ଅମୃତସର,୧୬/୦୨: ଦ୍ୱିତୀୟ ପର୍ଯ୍ୟାୟରେ ଆମେରିକାରୁ ଆଉ ୧୧୯ ଜଣ ଅବୈଧ ପ୍ରବାସୀ ଭାରତୀୟ ସ୍ୱଦେଶ ଫେରିଛନ୍ତି । ସେମାନଙ୍କ ମଧ୍ୟରେ ୪ ଜଣ ମହିଳା ଓ ୨ ଜଣ ନାବାଳକ ଅଛନ୍ତି । ଆମେରିକାର ସାମରିକ ପରିବହନ ବିମାନ ଯୋଗେ ଶନିବାର ରାତିରେ ସେମାନେ ଅମୃତସର ବିମାନବନ୍ଦରରେ ଆସି ପହଞ୍ଚିଛନ୍ତି । ସେମାନଙ୍କ ମଧ୍ୟରେ ୬୭ ଜଣ ପଞ୍ଜାବର ହୋଇଥିଲା ବେଳେ ହରିୟାଣାର ୩୩, ଗୁଜରାଟର ୮, ଉତ୍ତରପ୍ରଦେଶର ୩, ମହାରାଷ୍ଟ୍ରର ୨, ରାଜସ୍ଥାନର ୨, ଗୋଆର ୨ ଏବଂ ହିମାଚଳ ପ୍ରଦେଶ ଏବଂ ଜମ୍ମୁ-କାଶ୍ମୀରର ଜଣେ ଲେଖାଏ ଅଛନ୍ତି ।
ରବିବାର ତୃତୀୟ ପର୍ଯ୍ୟାୟରେ ଆହୁରି ୧୫୭ ଜଣ ଅବୈଧ ପ୍ରବାସୀ ଭାରତୀୟଙ୍କୁ ଧରି ଆମେରିକାର ଏକ ବିମାନ ଆସିବ ବୋଲି ସୂଚନା ମିଳିଛି । ଗତ ୫ ତାରିଖରେ ପ୍ରଥମ ପର୍ଯ୍ୟାୟରେ ୧୦୪ ଜଣ ଭାରତୀୟଙ୍କୁ ଧରି ଆମେରିକାର ଏକ ବିମାନ ଅମୃତସରରେ ପହଞ୍ଚିଥିଲା । ଗତ ଜାନୁଆରୀ ୨୦ ତାରିଖରେ ଡୋନାଲ୍ଡ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିବା ପରେ ଅବୈଧ ପ୍ରବାସୀଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ । ଏହି କ୍ରମରେ ଦେଶର ବିଭିନ୍ନ ରାଜ୍ୟରେ ଚଢ଼ାଉ କରାଯାଇ ଅବୈଧ ପ୍ରବାସୀଙ୍କୁ ଧରାଯିବା ସହ ନିଜ ନିଜ ଦେଶକୁ ପଠାଇ ଦିଆଯାଉଛି ।
