ନୂଆପଡ଼ା ୧୭।୫ : ନୂଆପଡ଼ା ଜିଲ୍ଲା ଜୋଙ୍କ ଥାନା ଖରିଆର ରୋଡ଼ ରେଲୱେ ଷ୍ଟେସନ ନିକଟରୁ ଏକ ଅଜଣା ମୃତଦେହକୁ କଣ୍ଟାବାଞ୍ଜି ଜିଆରପି ଉଦ୍ଧାର କରିଛି। ମୃତଦେହ ଚିହ୍ନଟ ହୋଇନଥିବାରୁ ବ୍ୟବଚ୍ଛେଦ ହୋଇନାହିଁ । ଗତକାଲି ସନ୍ଧ୍ୟାରେ ଖରିଆର ରୋଡ଼ ରେଲୱେ ଷ୍ଟେସନ ନିକଟରେ ଜଣେ ଅଜଣା ବ୍ୟକ୍ତି ଆଶ୍ରୟ ନେଇଥିଲେ। ଗତ କିଛି ଦିନ ହେବ ଖରିଆର ରୋଡ଼ ସହରରେ ଭିକ୍ଷା ବୃତ୍ତି କରି ପେଟ ପୋଷୁଥିଲେ। ସେ ରୋଗୀଣା ହୋଇ ଜରାଜୀର୍ଣ୍ଣ ଅବସ୍ଥାରେ ଥିଲେ। ରାତିରେ ଷ୍ଟେସନ ପରିସରରେ ଅଜଣା ବ୍ୟକ୍ତିଙ୍କ ମୃତ୍ୟୁ ହୋଇଥିଲା । ଆଜି ସକାଳେ ଅଜଣା ବ୍ୟକ୍ତିଙ୍କ ମୃତଦେହ ଷ୍ଟେସନର ସାମଗ୍ରୀ ପରିବହନ ହେଉଥିବା ସ୍ଥାନରେ ମୃତଦେହ ପଡିଥିଲା। ଏନେଇ ସ୍ଥାନୀୟ ଲୋକେ ରେଲୱେ ପୁଲିସକୁ ଖବର ଦେଇଥିଲେ ।
ଆଜି ମଧ୍ୟାହ୍ନରେ କଣ୍ଟାବାଞ୍ଜି ସରକାରୀ ରେଲୱେ ପୁଲିସ(ଜିଆରପି) ପୋଷ୍ଟ ଏଏସଆଇ ମହେଶ୍ବର ପ୍ରଧାନଙ୍କ ନେତୃତ୍ୱରେ ଏକ ପୁଲିସ ଟିମ ରେଲୱେ ଷ୍ଟେସନରେ ପହଞ୍ଚି ମୃତଦେହକୁ ଜବତ କରିଥିଲେ। ତେବେ ମୃତଦେହର ପରିଚୟ ଚିହ୍ନଟ ହୋଇ ନଥିବାରୁ ଜିଲ୍ଲା ମୁଖ୍ୟ ଚିକିତ୍ସାଳୟ ଶବଗୃହରେ ଫ୍ରିଜରରେ ରଖା ଯାଇଛି। ବହୁ ପୂର୍ବରୁ ଅଜଣା ବ୍ୟକ୍ତିଙ୍କ ବାମ ହାତ କହୁଣୀ ଉପରୁ କାଟି ଯାଇଥିବା ବେଳେ ବାମ ଗୋଡ଼ ଆଙ୍ଗୁଳି କଟି ଯାଇଛି। ସେ ଛତିଶଗଡ଼ ରାଜ୍ୟ ବିଳାସପୁର ଅଞ୍ଚଳର ବୋଲି ସ୍ଥାନୀୟ ଲୋକେ କହିଛନ୍ତି । ମୃତ ବ୍ୟକ୍ତିଙ୍କ ପରିବାର ଲୋକେ ଆସି ମୃତଦେହକୁ ନେବାକୁ ଜିଆରପି ଏଏସଆଇ ଶ୍ରୀ ପ୍ରଧାନ ଅନୁରୋଧ କରିଛନ୍ତି।
