ବଦଳିବ ୟୁପିଏସ୍ସି ନିୟମ, ଯୋଗ୍ୟତା ତାଲିକାରେ ନଥିଲେ ବି ଚାକିରୀ
source:manavrachna.edu.in
ଭୁବନେଶ୍ୱର,୫ା୨(ବ୍ୟୁରୋ): ବଦଳିବ କେନ୍ଦ୍ରୀୟ ଲୋକସେବା ଆୟୋଗ (ୟୁପିଏସ୍ସି) ନିୟମ । ସହଜ ଓ ସରଳ ହେବ ଆୟୋଗର ସର୍ତ୍ତାବଳୀ । ଭୁବନେଶ୍ୱରରେ ଅନୁଷ୍ଠିତ ୟୁପିଏସ୍ସି ଓ ବିଭିନ୍ନ ରାଜ୍ୟର ପିଏସ୍ସି ଅଧ୍ୟକ୍ଷଙ୍କ ଦୁଇ ଦିନିଆ ସମ୍ମିଳନୀ ଉଦ୍ଯାପନୀ ଉତ୍ସବରେ ଏହି ମତ ପ୍ରକାଶ ପାଇଛି । ପ୍ରସ୍ତାବ ଅନୁସାରେ ସିଭିଲ୍ ସର୍ଭିସ୍ ପରୀକ୍ଷାରେ କୃତକାର୍ଯ୍ୟ ହୋଇ ମଧ୍ୟ ଯୋଗ୍ୟତା ତାଲିକାରେ ରହୁନଥିବା ପରୀକ୍ଷାର୍ଥୀମାନେ ଅନ୍ୟ ଚାକିରି ପାଇଁ ଆଉ ୟୁପିଏସ୍ସି ପରୀକ୍ଷା
ଦେବାକୁ ପଡିବନି । ଗୋଟିଏ ପରୀକ୍ଷାରୁ ସଫଳ ପରୀକ୍ଷାର୍ଥୀଙ୍କ ତାଲିକା ପ୍ରକାଶ କରିବ ୟୁପିଏସ୍ସି । ଫଳରେ ସିଭିଲ୍ ସର୍ଭିସ୍ ଯୋଗ୍ୟତା ତାଳିକାରେ ନ ରହିଲେ ମଧ୍ୟ କୃତକାର୍ଯ୍ୟ ପରୀକ୍ଷାର୍ଥୀଙ୍କୁ ଗ୍ରାଜୁଏଟ୍ସ୍ତରରେ ଗ୍ରେଡ୍ ୱାନ୍ ଓ ଗ୍ରେଡ୍ ଟୁ ପଦବି ଲାଗି ଆଉ ପରୀକ୍ଷା ଦେବାକୁ ପଡିବନି ।
ଏମାନଙ୍କୁ କେନ୍ଦ୍ର ସରକାରଙ୍କ ବିଭିନ୍ନ ମନ୍ତ୍ରଣାଳୟରେ ଅବସ୍ଥାପିତ କରାଯାଇପାରିବ । ସେହିଭଳି ପୂର୍ବରୁ ସିଭିଲ୍ ସର୍ଭିସ୍ ପରୀକ୍ଷା ପାଇଁ ଫର୍ମ ପୂରଣ କରିବା ପରେ କୌଣସି କାରଣରୁ ପରୀକ୍ଷା ଦେଇନଥିବା ପରୀକ୍ଷାର୍ଥୀଙ୍କୁ ଗୋଟିଏ ସୁଯୋଗ ହରାଇବାକୁ ପଡୁଥିଲା । ହେଲେ ଆଗକୁ ଏଭଳି ନକରି ପରୀକ୍ଷା ପୂର୍ବରୁ ଓହରିଯିବା ଲାଗି ଏକ ବିକଳ୍ପ ରହିବାକୁ ବିଚାର କରାଯାଉଛି ବୋଲି ୟୁପିଏସସି ସଦସ୍ୟ ଅରବିନ୍ଦ ସକ୍ସେନା କହିଛନ୍ତି । ପରୀକ୍ଷାର୍ଥୀମାନେ ଏକାଧିକ ପ୍ରତିଯୋଗିତାମୂଳକ ପରୀକ୍ଷା ଦେଉଥିବାରୁ ସେମାନଙ୍କୁ ପରୀକ୍ଷା କଷ୍ଟ ଓ ମାନସିକ ଚାପରୁ ମୁକ୍ତ କରିବାକୁ ଏହି ନୂଆ ନିୟମ ସମ୍ପର୍କରେ ଚିନ୍ତା କରାଯାଇଥିବା ୟୁପିଏସସି କର୍ତ୍ତୃପକ୍ଷ କହିଛନ୍ତି । ସେପଟେ ପରୀକ୍ଷା ପାଇଁ ଆଶାୟୀ ସଂଖ୍ୟା ବଢୁଥିବାରୁ ପରୀକ୍ଷା ଆୟୋଜନ ପ୍ରକ୍ରିୟାକୁ ସହଜ କରିବାକୁ ଏହି ନୂଆ ନିୟମ ସହାୟକ ହେବ ବୋଲି ଶ୍ରୀ ସକ୍ସେନା ସୂଚନା ଦେଇଛନ୍ତି ।
