ଭୁବନେଶ୍ୱର,୮ା୨(ବ୍ୟୁରୋ): ଆସନ୍ତା ସାଧାରଣ ନିର୍ବାଚନରେ ଅଧିକରୁ ଅଧିକ ସଂଖ୍ୟକ ମତଦାତାଙ୍କ ଅଂଶଗ୍ରହଣ ପ୍ରସଙ୍ଗରେ ଶୁକ୍ରବାର ‘ସୁଇପ୍‌ କମିଟି’ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାର ଅଧ୍ୟକ୍ଷତା କରିଥିଲେ । ଭାରତୀୟ ନିର୍ବାଚନ କମିଶନଙ୍କ ନିର୍ଦ୍ଦେଶାନୁସାରେ ସମସ୍ତ ସରକାରୀ, ବେସରକାରୀ ଓ କର୍ପୋରେଟ୍‌ ସଂସ୍ଥା ଗୁଡ଼ିକରେ ‘ଭୋଟର ସଚେତନତା ଫୋରମ୍‌’ ଗଠନ କରାଯିବ । ଉକ୍ତ ସଂସ୍ଥାର କର୍ମଚାରୀଙ୍କୁ ଇଭିଏମ୍‌ ସହ ଭିଭିପ୍ୟାଟ୍‌ରେ ମତଦାନ ସମ୍ପର୍କରେ ସଚେତନ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି । ଭୋଟର ତାଲିକାଭୁକ୍ତ ହୋଇ ନଥିବା ବ୍ୟକ୍ତିଙ୍କୁ ଭୋଟଦାନର ମହତ୍ତ୍ୱ ଓ ଦେଶ ଗଠନରେ ନାଗରିକର କର୍ତ୍ତବ୍ୟ ସମ୍ପର୍କରେ ଅବଗତ କରିବା ହେଉଛି ଭୋଟର ସଚେତନତା ଫୋରମ୍‌ର ମୁଖ୍ୟ ଉଦ୍ଦେଶ୍ୟ ।
‘ସୁଇପ୍‌’ କାର୍ଯ୍ୟକ୍ରମ ଜରିଆରେ ଭୋଟରମାନଙ୍କ ମଧ୍ୟରେ ବ୍ୟାପକ ସଚେତନତା ସୃଷ୍ଟି ନିମନ୍ତେ ଟିଭି ଓ ସିନେମା ହଲ୍‌ରେ ଭିଡିଓ ସ୍ପଟ୍‌, ରେଡିଓ ଜିଙ୍ଗିଲ୍ସ, ରେଳଷ୍ଟେସନରେ ଇଭିଏମ୍‌ ଓ ଭିଭିପ୍ୟାଟ୍‌ର ଭିଡିଓ ପ୍ରଦର୍ଶନ କରାଯିବ । ତା’ଛଡା ସୂଚନା ଓ ଲୋକସମ୍ପର୍କ ବିଭାଗ ଦ୍ୱାରା ରାଜ୍ୟର ସମସ୍ତ ଜନଗହଳିପୂର୍ଣ୍ଣ ସ୍ଥାନରେ ହୋର୍ଡିଂ ଲଗାଇବା, ଟେଲିଫୋନ୍‌ ବିଲ୍‌, ବିଜୁଳି ବିଲ୍‌, କ୍ଷୀର ପାଉଚରେ ଭୋଟ୍‌ ସଚେତତନା ବାର୍ତ୍ତା ‘ଭୋଟ୍‌ ଦେବା-ଦେଶ ଗଢ଼ିବା’ ଲେଖା ଛପାଇବା, ରାଜ୍ୟରେ ଚଳାଚଳ କରୁଥିବା ସମସ୍ତ ବସ୍‌ରେ ଭୋଟର ସଚେତନତା ବାର୍ତ୍ତା ସମ୍ପର୍କିତ ବ୍ୟାନର ଲଗାଇବା ଉପରେ ଏହି ବୈଠକରେ ମୁଖ୍ୟ ନିର୍ବାଚନ ଅଧିକାରୀ ଗୁରୁତ୍ୱାରୋପ କରିଥିଲେ । ବୈଠକରେ ଅତିରିକ୍ତ ମୁଖ୍ୟ ନିର୍ବାଚନ ଅଧିକାରୀ ଅଭୟ ନାୟକ, ଆଇ-ଆଣ୍ଡ-ପିଆର ନିର୍ଦ୍ଦେଶକ ଲକ୍ଷ୍ମୀଧର ମହାନ୍ତି, ନିରଞ୍ଜନ ସେଠୀଙ୍କ ସମେତ ବିଭିନ୍ନ ବିଭାଗ, ନାଲ୍‌କୋ, ସେଲ୍‌, ଓଏମ୍‌ସି, ଆଇଓସିଏଲ୍‌ ଏବଂ ଷ୍ଟେଟ୍‌ ବ୍ୟାଙ୍କ୍‌ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।