ଉଦୟପୁର,୭।୨: ହ୍ରଦର ସହର ଉଦୟପୁରରୁ ଆସିଛି ବଡ ଖବର। ହିନ୍ଦୁବାଦୀ ସଂଗଠନ ବଜରଙ୍ଗ ଦଳର ପଦାଧିକାରୀ ରାଜୁ ପରମାରଙ୍କୁ ହତ୍ୟା କରାଯାଇଛି। ଆକ୍ରମଣକାରୀ ରାଜୁଙ୍କ ମୁଣ୍ଡକୁ ଖୁବ୍ ନିକଟରୁ ୩ଟି ଗୁଳି ମାରିଥିଲା। ଫଳରେ ରାଜୁ ପରମାରଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। ଏହି ଘଟଣା ସୋମବାର ସନ୍ଧ୍ୟାରେ ଘଟଣା ଘଟିଛି। ହତ୍ୟାକାଣ୍ଡ ପରେ ପୁରା ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି। କୁହାଯାଉଛି ଯେ, ରାଜୁ ପରମାରଙ୍କ ଜମିଜମା ସମ୍ପର୍କୀତ ମାମଲାକୁ ନେଇ ପୂର୍ବରୁ ବିବାଦ ଥିଲା। ତେଣୁ ସନ୍ଦେହ କରାଯାଉଛି ଜମିଜମା ବିବାଦ କାରଣରୁ ରାଜୁଙ୍କୁ ହତ୍ୟା କରାଯାଇଛି।

ମିଳିଥିବା ସୂଚନା ଅନୁସାରେ, ସୋମବାର ସନ୍ଧ୍ୟାରେ ଅମ୍ବାମାତା ଥାନା ଅନ୍ତର୍ଗତ ରାମପୁରା ଏକଲିଙ୍ଗ ନାଥ ଗାର୍ଡେନ ପାଖରେ ରାଜୁ ପରମାରଙ୍କୁ ଦୋକାନ ବାହାରକୁ ଡକାଯାଇଥିଲା।ଏହାପରେ ଆକ୍ରମଣକାରୀ ଖୁବ୍‌ ନିକଟରୁ ତାଙ୍କ ମୁଣ୍ଡକୁ ୩ ରାଉଣ୍ଡ ଗୁଳି କରିଥିଲା। ପରିବାର ଲୋକ ଅନ୍ୟ ବ୍ୟକ୍ତିମାନେ ରାଜୁଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ, କିନ୍ତୁ ଡାକ୍ତର ତାଙ୍କୁ ମୃତ ଘୋଷିତ କରିଥିଲେ। ପରିବାର ଲୋକ ଅଭିଯୁକ୍ତର ତୁରନ୍ତ ଗିରଫ କରିବା ନେଇ ଦାବି କରିଛନ୍ତି।

ଘଟଣାର ସୂଚନା ମିଳିବା ମାତ୍ରେ ଆଡିସନାଲ ଏସପି ଚନ୍ଦ୍ରଶୀଳ ଠାକୁର, ଡିଏସପି, ଥାନା ଅଧିକାରୀ ଓ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚିଛନ୍ତି। ଏହା ସହିତ ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ମଧ୍ୟ ଚେକ୍ କରାଯାଉଛି। ସିସିଟିଭି ଫୁଟେଜ୍‌ରେ ଦୁଇଜଣ ଯୁବକ ଚାଲିଚାଲି ଯାଉଥିବା ଦେଖାଯାଉଛନ୍ତି। ଏଭଳି ସ୍ଥିତିରେ ପୋଲିସ ଆଶଙ୍କା କରୁଛି ଏହି ଦୁଇ ଜଣ ତାଙ୍କୁ ହତ୍ୟା କରିଥାଇ ପାରନ୍ତି। ସିସିଟିଭି ଫୁଟେଜ୍ ଆଧାରରେ ତଦନ୍ତ କରାଯାଉଛି।