ନୂଆଦିଲ୍ଲୀ,୨୬/୦୫; ଡିଲ୍ ନହେଲେ ମହାଯୁଦ୍ଧ ହେବ । ଇରାନକୁ ଧମକ ଦେଇଥିଲେ ଆମେରିକା ରାଷ୍ଟ୍ରପତି ଡେନାଲ୍ଡ ଟ୍ରମ୍ପ । ଚେତାବନୀର କିଛି ଘଣ୍ଟା ମଧ୍ୟରେ ପୁଣି ଜଳିଛି ଯୁଦ୍ଧ ନିଆଁ । ଇରାନ ଉପରେ ବଡ଼ ହମଲା କରିଛି ଆମେରିକା । ଇରାନର ସୈନ୍ୟ ଠିକଣା ଓ ଜାହାଜ ଉପରକୁ ଆମେରିକା ଆକ୍ରମଣ କରିଛି । ଅସ୍ତ୍ରବିରତି ମଝିରେ ଦକ୍ଷିଣ ଇରାନ୍ରେ ସେଣ୍ଟ୍ରାଲ କମାଣ୍ଡର ଆକ୍ରମଣ ହୋଇଚି । ହୋର୍ମୁଜ ପ୍ରଣାଳୀରେ ବାରୁଦ ବିଛାଉଥିବା ଜାହାଜକୁ ଟାର୍ଗେଟ କରାଯାଇଛି । ଆମେରିକାର ହମ୍ଲାରେ ୨ଟି ଜାହାଜ କ୍ଷତିଗ୍ରସ୍ତ ସୂଚନା । ଆତ୍ମରକ୍ଷା ପାଇଁ ଆକ୍ରମଣ କରିଥିବା କହିଛି ଆମେରିକା । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ,ଇରାନର ସମୃଦ୍ଧ ୟୁରାନିୟମକୁ ଆମେରିକାକୁ ହସ୍ତାନ୍ତର କରାଯିବା ଉଚିତ କିମ୍ବା ନଷ୍ଟ କରାଯିବା ଉଚିତ୍ ।
ଦକ୍ଷିଣ ଇରାନରେ ଇରାନୀ ସାମରିକ ଘାଟି ଏବଂ ଜାହାଜ ଉପରେ ଆମେରିକା ସେନା ବଡ଼ ଏୟାରଷ୍ଟ୍ରାଇକ୍ କରିଛି । ଆମେରିକା କେନ୍ଦ୍ରୀୟ କମାଣ୍ଡ (CENTCOM) ଅନୁଯାୟୀ, ଏହି କାର୍ଯ୍ୟାନୁଷ୍ଠାନ ଆମେରିକୀୟ ସୈନ୍ୟ ଏବଂ ଯୁଦ୍ଧଜାହାଜକୁ ସୁରକ୍ଷା ଦେବା ପାଇଁ ନିଆଯାଇଥିଲା। ଏହି ଆକ୍ରମଣ କ୍ଷେପଣାସ୍ତ୍ର ପ୍ରକ୍ଷେପଣ ସ୍ଥାନ ଏବଂ ହର୍ମୁଜ୍ ପ୍ରଣାଳୀରେ ସମୁଦ୍ର ମାଇନ୍ ବିଛାଇବାକୁ ଚେଷ୍ଟା କରୁଥିବା ଇରାନୀ ଜାହାଜକୁ ଟାର୍ଗେଟ କରିଥିଲା । CENTCOM ମୁଖପାତ୍ର କ୍ୟାପଟେନ୍ ଟିମ୍ ହକିନ୍ସ ଏକ ବିବୃତ୍ତି ଜାରି କରି କହିଛନ୍ତି ଯେ, ଆମେରିକାର ସେନା ଦକ୍ଷିଣ ଇରାନରେ ଆତ୍ମରକ୍ଷା ପାଇଁ ଆକ୍ରମଣ କରିଛି । ଆମେରିକୀୟ ସେନା ଇରାନୀ ବାହିନୀ ଦ୍ୱାରା ଉପୁଜିଥିବା ବିପଦକୁ ନିରପେକ୍ଷ କରିଛି । ବର୍ତ୍ତମାନର ଯୁଦ୍ଧବିରତି ସମୟରେ ଆମେରିକା ସଂଯମତା ଅବଲମ୍ବନ କରୁଛି, କିନ୍ତୁ ଏହାର ସୈନ୍ୟଙ୍କ ସୁରକ୍ଷା ସୁନିଶ୍ଚିତ କରିବାକୁ ଆବଶ୍ୟକୀୟ ପଦକ୍ଷେପ ଗ୍ରହଣ କରିବ ।
ଆମେରିକୀୟ ଅଧିକାରୀମାନେ ଦାବି କରିଛନ୍ତି ଯେ, ହୋର୍ମୁଜ୍ ପ୍ରଣାଳୀରେ ଇରାନର ଦୁଇଟି ରିଭୋଲ୍ୟୁସନାରୀ ଗାର୍ଡ କର୍ପସ (IRGC) ଜାହାଜ ମାଇନ୍ ବିଛାଉଥିବାର ଦେଖାଯିବା ପରେ ଏହି ଅଭିଯାନ ଆରମ୍ଭ ହୋଇଛି । ଆମେରିକା ନୌସେନା ଏବଂ ବାୟୁସେନା ତୁରନ୍ତ ପ୍ରତିକ୍ରିୟା ଦେଇ ଦାବି କରିଥିଲେ ଯେ ଉଭୟ ଜାବହାଜ ନଷ୍ଟ ହୋଇଛି । ଏହା ବ୍ୟତୀତ, ଆମେରିକୀୟ ସେନା ବନ୍ଦର ଆବାସ ଅଞ୍ଚଳରେ ଏକ ଭୂପୃଷ୍ଠରୁ ଆକାଶ କ୍ଷେପଣାସ୍ତ୍ର (SAM) ସ୍ଥାନ ଉପରେ ମଧ୍ୟ ଆକ୍ରମଣ କରିଥିଲେ। ଆମେରିକୀୟ ଅଧିକାରୀମାନେ କହିଛନ୍ତି ଯେ ଏହି ସ୍ଥାନଟି ଆମେରିକୀୟ ଲଢ଼ୁଆ ବିମାନକୁ ଟାର୍ଗେଟ କରିବାକୁ ଚେଷ୍ଟା କରିଥିଲା। ପ୍ରତିଶୋଧମୂଳକ ଆକ୍ରମଣରେ କ୍ଷେପଣାସ୍ତ୍ର ଲଞ୍ଚର ଏବଂ ସମ୍ବନ୍ଧିତ ସାମରିକ ଭିତ୍ତିଭୂମି ନଷ୍ଟ ହୋଇଯାଇଥିଲା ।
ଏହା ବି ପଢନ୍ତୁ...‘ଯଦି ଆଲୋଚନା ବିଫଳ ହୁଏ, ଏଥର ପରିସ୍ଥିତି ପୂର୍ବ ଅପେକ୍ଷା ଅଧିକ ଗମ୍ଭୀର ହୋଇପାରେ’...ଇରାନକୁ ଟ୍ରମ୍ପଙ୍କ ଚେତାବନୀ...
କହି ରଖୁଛି କି, ଇରାନ-ଆମେରିକା ଶାନ୍ତି ବୁଝାମଣା ଲାଗି ପାକିସ୍ତାନରେ ଘନଘନ ବୈଠକ ବସିଲା । କିନ୍ତୁ କିଛି ଫଳ ହେଲାନି । ଏବେ କାତାର ଉପରେ ଭରସା ଉଜ୍ଜୀବିତ ହୋଇଛି । କାତାର ରାଜଧାନୀ ଦୋହାରେ ବରିଷ୍ଠ ଇରାନୀ ନେତା ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଏଭଳି ସ୍ଥିତିରେ ଗତକାଲି ଆମେରିକା ରାଷ୍ଟ୍ରପତି ଟ୍ରମ୍ପ ଇରାନକୁ ଧମକ ନେଇ କହିଥିଲେ ଡିଲ୍ ନହେଲେ ମହାଯୁଦ୍ଧ ହେବ । ଦୁନିଆ ପୁଣି ଥରେ ଯୁଦ୍ଧ ମଇଦାନକୁ ଫେରିଯିବ ।
