ଭୁବନେଶ୍ୱର,୧୭/୧୨: ୫ ଦିନ ହେଲାଣି ଅସ୍ତବ୍ୟସ୍ତ କରୁଥିଲା ଶୀତ । ପୂରା ରାଜ୍ୟ ହାଡ଼ଭଙ୍ଗା ଶୀତରେ ଥରୁଥିଲା । ଅନେକ ସହର ୧୦ ଡିଗ୍ରୀ ସେଲସିୟସ୍ ତଳକୁ ଖସି ଆସିଥିଲା । ହେଲେ ମଙ୍ଗଳବାର ରାତିରୁ ଏଭଳି ସ୍ଥିତିରୁ ସାମାନ୍ୟ ଆଶ୍ୱସ୍ତି ମିଳିବ । ଶୀତ କମିବ । ରାତି ତାପମାତ୍ରା ୩ରୁ ୫ ଡିଗ୍ରୀ ବଢ଼ିଯିବ । ପାଣିପାଗ ବିଶେଷଜ୍ଞ ଏଭଳି ଆକଳନ କରିଛନ୍ତି ।
ସୋମବାର ରାଜ୍ୟର ବିଭିନ୍ନ ସ୍ଥାନରେ ଶୀତ ଲହରୀ ବହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଥିଲା । ସୋମବାର ସକାଳୁ ଅସମ୍ଭାଳ ଶୀତ ଅନୁଭୂତ ହୋଇଥିଲା । ଜି ଉଦୟଗିରିରେ ପାରଦ ୫ ଡିଗ୍ରୀ ତଳକୁ ଖସିଥିଲା । ଏଠାରେ ପାରଦ ୪.୮ ଡିଗ୍ରୀ ରେକର୍ଡ ହୋଇଛି । ୧୨ ସହରରେ ରାତି ତାପମାତ୍ରା ୧୦ ଡିଗ୍ରୀ ତଳକୁ ଖସିଛି । ରାଉରକେଲାରେ ସର୍ବନିମ୍ନ ୫.୭ ଡିଗ୍ରୀ ଓ ଫୁଲବାଣୀରେ ୭ଡିଗ୍ରୀ ରେକର୍ଡ ହୋଇଛି ।
ମଙ୍ଗଳବାର ସକାଳ ଯାଏ ଶୀତ ଜାରି ରହିବ । କିନ୍ତୁ ରାତିରେ ତାପମାତ୍ରା କ୍ରମଶଃ ବଢ଼ିଯିବ । ରାଜ୍ୟର ପ୍ରାୟ ସମସ୍ତ ଅଞ୍ଚଳରେ ରାତି ତାପମାତ୍ରା ବଢ଼ିବ । ୧୭ରୁ ୨୦ ତାରିଖ ଯାଏ ରାତି ତାପମାତ୍ରା ୪ରୁ ୬ ଡିଗ୍ରୀ ବଢ଼ିଯିବ ବୋଲି ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ଡା. ସୁରେନ୍ଦ୍ରନାଥ ପଶୁପାଳକ ପୂର୍ବାନୁମାନ କରିଛନ୍ତି । ଭୁବନେଶ୍ୱର ସମେତ ଉପକୂଳ ଓଡ଼ିଶାରେ ମଙ୍ଗଳବାର ରାତି ତାପମାତ୍ରା ୨ରୁ ୩ ଡିଗ୍ରୀ ବଢ଼ିଯିବ । ୧୮ ତାରିଖ ରାତିରେ ଏ ସବୁ ସ୍ଥାନରେ ଆଉ ୩ ଡିଗ୍ରୀ ବଢ଼ିବ । ୨୦ ତାରିଖ ଯାଏ ତାପମାତ୍ରା ପ୍ରାୟ ୬ ଡିଗ୍ରୀ ବଢ଼ିବ ।
ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାରେ ମଙ୍ଗଳବାର ରାତିରୁ ତାପମାତ୍ରା ୨ ଡିଗ୍ରୀ ବଢ଼ିବ । ୧୯ ତାରିଖ ରାତିରେ ଆଉ ୨ ଡିଗ୍ରୀ ବଢ଼ିବ । ୨୦ ତାରିଖ ରାତିରେ ଆଉ ୧ ଡିଗ୍ରୀ ବଢ଼ିପାରେ । ସେହିଭଳି ଉତ୍ତର ଆଭ୍ୟନ୍ତର ଓ ପଶ୍ଚିମ ଓଡ଼ିଶାରେ ୧୭ ତାରିଖରେ ତାପମାତ୍ରା ୨ ଡିଗ୍ରୀ ବଢ଼ିପାରେ । ୨୦ ତାରିଖରେ ଆଉ ୧ ଡିଗ୍ରୀ ବଢ଼ିବା ସମ୍ଭାବନା ଅଛି ବୋଲି ପ୍ରଫେସର ପଶୁପାଳକ ଆକଳନ କରିଛନ୍ତି ।
୨୧ତାରିଖରୁ ଶୀତ ପୁଣି ଲେଉଟିବ ବୋଲି ସେ କହିଛନ୍ତି । ରାଜ୍ୟର ପ୍ରାୟ ସବୁ ସ୍ଥାନରେ ରାତି ତାପମାତ୍ରା ୩ ଡିଗ୍ରୀ କମିବ । ଫଳରେ ପୁଣି ଶୀତ ଅନୁଭୂତ ହେବ । ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇଛି । ଏଥିପାଇଁ ୧୯ ଓ ୨୦ ତାରିଖରେ ପାଗ ମେଘୁଆ ରହିବ । କିଛି ସ୍ଥାନରେ ହାଲୁକା ଓ ବୁନ୍ଦା ବର୍ଷା ହୋଇପାରେ ବୋଲି ସେ ପୂର୍ବାନୁମାନ କରିଛନ୍ତି ।
ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ନିର୍ଦ୍ଦେଶିକା ଡା. ମନୋରମା ମହାନ୍ତି କହିଛନ୍ତି, ମଙ୍ଗଳବାର ରାତିରୁ ତାପମାତ୍ରା କ୍ରମଶଃ ବଢ଼ିବ । ଆସନ୍ତା ୪ ଦିନରେ ରାତି ତାପମାତ୍ରା ୩ରୁ ୫ ଡିଗ୍ରୀ ବଢ଼ିବ । ମଙ୍ଗଳବାର ଗଞ୍ଜାମ ଓ ଗଜପତିରେ ହାଲୁକା ବର୍ଷା ହୋଇପାରେ । ୧୮ ଓ ୧୯ ତାରିଖରେ ଦକ୍ଷିଣ ଓଡ଼ିଶାର ବିଭିନ୍ନ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ୧୮ ତାରିଖରେ ଗଜପତି, ଗଞ୍ଜାମ ଓ ପୁରୀରେ ହାଲୁକା ବର୍ଷା ସମ୍ଭାବନା ଅଛି । ୧୯ ତାରିଖରେ ଜଗତସିଂହପୁର, ପୁରୀ, ଖୋର୍ଦ୍ଧା, ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି ଓ ନବରଙ୍ଗପୁରରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ମଙ୍ଗଳବାର କୋରାପୁଟ ଓ କନ୍ଧମାଳରେ ଘନ କୁହୁଡ଼ି ଦୃଶ୍ୟମାନ ହୋଇପାରେ ।
ଆଜି ଓଡ଼ିଶାର କାଶ୍ମୀର କୁହାଯାଉଥିବା କନ୍ଧମାଳର ଦାରିଙ୍ଗିବାଡ଼ିରେ ତୁଷାରପାତ ହୋଇଛି । ଏଠାରେ ପାରଦ ୭.୫ ଡିଗ୍ରୀ ଥିଲା । ଦାରିଙ୍ଗବାଡ଼ିର ପ୍ଲିହେରି, ଡୁଲୁରି ସାହି ସମେତ ଦୁର୍ଗମ ଗାଁ ଗୁଡ଼ିକରେ ତୁଷାରପାତ ହୋଇଛି । କେନ୍ଦୁଝରର କାଞ୍ଜିପାଣିରେ ମଧ୍ୟ ତୁଷାରପାତ ହେଉଥିବା ଦେଖିବାକୁ ମିଳିଛି । ଜି ଉଦୟଗିରି ସବୁଠୁ ଥଣ୍ଡା ଅଞ୍ଚଳ ପାଲଟିବା ସହ ଅସମ୍ଭାଳ ଜାଡ଼ ଦେହ ଥରାଇ ଦେଇଥିଲା ।
ରବିବାର ଝାରସୁଗୁଡ଼ାରେ ୭.୧, ଭବାନୀପାଟଣାରେ ୭.୮, ସୁନ୍ଦରଗଡ଼ରେ ୯, ଜଗତସିଂହପୁରରେ ୯.୫, ଢେଙ୍କାନାଳ ଓ କୋରାପୁଟରେ ୯.୬, ଅନୁଗୁଳରେ ୮, କେନ୍ଦୁଝରରେ ୮.୮, ନବରଙ୍ଗପୁର ଓ ବାରିପଦାରେ ୧୦, ବଲାଙ୍ଗୀରରେ ୧୦.୩, ସୋନପୁରରେ ୧୦.୫ ଓ ଭୁବନେଶ୍ୱରରେ ରାତି ତାପମାତ୍ରା ୧୦.୯ ଡିଗ୍ରୀ ସେଲସିୟସ୍ ରହିଥିଲା । ପ୍ରବଳ ଶୀତରେ ସମସ୍ତେ ଥରି ଉଠିଥିଲେ ।
ମେଘୁଆ ପାଗ ସହିତ ଅଧିକ ଆର୍ଦ୍ରତା, କୁହୁଡ଼ି ଓ ହାଲୁକା ବର୍ଷା ଯୋଗୁ ପନିପରିବାରେ ପାଉଁଶିଆ ରୋଗର ଆଶଙ୍କା ଅଛି । ଏଥିପାଇଁ ସତର୍କତାମୂଳକ ପଦକ୍ଷେପ ନେବାକୁ ପ୍ରଫେସର ଡା. ପଶୁପାଳକ ପରାମର୍ଶ ଦେଇଛନ୍ତି । ଡ଼ିବିଟି ସହ ସଂଯୋଗ କରାଇବେ ବୋଲି ଉପମୁଖ୍ୟମନ୍ତ୍ରୀ କହିଛନ୍ତି ।
