କେସିଙ୍ଗା ଏନ୍ଏସି, ୩୦/୦୬: କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ୍ ସୁରୁନାଭଟା ଗ୍ରାମବାସୀଙ୍କ ଅଭିବନ ଧାରଣା । କଶୃପଡ଼ା ପଞ୍ଚାୟତରେ ଗୋଚର ଜମି ନଥିବାରୁ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଆଗାରେ ଗାଈ-ଗୋରୁ ବାନ୍ଧି ଧାରଣ ଦେଇଥନ୍ତି ଗାଁ ଲୋକ । ସ୍ଥାନୀୟ ଅଞ୍ଚଳରେ ଅନେକ ଗୋଚର ଜମି ଜବରଦଖଲରେ ରହିଛି । ଏନେଇ ଗ୍ରାମବାସୀ ପୂର୍ବରୁ ବାରମ୍ବାର ଅଭିଯୋଗ କରିଛନ୍ତି । ହେଲେ ପ୍ରଶାସନ ଜବରଦଖଲ ହଟାଉନଥିବାରୁ ବାଧ୍ୟ ଆରଆଇ ଅଫିସ୍ ଆଗରେ ଗାଈ-ଗୋରୁଙ୍କୁ ବାନ୍ଧିଛନ୍ତି ଗାଁ ଲୋକ ।
ସୂଚନା ମୁତାବକ, ସୁକୁନାଭଟା ମୌଜାରେ ୫୨ ଏକର ଗୋଚର ଜମି ଏବଂ ୨୦ ରୁ ୪୦ ଏକର ଜଳଚର ଜମି ରହିଛି । କିନ୍ତୁ ନ୍ୟର୍ଥ ସ୍ବାର୍ଥ ବ୍ୟକ୍ତି ଏହାକୁ ଜବରଦଖଲ କରି ରଖିଛନ୍ତି । ଫଳରେ ଗ୍ରାମବାସୀ ଗୃହପାଳିତ ପଶୁ ଅର୍ଥାତ୍ ଗାଈ-ଗୋରୁଙ୍କୁ ଚରାଇ ପାରୁନାହାନ୍ତି । ବର୍ଷା ଦିନରେ ଅଧିକାଂଶ ସମୟରେ ଶତାଧିକ ଗୋରୁ-ଗାଈ ଉପାସ ରହୁଛନ୍ତି । ତେଣୁ ଗାଁ ନାଁରେ ଥିବା ଜବରଦଖଲ ଜମିକୁ ଉଚ୍ଛେଦ କରିବା ପାଇଁ ଗ୍ରାମବାସୀମାନେ ବାରମ୍ବାର ପ୍ରଶାସନ ଆଗରେ ଗୁହାରି ଲଗାଇଛନ୍ତି । ହେଲେ ଏଥିରେ କୌଣସି ସୁଫଳ ମିଳିବାରୁ ବାଧ୍ୟ ହୋଇ ୭୦ରୁ ଅଧିକ ଗାଈ-ଗୋରୁଙ୍କୁ କୃଶପଡ଼ା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଆଗରେ ବାନ୍ଧି ଧାରଣା ଦେଇଥିଲେ ।
ଗ୍ରାମବାସୀଙ୍କ କହିବାନୁଯାୟୀ, ପୂର୍ବରୁ ସୁକୁନାଭଟା ଗ୍ରାମର ଗୋଚର ଜମି ଏବଂ ଜଳଚର ଜମି ଚିହ୍ନଟ କରାଇଦେବା ପାଇଁ କଶୃପଡା ରାଜସ୍ୱ ନିରୀକ୍ଷକ ଅଧିକାରୀ, କେସିଙ୍ଗା ତହସିଲଦାର ଏବଂ ଶେଷରେ କଳାହାଣ୍ଡି ଜିଲ୍ଲାପାଳଙ୍କୁ ମଧ୍ୟ ଲିଖିତ ଅଭିଯୋଗ ଦେଇଥିଲେ । ଏହା ସତ୍ତ୍ଵେ କୌଣସି ଲାଭ ନହେବାରୁ ବାଧ୍ୟ ହୋଇ ଗ୍ରାମବାସୀମାନେ ଏଭଳି ଅଭିବନ ଉପାୟରେ ଧାରଣା ଦେଇ ଗୋଚର ଏବଂ ଜଳଚର ଜମି ଚିହ୍ନଟ ପାଇଁ ଦାବି କରିଥିଲେ । କେସିଙ୍ଗା ଅତିରିକ୍ତ ତହସିଲଦାର ହରିସିଂ ମାଝୀ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରି ଆସନ୍ତା ୩ ଦିନ ଭିତରେ ପ୍ରଶାସନ ପକ୍ଷରୁ ଗାଁର ଗୋଚର ଏବଂ ଜଳଚର ଜମି ଚିହ୍ନଟ କରାଯିବ ନେଇ ପ୍ରତିଶ୍ରୁତି ଦେବା ପରେ ଲୋକେ ଧରଣାରୁ ହଟିଥିଲେ ।
