ନୂଆଦିଲ୍ଲୀ, ୧୮।୧: ଉଡ଼ନ୍ତା ବିମାନରେ ବୋମା ଥିବା ସୂଚନା ମିଳିବା ପରେ ଆତଙ୍କ ଖେଳିଯାଇଛି । ଦିଲ୍ଲୀରୁ ବାଗଡୋଗ୍ରା ଯାଉଥିବା ଏକ ବିମାନକୁ ଲକ୍ଷ୍ନୌ ବିମାନବନ୍ଦରରେ ଜରୁରୀକାଳୀନ ଅବତରଣ କରିବାକୁ ପଡ଼ିଛି । ଏହି ବିମାନଟି ଇଣ୍ଡିଗୋର । ବିମାନର ଥିବା ଏକ ଟିସୁ ପେପରରେ ଲେଖାଯାଇଥିଲା ଯେ, ‘ବିମାନରେ ବୋମା ଅଛି’ । ଜଣେ ଯାତ୍ରୀ ଏହି ଟିସୁ ପେପର ଦେଖିବା ପରେ ତୁରନ୍ତ କ୍ରୁ ସଦସ୍ୟଙ୍କୁ ଏ ବିଷୟରେ ଜଣାଇଥିଲେ । ପରେ ପାଇଲଟ୍ ଜରୁରୀକାଳୀନ ଅବତରଣ ପାଇଁ ଅନୁମତି ମାଗିଥିଲେ । ଲକ୍ଷ୍ନୌରେ ଜରୁରୀକାଳୀନ ଅବତରଣ ପରେ, ବିମାନର କୋଣ ଅନୁକୋଣ ଯାଞ୍ଚ କରାଯାଉଛି । ବିମାନରେ ୨୩୦ ଜଣ ଯାତ୍ରୀ, ଦୁଇ ପାଇଲଟ ଏବଂ ୫ ଜଣ କ୍ରୁ ସଦସ୍ୟ ଥିଲେ ।
ରବିବାର ସକାଳ ପ୍ରାୟ ୮ଟା ୪୬ ମିନିଟ୍ ସମୟରେ ଏୟାର ଟ୍ରାଫିକ କଣ୍ଟ୍ରୋଲ ଇଣ୍ଡିଗୋ ଏୟାରଲାଇନ୍ସ ବିମାନ 6E-6650ରେ ବୋମା ଥିବା ସୂଚନା ପାଇଥିଲା । ଏହି ସୂଚନା ମିଳିବା ପରେ, ଲକ୍ଷ୍ନୌ ବିମାନବନ୍ଦରରେ ବିମାନର ଜରୁରୀକାଳୀନ ଅବତରଣ ପାଇଁ ପ୍ରସ୍ତୁତି କରାଯାଇଥିଲା । ଜରୁରୀକାଳୀନ ଅବତରଣ ପରେ, ବିମାନକୁ ଏକ ଆଇସୋଲେସନ୍ ୱେରେ ରଖାଯାଇଥିଲା । ଲକ୍ଷ୍ନୌ ବିମାନବନ୍ଦରରେ ବିମାନଟିକୁ ଅଟକାଇଛି ଏବଂ ଏହାର ସମ୍ପୂର୍ଣ୍ଣ ଯାଞ୍ଚ କରାଯାଉଛି । ଏ ପର୍ଯ୍ୟନ୍ତ କୌଣସି ସନ୍ଦେହଜନକ ଜିନିଷ ମିଳି ନଥିବାରୁ ଯାତ୍ରୀ, କ୍ରୁ ସଦସ୍ୟ ଏବଂ ଅଧିକାରୀମାନଙ୍କୁ ଆଶ୍ୱସ୍ତି ମିଳିଛି । ଏ ସମ୍ପର୍କରେ କୃଷ୍ଣାନଗର ଏସିପି ରଜନୀଶ ବର୍ମା କହିଛନ୍ତି, ଅଗ୍ନିଶମ ବାହିନୀ ଏବଂ ବିଡିଏସ୍ ଦଳ ବିମାନ ଯାଞ୍ଚ କରୁଛନ୍ତି । ଏ ପର୍ଯ୍ୟନ୍ତ କୌଣସି ସନ୍ଦେହଜନକ ବସ୍ତୁ ମିଳିନାହିଁ । ଟିସୁ ପେପରରେ ବୋମା ଚେତାବନୀ କିଏ ଲେଖିଥିଲା, ତାକୁ ନେଇ ସନ୍ଧାନ ଚାଲିଛି । ପୁଲିସ ଘଟଣାର ବିଭିନ୍ନ ଦିଗ ଉପରେ ତଦନ୍ତ କରୁଛି ।
ଜାନୁଆରୀ ୨୪ରୁ ଲକ୍ଷ୍ନୌରୁ ଆଜମେରକୁ ସିଧାସଳଖ ବିମାନ ଚଳାଚଳ ବନ୍ଦ:
ଏହି ସମୟରେ ଉଡ଼ାନ ଯୋଜନାର ଆଞ୍ଚଳିକ ସଂଯୋଗ ଯୋଜନା ଅଧିନରେ ଆରମ୍ଭ ହୋଇଥିବା ଆଉ ଏକ ବିମାନ ସେବା ବନ୍ଦ କରାଯାଇଛି । ଲକ୍ଷ୍ନୌରୁ ଆଜମେରର କିଶନଗଡ଼କୁ ଏକ ଛୋଟ ବିମାନ କମ୍ପାନୀ ଦ୍ୱାରା ପରିଚାଳିତ ସିଧାସଳଖ ବିମାନ ସେବା ଜାନୁଆରୀ ୨୪ ପରେ ବନ୍ଦ ହୋଇଯିବ । ଲକ୍ଷ୍ନୌ ଏବଂ କିଶନଗଡ଼ ମଧ୍ୟରେ ସିଧାସଳଖ ବିମାନ ସେବା ଫେବୃଆରୀ ୧୬, ୨୦୨୪ରେ ଆରମ୍ଭ ହୋଇଥିଲା । ଷ୍ଟାର ଏୟାର ହେଉଛି ଏହି ରୁଟ୍ରେ ସିଧାସଳଖ ସଂଯୋଗ ପ୍ରଦାନ କରୁଥିବା ଏକମାତ୍ର ବିମାନ କମ୍ପାନୀ । ବିମାନ S5-223 ସକାଳ ୧୦ଟା ୪୫ରେ ଲକ୍ଷ୍ନୌରୁ ଉଡ଼ାଣ କରେ ଏବଂ ଅପରାହ୍ନ ୧୨ଟା ୫ରେ କିଶନଗଡ଼ରେ ପହଞ୍ଚିଥାଏ । ବିମାନ S5-222 କିଶନଗଡ଼ରୁ ଅପରାହ୍ନ ୩ଟା ୩୫ରେ ଉଡ଼ାଣ କରେ ଏବଂ ଅପରାହ୍ନ ୪ଟା ୫୫ରେ ଲକ୍ଷ୍ନୌରେ ପହଞ୍ଚିଥାଏ । ଦୁଇ ସହର ମଧ୍ୟରେ ଯାତ୍ରା ସମୟ ମାତ୍ର ୧ ଘଣ୍ଟା ୨୦ ମିନିଟ୍ । ଏହି ବିମାନ ସପ୍ତାହରେ ୪ ଦିନ ଚାଲୁ ରହେ ।
