କାନ୍ସରେ କାର୍ଟିୟରର ନକଲି ‘କୁମ୍ଭୀର’ ହାର ପିନ୍ଧିଲେ ଉର୍ବଶୀ ରୌତେଲା, ସୋସିଆଲ୍ ମିଡିଆରେ ହେଲେ ଟ୍ରୋଲ୍
ନୂଆଦିଲ୍ଲୀ ୨୩/୦୫: ସମ୍ମାନସ୍ପଦ କାନ୍ ଚଳଚ୍ଚିତ୍ର ମହୋତ୍ସବର ୭୬ତମ ସଂସ୍କରଣରେ ନିଜର ପୋଷାକ ଚୟନକୁ ନେଇ ଲୋକଙ୍କ ଦୃଷ୍ଟି ଆକର୍ଷଣ କରିଛନ୍ତି ଅଭିନେତ୍ରୀ ଉର୍ବଶୀ ରୌତେଲା। କାନ୍-୨୦୨୩ରେ ତାଙ୍କର ଫାଷ୍ଟ୍ ଲୁକ୍ ଏବେ ଟ୍ରେଣ୍ଡ୍ରେ ଅଛି । ଏ ଅବସରରେ ସେ ଏକ ଗୋଲାପି ରଙ୍ଗର ଗାଉନ୍ ପିନ୍ଧିଥିଲେ । ତା’ସହିତ ମ୍ୟାଚ୍ କରି ଗଳାରେ ପିନ୍ଧିଥିଲେ ‘କୁମ୍ଭୀର’ ହାର । ବିଳାସପୂର୍ଣ୍ଣ ଡିଜାଇନର୍ ସାମଗ୍ରୀ ପ୍ରସ୍ତୁତକାରୀ ଫ୍ରାନ୍ସର କମ୍ପାନି କାର୍ଟିୟର ଏହାକୁ ପ୍ରସ୍ତୁତ କରିଛି ବୋଲି ସେ ଦାବି କରିଥିଲେ ।
ପୂର୍ବ ରିପୋର୍ଟ ଅନୁସାରେ, ଏହି ଡିଜାଇନର୍ ହାର ହୀରା ଓ ପାନ୍ନାରେ ପ୍ରସ୍ତୁତ ହୋଇଛି, ଯାହାର ମୂଲ୍ୟ ୨୦୦ କୋଟି ଟଙ୍କା । ତେବେ ଉର୍ବଶୀଙ୍କୁ ଏଥିଲାଗି ଇଣ୍ଟର୍ନେଟ୍ ୟୁଜର୍ ସମାଲୋଚନା କରିଛନ୍ତି । ତାଙ୍କର କାନ୍ ଲୁକ୍ ସୋସିଆଲ ମିଡିଆରେ ଭାଇରାଲ ହେବା ମାତ୍ରେ ୟୁଜର୍ କହିଲେ ଯେ ସେ ପିନ୍ଧିଥିବା ହାରଟି ସତସତିକା କାର୍ଟିୟର କମ୍ପାନିର ଉତ୍ପାଦ ନୁହେଁ । ଲୋକଙ୍କ ଅଭିଯୋଗ ଯେ ସେ ନକଲି କାର୍ଟିୟର ହାର ପିନ୍ଧିଛନ୍ତି । ଅରୁନ୍ଧତି ଡି-ଶେଠ୍ ନାମ୍ନୀ ଜଣେ ଗହଣା କନ୍ସଲଟାଣ୍ଟ ନିଜ ଇନ୍ଷ୍ଟାଗ୍ରାମ୍ରେ ଉର୍ବଶୀଙ୍କର ଅନେକ ଫଟୋ ଶେୟାର କରିଛନ୍ତି ଏବଂ ଦାବି କରିଛନ୍ତି ଯେ ସେ ପିନ୍ଧିଥିବା ହାରଟି ଜିୟା ଡାଇମଣ୍ଡ୍ସ ଦ୍ୱାରା ପ୍ରସ୍ତୁତ । ଏକ ଐତିହାସିକ ହାରର ନକଲି ଉତ୍ପାଦ ପିନ୍ଧିଥିବାରୁ ଉର୍ବଶୀଙ୍କୁ ସେ ସମାଲୋଚନା ମଧ୍ୟ କରିଛନ୍ତି । ଏହା ପରେ ଅନେକ ୟୁଜର୍ ମିଛ କହିବା ପାଇଁ ଉର୍ବଶୀଙ୍କୁ ଗାଳି କରିଛନ୍ତି ।
ସୂଚନାଯୋଗ୍ୟ, ପୂର୍ବରୁ ଏକ ଗଣମାଧ୍ୟମକୁ ଉର୍ବଶୀ କହିଥିଲେ, ଏଇଟି ଏକ କିମ୍ବଦନ୍ତୀ ଗହଣା । ୨୦୦୬ ମସିହାରେ କାନ୍ ମହୋତ୍ସବରେ ମୋନିକା ବେଲ୍ଲୁଚି ଏହାକୁ ପିନ୍ଧିଥିଲେ ବୋଲି ସେ ପରେ ଜାଣିବାକୁ ପାଇଲେ । କିନ୍ତୁ ଏଇଟି ଫ୍ରେଞ୍ଚ୍ ବ୍ରାଣ୍ଡ କାର୍ଟିୟର୍ର ନୁହେଁ ବୋଲି ୟୁଜର୍ ଦାବି କରିବା ପରେ ଉର୍ବଶୀ ମୁହଁ ଖୋଲିନାହାନ୍ତି ।
