କରୋନା ସଂକ୍ରମଣ ନେଇ ଚିନ୍ତାବ୍ୟକ୍ତ କଲା ଡବ୍ଲ୍ୟୁଏଚ୍ଓ, ବୁଷ୍ଟର ଡୋଜ୍ ନିଅନ୍ତୁ ସମ୍ବେଦନଶୀଳ ବର୍ଗ
Image Courtesy: India Today
ନୂଆଦିଲ୍ଲୀ,୦୨/୦୪: କରୋନା ଭୂତାଣୁ ସଂକ୍ରମଣ ଦେଶରେ ପୁଣି ଦ୍ରୁତଗତିରେ ମାଡ଼ୁଛି । ଭାରତରେ ଗତ ୨୪ ଘଣ୍ଟାରେ ୨,୯୯୪ ଜଣ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ୨ ଆକ୍ରାନ୍ତଙ୍କ ମୃତ୍ୟୁ ଘଟିଛି । ଫଳରେ ସକ୍ରିୟ ମାମଲା ୧୬,୩୫୪ରେ ପହଞ୍ଚିଥିବା ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଶନିବାର କୁହାଯାଇଛି । ମହାରାଷ୍ଟ୍ରରେ ଦିନକରେ ୭ଶହ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ପଜିଟିଭିଟି ହାର୍ ୨.୬୧ ରହିଛି ।
କରୋନା ସଂକ୍ରମଣ ବୃଦ୍ଧିକୁ ନେଇ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ସତର୍କ ରହିବାକୁ କହିଛି । ଡବ୍ଲ୍ୟୁଏଚ୍ଓର ଷ୍ଟ୍ରାଟେଜିକ୍ ଆଡଭାଇଜରୀ ଗ୍ରୁପ୍(ଏସ୍ଏଜିଇ) କୋଭିଡ୍ର ବୁଷ୍ଟର ଡୋଜ୍ ନେବାକୁ ଗୁରୁତ୍ୱ ଦେଇଛି । ବୟସ୍କ ବିଶେଷକରି ସମ୍ବେଦନଶୀଳ ବର୍ଗର ଲୋକେ ଶେଷ ଡୋଜ୍ ନେବାର ୬ରୁ ୧୨ ମାସ ଭିତରେ କରୋନାର ବୁଷ୍ଟର ଡୋଜ୍ ନେବାକୁ ଡବ୍ଲ୍ୟୁଏଚ୍ଓ ପରାମର୍ଶ ଦେଇଛି । ସେହିପରି କୌଣସି ବ୍ୟାଧିରେ ପୀଡ଼ିତ ଥିବା ବ୍ୟକ୍ତି, ସ୍ୱାସ୍ଥ୍ୟକର୍ମୀ ତଥା ଆଗଧାଡ଼ିର ଲୋକେ ବୁଷ୍ଟର ଡୋଜ୍ ନେବା ଉଚିତ ବୋଲି ଡବ୍ଲ୍ୟୁଏଚ୍ଓ ଗାଇଡ୍ଲାଇନରେ କୁହାଯାଇଛି ।
