ନୂଆଦିଲ୍ଲୀ ୧୬/୦୩: ବ୍ରଡକାଷ୍ଟରଙ୍କ ଉପରେ ବର୍ଷିଲେ ଟିମ୍ ଇଣ୍ଡିଆର ବ୍ୟାଟ୍ସମ୍ୟାନ୍ ବିରାଟ୍ କୋହଲି। ତାଙ୍କର ଲଞ୍ଚ ଅର୍ଡର ଭାଇରାଲ୍ ହେବାକୁ ନେଇ ଅସନ୍ତୋଷ ପ୍ରକାଶ କଲେ ବିରାଟ।
ଭାରତ ପାଇଁ ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ଟାଇଟଲ ଜିତିବା ପରେ ବିରାଟ କୋହଲି ବର୍ତ୍ତମାନ ଆଇପିଏଲ୍ ୨୦୨୫ ରେ କମାଲ ଦେଖାଇବାକୁ ପ୍ରସ୍ତୁତ ଅଛନ୍ତି। ବିରାଟ ଶନିବାର ଦିନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଇନୋଭେସନ୍ ଲ୍ୟାବ୍ ଇଣ୍ଡିଆନ୍ ସ୍ପୋର୍ଟସ ସମ୍ମିଳନୀରେ କ୍ରିକେଟ୍ ସହ ଜଡିତ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ଏହି ସମୟରେ ବିରାଟ ପ୍ରକାଶ କରିଛନ୍ତି, ବ୍ରଡକାଷ୍ଟରଙ୍କ ଦ୍ୱାରା ଦିଲ୍ଲୀରେ ତାଙ୍କର ପ୍ରିୟ ଛୋଲେ-ଭଟୁରେ ଉପରେ ଆଲୋଚନାରେ ସେ ଖୁସି ନୁହଁନ୍ତି। ସେ କହିଛନ୍ତି ଯେ ବ୍ରଡକାଷ୍ଟରର କାମ ହେଉଛି କ୍ରିକେଟ୍ ଖେଳ ବିଷୟରେ କହିବା, ଗତ ରାତିରେ ସେ କଣ ଖାଇଥିଲେ ତାହା ନୁହେଁ।
ଗତ ମାସ ଆରମ୍ଭରେ, ରଣଜୀ ଟ୍ରଫି ମ୍ୟାଚ୍ ସମୟରେ ବିରାଟ କୋହଲିଙ୍କ ଚିଲି ପନିର ଲଞ୍ଚ୍ ଅର୍ଡର ଅର୍ଡର ଭାଇରାଲ ହୋଇଥିଲା। ଶନିବାର ବିରାଟ କୋହଲି ବ୍ରଡକାଷ୍ଟର୍ସଙ୍କୁ ଏହା ସ୍ପଷ୍ଟ କରିଛନ୍ତି ଯେ ସେମାନଙ୍କ କଭରେଜରେ ଅଧିକ ସୁକ୍ଷ୍ମତା ହେବା ଆବଶ୍ୟକ ଏବଂ ସେମାନେ ମ୍ୟାଚ୍ ସମୟରେ ଦିଲ୍ଲୀରେ ଖାଇବା ପାଇଁ ତାଙ୍କର ପ୍ରିୟ ସ୍ଥାନ ବିଷୟରେ ଆଲୋଚନା କରିବା ଉଚିତ୍ ନୁହେଁ। ୨୦୨୩ ମସିହାରେ ଅଷ୍ଟ୍ରେଲିଆ ବିପକ୍ଷରେ ବର୍ଡର-ଗାଭାସ୍କର ଟ୍ରଫି ସିରିଜ୍ ସମୟରେ ଏକ ମ୍ୟାଚ୍ରେ ବିରାଟ କୋହଲିଙ୍କ ଲଞ୍ଚ୍ ଅର୍ଡର ଚର୍ଚ୍ଚାର ବିଷୟ ପାଲଟିଥିଲା। ବ୍ରଡକାଷ୍ଟର୍ସ ଟେଷ୍ଟ ମ୍ୟାଚ୍ ସମୟରେ ବିରାଟ କୋହଲିଙ୍କ ଖାଦ୍ୟ ଉପରେ ନିରନ୍ତର ଧ୍ୟାନ ଦେଇଥିଲେ।
