ନୂଆଦିଲ୍ଲୀ,୨୫।୫: ଆଇପିଏଲ୍ ୨୦୨୬ରେ ଏବେ କେବଳ ବୈଭବ ସୂର୍ଯ୍ୟବଂଶୀଙ୍କ ଚର୍ଚ୍ଚା। ତାଙ୍କ ବ୍ୟାଟର କମାଲ ଦେଖୁଛି ସାରା ଦୁନିଆ। ପନ୍ଦର ବର୍ଷୀୟ ବୈଭବ ରାଜସ୍ଥାନ ରୟାଲ୍ସ ପ୍ଲେଅଫରେ ପହଞ୍ଚିବା ପରେ ତାଙ୍କ ପରିବାରକୁ ଭେଟିଛନ୍ତି। ମୁମ୍ବାଇ ଇଣ୍ଡିଆନ୍ସକୁ ଶେଷ ଲିଗ୍ ମ୍ୟାଚ୍ରେ ପରାସ୍ତ କରିବା ପରେ, ରାଜସ୍ଥାନ ରୟାଲ୍ସ ପ୍ଲେଅଫରେ ପହଞ୍ଚିବା ପାଇଁ ଚତୁର୍ଥ ଟିମ୍ ପାଲଟିଛି। ୱାଙ୍ଖଡେ ଷ୍ଟାଡିୟମ୍ରେ ମ୍ୟାଚ୍ ପରେ, ବୈଭବ ତାଙ୍କ ପରିବାର ସହିତ ସମୟ ବିତାଇଥିଲେ, ତାଙ୍କ ବାପା ସଞ୍ଜୀବ ସୂର୍ଯ୍ୟବଂଶୀ ଏବଂ ତାଙ୍କ ଦୁଇ ଭାଇଙ୍କୁ ଭେଟିଥିଲେ। ତାଙ୍କ ବଡ଼ ଭାଇ ଉଜ୍ଜ୍ୱଳ ସୂର୍ଯ୍ୟବଂଶୀ କିଛି ଖାସ୍ ଫଟୋ ସେୟାର କରିଛନ୍ତି।
ବୈଭବ ସୂର୍ଯ୍ୟବଂଶୀ ତିନି ଭାଇଙ୍କ ମଧ୍ୟରେ ମଝିଆ। ଆଶୀର୍ବାଦ ସୂର୍ଯ୍ୟବଂଶୀ ତାଙ୍କର ସାନ ଭାଇ। ସେଭଳି ବୈଭବଙ୍କ ବଡ଼ ଭାଇ ହେଉଛନ୍ତି ଉଜ୍ଜ୍ୱଳ ସୂର୍ଯ୍ୟବଂଶୀ। ଉଜ୍ଜ୍ୱଳ ମଧ୍ୟ ଜଣେ କ୍ରିକେଟର, ସେଭଳି ବୈଭବଙ୍କ ସାନ ଭାଇ ମଧ୍ୟ ଭବିଷ୍ୟତରେ ଜଣେ ସଫଳ ଭାରତୀୟ କ୍ରିକେଟର ହେବାକୁ ଇଚ୍ଛା ରଖନ୍ତି। ମୁମ୍ବାଇ ମ୍ୟାଚ୍ ପରେ, ବୈଭବ ତାଙ୍କ ପରିବାରକୁ ଭେଟିଥିଲେ। ଏନେଇ ଉଜ୍ଜ୍ୱଳ ଇନଷ୍ଟାଗ୍ରାମରେ କିଛି ଫଟୋ ସେୟାର କରି ଲେଖିଛନ୍ତି, ‘ଏକାଠି ବିତାଇଥିବା କିଛି ସୁନ୍ଦର ଏବଂ ଖୁସିର ମୁହୂର୍ତ୍ତ।’ ଫଟୋ ମିଶନ: ବୈଭବ ତାଙ୍କ ଦୁଇ ଭାଇଙ୍କ ସହିତ। ଗୋଟିଏ ଫଟୋରେ, ତାଙ୍କ ବାପା ବି ରହିଛନ୍ତି।
ଆଇପିଏଲ ୨୦୨୬ରେ ବୈଭବ ତାଙ୍କ ଧମାକାଦାର ବ୍ୟାଟିଂରେ ବୋଲରଙ୍କ ଭିତରେ ଆତଙ୍କ ଖେଳାଇ ଦେଇଛନ୍ତି। ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଦଳର ନିଶ୍ଚିତ ବିଜୟ ମ୍ୟାଚ୍ରେ କିନ୍ତୁ କମାଲ କରି ପାରିନଥିଲେ ବୈଭବ। ତେବେ ପ୍ଲେଅଫ୍ ପାଇଁ ଦଳକୁ ଯୋଗ୍ୟତା ଅର୍ଜନ କରିବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସେ ବର୍ତ୍ତମାନ ଅରେଞ୍ଜ କ୍ୟାପ୍ ଦୌଡ଼ରେ ପଞ୍ଚମ ସ୍ଥାନରେ ଅଛନ୍ତି। ସେ ୧୪ଟି ମ୍ୟାଚ୍ରେ ୫୮୩ ରନ୍ କରିଛନ୍ତି, ଯାହାର ଷ୍ଟ୍ରାଇକ୍ ରେଟ୍ ୨୩୦ ରୁ ଅଧିକ। ଏହି ସିଜନ୍ରେ ସେ ଗୋଟିଏ ଶତକ ଏବଂ ତିନୋଟି ଅର୍ଦ୍ଧଶତକ ମଧ୍ୟ କରିଛନ୍ତି। ବୈଭବ କେବଳ ରନ୍ ସଂଗ୍ରହ କରି ନଥିଲେ ବରଂ ଅନେକ ରେକର୍ଡ ସ୍ଥାପନ କରି ହଇଚଇ ସୃଷ୍ଟି କରିଥିଲେ। ବର୍ତ୍ତମାନ, ତାଙ୍କର ନଜର ପ୍ଲେଅଫ୍ରେ ନିଜର ଜବରଦସ୍ତ ଫର୍ମକୁ ବଜାୟ ରଖିବା ଉପରେ ରହିବ।
