅ ପ୍ରଦୀପ ଓ ସେକ୍ଟର-୮ ଶନି ମନ୍ଦିର ବସ୍ତିର ଦେବେନ୍ଦ୍ର ବାରିକଙ୍କ ପୁଅ ଆଶୀର୍ବାଦ ଅନ୍ୟ ଦୁଇ ସାଙ୍ଗଙ୍କ ସହ ଅପରାହ୍ଣ ସାଢ଼େ ୩ଟାରେ କୋଏଲ ନଦୀର କେର୍କେଟା ଘାଟକୁ ଗାଧୋଇବାକୁ ଯାଇଥିଲେ । ତେବେ ଗାଧୋଇବାବେଳେ ପ୍ରଦୀପ ଏବଂ ଆଶୀର୍ବାଦ ଭଉଁରୀରେ ପଡ଼ିଯାଇ ଗଭୀର ପାଣିରେ ବୁଡ଼ି ଯାଇଥିଲେ । ଅନ୍ୟ ଦୁଇ ସାଙ୍ଗ ଚିତ୍କାର କରିବାରୁ ସେଠାରେ ଥିବା ଜଣେ ମତ୍ସ୍ୟଜୀବୀ ପ୍ରଦୀପଙ୍କୁ ଉଦ୍ଧାର କରିଥିଲେ । ଚେତାଶୂନ୍ୟ ଅବସ୍ଥାରେ ତାଙ୍କୁ ଇସ୍ପାତ ଜେନେରାଲ ହସ୍ପିଟାଲ (ଆଇଜିଏଚ୍)ରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଗ୍ନ ିଶମ କର୍ମଚାରୀ ଖୋଜାଖୋଜି କରି ପ୍ରାୟ ୧ ଘଣ୍ଟା ପରେ ଆଶୀର୍ବାଦଙ୍କୁ ଠାବ କରିଥିଲେ । ଆଇଜିଏଚ୍ରେ ତାଙ୍କୁ ମଧ୍ୟ ଡାକ୍ତର ମୃତ ଘୋଷଣା କରିଥିଲେ । ମୃତଦେହ ଆଇଜିଏଚ୍ ଶବାଗାରରେ ରଖାଯାଇଛି । ପ୍ରଦୀପ ଓ ଆଶୀର୍ବାଦ ପରିବାରର ଏକ ମାତ୍ର ପୁଅ ଥିଲେ । ଦୁହିଁଙ୍କ ଏଭଳି ଅକାଳ ମୃତ୍ୟୁରେ ପରିବାର ଲୋକେ ଭାଙ୍ଗି ପଡ଼ ିଛନ୍ତି । କାନ୍ଦବୋବାଳିରେ ଡାକ୍ତରଖାନା ପରିସର ଫାଟିପଡୁଛି । ସୋମବାର ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ପୁଲିସ୍ କହିଛି । ସୂଚନାଯୋଗ୍ୟ, କୋଏଲ ନଦୀରେ ସ୍ନାନ ବିପଦସଙ୍କୁଳ ହେଉଛି । ଗତବର୍ଷ ନଭେମ୍ବରରେ ଜାମସେରା ଘାଟରେ ବୁଡ଼ ିଯାଇ ଦୁଇ ଜଣଙ୍କ ମୃତ୍ୟୁ ଘଟିଥିଲା । ନଦୀଘାଟରେ ସୁରକ୍ଷା ବ୍ୟବସ୍ଥା କଡ଼ାକଡ଼ ି କରିବାକୁ ସାଧାରଣରେ ଦାବି ହେଉଛି
