UPSC ରେ ଦେଶ ପାଇଁ ଗୌରବ ଆଣିଲେ ଜମ୍ମୁକାଶ୍ମୀର ଆତଙ୍କ ପ୍ରଭାବିତ ଜିଲ୍ଲାର ଛାତ୍ର, ଟପ୍ ୧୦ ତାଲିକାରେ ଅଛନ୍ତି ସାମିଲ୍…
ନୂଆଦିଲ୍ଲୀ: UPSC ୨୦୨୨ ସିଭିଲ ସର୍ଭିସ ପରୀକ୍ଷଣର ଫଳାଫଳ ମଙ୍ଗଳବାର ଘୋଷଣା ହୋଇଛି । ଏହି ଫଳାଫଳରେ ଇଶିତା କିଶୋର ପ୍ରଥମ ସ୍ଥାନ ହାସଲ କରିଛନ୍ତି । ଏହି ପ୍ରତିଷ୍ଠିତ ପରୀକ୍ଷାରେ ଗରିମା ଲୋହିଆ ଏବଂ ଉମା ହରତି ଏନ ଯଥାକ୍ରମେ ଦ୍ୱିତୀୟ ଏବଂ ତୃତୀୟ ସ୍ଥାନ ଅଧିକାର କରିଛନ୍ତି । ୟୁପିଏସସି କହିଛି ଯେ ୯୩୩ ପ୍ରାର୍ଥୀ ସିଭିଲ ସର୍ଭିସ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି । ତେବେ ସବୁଠାରୁ ବଡ କଥା ହେଉଛି ଜାମ୍ମୁ କାଶ୍ମୀରର ଛାତ୍ରମାନେ ମଧ୍ୟ ୟୁପିଏସ୍ସିର ଟପ୍ପର ତାଲିକାରେ ସାମିଲ୍ ଅଛନ୍ତି ।
ସୂଚନାଥାଉକି, ଆତଙ୍କ ପ୍ରଭାବିତ ଜାମ୍ମୁ କାଶ୍ମୀରର ଅନନ୍ତନାଗ ଜିଲ୍ଲାର ବାସିନ୍ଦା ୱାସିମ ଅହମ୍ମଦ ଭଟ ସପ୍ତମ ସ୍ଥାନ ହାସଲ କରିଛନ୍ତି । ସେହିଭଳି ପୁଞ୍ଚ ଜିଲ୍ଲାର ପ୍ରସନ୍ନଜିତ କୌର ଏହି ପରୀକ୍ଷାରେ ୧୧ ତମ ସ୍ଥାନ ହାସଲ କରିଛନ୍ତି । ୱାସିମ ଅହମ୍ମଦ ଭଟ UPSC ସିଭିଲ ସର୍ଭିସ ପରୀକ୍ଷା ୨୦୨୦ ରେ ୨୨୫ ତମ AIR ପ୍ରାପ୍ତ କରିଥିଲେ । ସେ ବର୍ତ୍ତମାନ ମୁମ୍ବାଇରେ ନିଯୁକ୍ତ ଅଛନ୍ତି । ୱାସିମ ଅହମ୍ମଦଙ୍କର ଏହା ତୃତୀୟ ପ୍ରୟାସ ଥିଲା ।
ସେ ଶ୍ରୀନଗରର ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରୁ ବି.ଟେକ୍ କରିଛନ୍ତି । ୨୪ ବର୍ଷିୟ ୱାସିମ୍ ଆନ୍ଥ୍ରୋପୋଲୋଜି ବହି ପଢିବା ଏବଂ ସାଇ-ଫାଇ ଟିଭି ସୋ ଦେଖିବା ପାଇଁ ଭଲ ପାଆନ୍ତି । ତାଙ୍କର ଇଚ୍ଛାଧୀନ ବିଷୟ ଥିଲା ଆନ୍ଥ୍ରୋପୋଲୋଜି । ଅନ୍ୟପକ୍ଷରେ, ଏକାଦଶ ମାନ୍ୟତା ପାଇଥିବା ୨୪ ବର୍ଷୀୟ ପ୍ରସନ୍ନଜିତ୍ କୌର ଜାମ୍ମୁ ବିଶ୍ୱବିଦ୍ୟାଳୟରୁ ବିଏସସି ଏବଂ ଏମଏସସି କରିଛନ୍ତି । ଏହା ତାଙ୍କର ପ୍ରଥମ ପ୍ରୟାସ ଥିଲା । ପୁଞ୍ଚ ଜିଲ୍ଲାର ବାସିନ୍ଦା କୌର ପିଲାମାନଙ୍କୁ ଶିକ୍ଷା ଦେବାକୁ ଭଲ ପାଆନ୍ତି । ତାଙ୍କର ଇଛାଧିନ ବିଷୟ ଥିଲା ପ୍ରାଣୀ ବିଜ୍ଞାନ ।
