ଭୁବନେଶ୍ୱର,୨୫/୦୯: ୧ ନମ୍ବର ହାଟ ଜାଗାରେ ସୁପର ମାର୍କେଟ କମ୍ପେ୍ଲକ୍ସ ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଣ୍ଟା ଭିଡ଼ିଛି । ଖୁବ୍ଶୀଘ୍ର ବିଏମସି ଟେଣ୍ଡର ଡାକିବାକୁ ପ୍ରସ୍ତୁତ ହେଉଥିବାବେଳେ କଣ୍ଟା ହେଲେଣି ପରିବା ବ୍ୟବସାୟୀ । ଟେଣ୍ଡର ଖବର ପାଇଁ ତାତି ଉଠିଛି କଞ୍ଚା ପରିବା ବ୍ୟବସାୟୀ ମହାଜନ ସଂଘ ।
ସଂଘର ସଦସ୍ୟମାନେ କହିଛନ୍ତି, ପ୍ରଥମେ ଆମକୁ ଥଇଥାନ କର । ଆମ ପାଇଁ ଭଗବାନପୁରରେ ଯେଉଁ ମାର୍କେଟ କରିବା କଥା, ସେଇଟା ଆଗେ କର । ତା’ପରେ ଆମେ ଏଠି ହଟିବୁ । ନ ହେଲେ ହଟିବାର ପ୍ରଶ୍ନ ଉଠୁନି । ଇଞ୍ଚେ ଜମି ଛାଡ଼ିବୁନି । ପରିସ୍ଥିତି ଯାହା ହେବ, ସେଥିପାଇଁ ବିଏମସି ଦାୟୀ ରହିବ ।
ସଂଘର ଏଭଳି ଚେତାବନୀ ପରେ ବିଏମ୍ସିର ଚିନ୍ତା ବଢ଼ିଲାଣି । ବିଏମସି ଆଗେଇବ ନା ଡରରେ ପଛାଇବ, ତାହାକୁ ନେଇ ପ୍ରଶ୍ନ ଉଠିଲାଣି । କିନ୍ତୁ ବିଏମସି ଅଧିକାରୀମାନେ ସଫା କହିଛନ୍ତି, ବହୁତ ବିଳମ୍ବ ହୋଇଗଲାଣି । ଏବେ ଆଉ କିଛି ଶୁଣିବୁନି । ୟୁନିଟ-୧ରେ ଯେମିତି ହେଉ ସୁପର ମାର୍କେଟ କମ୍ପେ୍ଲକ୍ସ ହେବ । ସେଥିପାଇଁ ଯାହା ଦରକାର କରାଯିବ ।
ସଂଘ ସଭାପତି କବିରାଜ ସ୍ୱାଇଁ କହିଛନ୍ତି, ଭଗବାନପୁରରେ ପ୍ରସ୍ତାବିତ ହୋଲସେଲ ପରିବା ମାର୍କେଟ ପ୍ରକଳ୍ପ କାମ ଶୀଘ୍ର ସାରିବା ଦରକାର । ପରିବା ବ୍ୟବସାୟୀଙ୍କୁ ଆନୁଷଙ୍ଗିକ ସୁବିଧା ସୁଯୋଗ ଯୋଗାଇ ଦିଅ । ଯେ ପର୍ଯ୍ୟନ୍ତ ଭଗବାନପୁରରେ ହାଟ ପ୍ରକଳ୍ପ ସରିନି, ୟୁନିଟ-୧ ମାର୍କେଟ କମ୍ପେ୍ଲକ୍ସ ପାଇଁ ଇଞ୍ଚେ ଜାଗା ଛାଡ଼ିବୁନି ।
ସେ କହିଛନ୍ତି ଯେ, ଦୀର୍ଘ ୪୦ ବର୍ଷ ଧରି ପରିବା ବ୍ୟବସାୟୀମାନେ ବ୍ୟବସାୟ କରି ଆସୁଛନ୍ତି । ଭଗବାନପୁରରେ ୧୦ ଏକର ଜାଗାରେ ମାର୍କେଟ କରିବା ପାଇଁ ବିଏମ୍ସି ପ୍ରତିଶ୍ରୁତି ଦେଲା । ହେଲେ ଆଜି ପର୍ଯ୍ୟନ୍ତ ସେଠାରେ ଇଟା ଖଣ୍ଡେ ପଡ଼ିପାରିଲା ନାହିଁ । ବିଏମ୍ସି ଜାଣି ଶୁଣି କାମ କରୁନି । ଏପରି ପରିସ୍ଥିତିରେ ଯଦି ହାଟ ଉଚ୍ଛେଦ କରାଯାଏ ଆମେ କରିବୁ କ’ଣ? ତେଣୁ ବିଏମ୍ସି ପ୍ରଥମେ ଥଇଥାନ କରୁ । ଯେ ପର୍ଯ୍ୟନ୍ତ ଆମ ପାଇଁ ଭଗବାନପୁର ହାଟ ନିର୍ମାଣ ହୋଇନି ସେ ପର୍ଯ୍ୟନ୍ତ ନୂତନ ପ୍ରକଳ୍ପକୁ ବିରୋଧ ଜାରି ରହିବ ।
ୟୁନିଟ-୧ ହାଟ ପ୍ରକଳ୍ପକୁ ନେଇ ରାଜନୀତି ତେଜିଛି । ମାର୍କେଟ ଆବଣ୍ଟନକୁ ନେଇ ଦୀର୍ଘଦିନ ଧରି ଚାଲି ଆସୁଥିବା ଗଫଲତି ପଦାକୁ ଆସିବା ଭୟ ଏବେ ଘାରିଛି । ଏକାଧିକ ଜାଗାକୁ ସବ୍-ଲେଟିଂ କରି ବିକ୍ରି କରାଯାଇଛି । ବିଏମ୍ସିର କିଛି ଅଧିକାରୀଙ୍କ ସଲାସୁତୁରାରେ ହାଟ କେଳେଙ୍କାରୀ ଚାଲିଛି । କିନ୍ତୁ ବିଏମ୍ସି ସବୁ ଜାଣି ଚୁପ୍ ବସିଛି ।
ଅନ୍ୟପକ୍ଷରେ ୟୁନିଟ-୧ ହାଟ ବ୍ୟବସାୟୀ ସଂଘ ସଭାପତି ଗୟାଧର ସ୍ୱାଇଁ କହିଛନ୍ତି ଯେ ବ୍ୟବସାୟୀମାନେ ଅସୁବିଧାର ସମ୍ମୁଖୀନ ହେଉଛନ୍ତି । ହାଟ ପ୍ରକଳ୍ପ କାର୍ଯ୍ୟ ବିଏମ୍ସି ତୁରନ୍ତ ଆରମ୍ଭ କରୁ । ଏହା ଦ୍ୱାରା ବ୍ୟବସାୟୀମାନେ ଉପକୃତ ହେବେ ।
