ନୂଆଦିଲ୍ଲୀ, ୬।୬: ଆମେରିକା ଏବଂ ଇରାନ ମଧ୍ୟରେ ଚାଲିଥିବା ତିକ୍ତତା ଏବେ ଏକ ନୂଆ ମୋଡ଼ ନେଇଛି । ଦୁଇ ଦେଶ ମଧ୍ୟରେ ଶାନ୍ତି ପ୍ରତିଷ୍ଠା ଏବଂ ଚୁକ୍ତିନାମା ହେବା ନେଇ ଯେଉଁ ଆଶା ସୃଷ୍ଟି ହୋଇଥିଲା, ତାହା ଏବେ ଧୂଳିସାତ ହେବାକୁ ବସିଛି । ଆମେରିକୀୟ ସେନା ପକ୍ଷରୁ ସମୁଦ୍ରକୂଳବର୍ତ୍ତୀ ଇରାନୀ ଅଞ୍ଚଳ ଉପରେ ପୁଣି ଏକ ବଡ଼ଧରଣର ଆକ୍ରମଣ କରାଯାଇଥିବା ଦାବି ହୋଇଛି, ଯାହା ପରେ ସ୍ଥିତି ଅଧିକ ଗମ୍ଭୀର ହୋଇପଡ଼ିଛି । ଆମେରିକାର ସେଣ୍ଟ୍ରାଲ କମାଣ୍ଡ (CENTCOM) ପକ୍ଷରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ରେ ଏହି ଆକ୍ରମଣ ସମ୍ପର୍କରେ ସୂଚନା ଦିଆଯାଇଛି । ସେଣ୍ଟ୍ରାଲ କମାଣ୍ଡ ପକ୍ଷରୁ କୁହାଯାଇଛି ଯେ, ହୋର୍ମୁଜ୍ ପ୍ରଣାଳୀ ଆଡ଼କୁ ମାଡ଼ି ଆସୁଥିବା ଇରାନର ୪ଟି ‘ୱାନ୍-ୱେ ଆଟାକ୍ ଡ୍ରୋନ୍’କୁ ଆମେରିକୀୟ ସେନା ସଫଳତାର ସହ ମାରି ଖସାଇଛି । ଏହି ଡ୍ରୋନ୍ ଗୁଡ଼ିକ ଯୋଗୁଁ ସେହି ସାମୁଦ୍ରିକ ପଥରେ ଯାତାୟାତ କରୁଥିବା ଜାହାଜ ଗୁଡ଼ିକ ପ୍ରତି ସ୍ପଷ୍ଟ ବିପଦ ରହିଥିଲା । ଭବିଷ୍ୟତରେ ଏଭଳି ଆକ୍ରମଣକୁ ରୋକିବା ପାଇଁ ଆମେରିକୀୟ ସେନା ନିଜର ସୁରକ୍ଷା ଦୃଷ୍ଟିରୁ ‘ଗୋରୁକ୍’ ଏବଂ ‘କେଶମ ଦ୍ୱୀପ’ରେ ଥିବା ଇରାନର ଉପକୂଳବର୍ତ୍ତୀ ସର୍ଭେଲାନ୍ସ ରଡାର୍ ସାଇଟଗୁଡ଼ିକୁ ମିସାଇଲ୍ ମାଡ଼ କରି ଧ୍ୱଂସ କରିଦେଇଛି । ଆମେରିକା ନିଜର ଆତ୍ମରକ୍ଷା ପାଇଁ ଏବଂ ଯେକୌଣସି ଇରାନୀ ଆକ୍ରମଣର ମୁହଁତୋଡ଼ ଜବାବ ଦେବାକୁ ସମ୍ପୂର୍ଣ୍ଣ ପ୍ରସ୍ତୁତ ବୋଲି CENTCOM ପ୍ରକାଶ କରିଛି ।
ଇରାନ ପାଖରେ ଏବେ ବି ଅଛି ଯୁଦ୍ଧ କରିବା ସାମର୍ଥ୍ୟ: ଟ୍ରମ୍ପ
ଏହି ଯୁଦ୍ଧକୁ ଶେଷ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ କ୍ରମାଗତ ଭାବେ ଆନ୍ତର୍ଜାତୀୟ ଚାପ ବଢ଼ିବାରେ ଲାଗିଛି । ଏହି ସମୟରେ ‘ଏନବିସି ନ୍ୟୁଜ୍’କୁ ଦେଇଥିବା ଏକ ସାକ୍ଷାତକାରରେ ଟ୍ରମ୍ପ ଏକ ବଡ଼ ବୟାନ ଦେଇଛନ୍ତି । ସେ ସ୍ୱୀକାର କରିଛନ୍ତି ଯେ, ଆମେରିକାର ସ୍ୱତନ୍ତ୍ର ଆକ୍ରମଣ ସତ୍ତ୍ୱେ ଇରାନ ପାଖରେ ଏବେ ମଧ୍ୟ ଯୁଦ୍ଧ ଲଢ଼ିବାର କ୍ଷମତା ରହିଛି । ଟ୍ରମ୍ପ କହିଛନ୍ତି, "ଇରାନର ଅଧିକାଂଶ ଡ୍ରୋନ୍ ଫ୍ୟାକ୍ଟ୍ରି, ଲଞ୍ଚିଂ ପ୍ୟାଡ୍ ଏବଂ ମିସାଇଲ୍ ତିଆରି କରୁଥିବା କେନ୍ଦ୍ରଗୁଡ଼ିକୁ ଆମେ ସମ୍ପୂର୍ଣ୍ଣ ବନ୍ଦ କରିଦେଇଛୁ । କିନ୍ତୁ ଏହା ସତ୍ତ୍ୱେ ସେମାନଙ୍କ ପାଖରେ କିଛି ପରିମାଣରେ ମିସାଇଲ୍ ଏବଂ ଡ୍ରୋନ୍ ମହଜୁଦ ଅଛି । ଯଦି ଆମେ ପ୍ରତିଶତ ହିସାବ ଦେଖିବା, ତେବେ ସେମାନଙ୍କର ପ୍ରାୟ ୨୧% ରୁ ୨୨% ମିସାଇଲ୍ କ୍ଷମତା ଏବେ ବି ସୁରକ୍ଷିତ ରହିଛି । ଏହା ଏକ ବଡ଼ ସଂଖ୍ୟା, କିନ୍ତୁ ଆମେ ପ୍ରଥମେ ଆକ୍ରମଣ କରିବା ସମୟରେ ସେମାନଙ୍କର ଯେଉଁ ଶକ୍ତି ଥିଲା, ଏହା ତାହାଠାରୁ ବହୁତ କମ୍ ।"
ସମାଚାର ସଂସ୍ଥା ‘ରଏଟର୍ସ’ ଅନୁଯାୟୀ, ଦୁଇ ଦେଶ ମଧ୍ୟରେ ସୀମିତ ଅସ୍ତ୍ରବିରତି ଲାଗୁ ହେବା ପରେ ଏହାକୁ ସବୁଠାରୁ ବଡ଼ ସାମରିକ ଆକ୍ରମଣ ବୋଲି କୁହାଯାଉଛି । ଏହି ଆକ୍ରମଣ ଯୋଗୁଁ ପୂର୍ବରୁ ଦୋହଲି ଯାଇଥିବା ଶାନ୍ତି ପ୍ରକ୍ରିୟା ବା ଅସ୍ତ୍ରବିରତି ଏବେ ସମ୍ପୂର୍ଣ୍ଣ ଭାଙ୍ଗିଯିବା ଆଶଙ୍କା ଦେଖାଦେଇଛି । ଅନ୍ୟପଟେ ଇରାନର ସରକାରୀ ଗଣମାଧ୍ୟମ ‘IRIB’ ମଧ୍ୟ ନିଜ ଅଞ୍ଚଳରେ ଆକ୍ରମଣ ହୋଇଥିବା ନେଇ ଆଶଙ୍କା ବ୍ୟକ୍ତ କରିଛି । ରିପୋର୍ଟ ମୁତାବକ, ଦକ୍ଷିଣ ଇରାନର ‘ସିରିକ୍’ ଅଞ୍ଚଳରେ ଭୋର ପ୍ରାୟ ୨:୩୦ ମିନିଟ୍ରେ କେତେକ ଶକ୍ତିଶାଳୀ ବିସ୍ଫୋରଣର ଶବ୍ଦ ଶୁଣାଯାଇଥିଲା । ତେବେ ଏହି ବିସ୍ଫୋରଣ ପଛର ପ୍ରକୃତ କାରଣ କ’ଣ ଏବଂ ଏଥିରେ କେତେ କ୍ଷୟକ୍ଷତି ହୋଇଛି, ସେ ନେଇ ଇରାନ ସରକାରଙ୍କ ପକ୍ଷରୁ କୌଣସି ଆଧିକାରୀକ ସ୍ପଷ୍ଟୀକରଣ ଦିଆଯାଇ ନାହିଁ । ଆମେରିକାର ଏହି ମିସାଇଲ୍ ଆକ୍ରମଣ ପରେ ପଶ୍ଚିମ ଏସିଆରେ ପୁଣି ଥରେ ଯୁଦ୍ଧର କଳାବାଦଲ ଘେରିଯାଇଛି, ଯାହା ସମଗ୍ର ବିଶ୍ୱର ଚିନ୍ତା ବଢ଼ାଇ ଦେଇଛି ।
ଆହୁରି ପଢ଼ନ୍ତୁ... Sahara Desert Tragedy: ସାହାରା ମରୁଭୂମିରେ ଟ୍ରକ୍ ଅଚଳ, ଶୋଷରେ ଚାଲିଗଲା ୫୦ ଜୀବନ
