ନୂଆଦିଲ୍ଲୀ : କର୍ଣ୍ଣାଟକରେ ନେତୃତ୍ୱ ପରିବର୍ତ୍ତନକୁ ନେଇ ଏବେବି ଛକାପଞ୍ଚା ଜାରି ରହିଛି । ଶାସକ କଂଗ୍ରେସ ଦଳ ଭିତରେ କ୍ଷମତା ସଂଘର୍ଷ ତୀବ୍ର ହୋଇଛି। ଦଳର ଶୀର୍ଷ ସ୍ତରରେ ଏହି ଦ୍ୱନ୍ଦ୍ୱର ସମାଧାନ ପାଇଁ ପ୍ରୟାସ ମଧ୍ୟ ତୀବ୍ର ହୋଇଛି। କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ କହିଛନ୍ତି ଯେ, ସେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ସହ ଏହି ପ୍ରସଙ୍ଗରେ ଆଲୋଚନା କରିବେ। ଏହି ସମୟରେ ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ ଦାବି କରୁଥିବା ଉପମୁଖ୍ୟମନ୍ତ୍ରୀ କହିଛନ୍ତି ଯେ, ଦଳ ଭିତରେ କୌଣସି ଦ୍ୱନ୍ଦ୍ୱ ନାହିଁ ଏବଂ ସମଗ୍ର ଦଳ ଏକଜୁଟ ରହିଛି ।
କର୍ଣ୍ଣାଟକ ପ୍ରସଙ୍ଗରେ ଖାର୍ଗେ କ'ଣ କହିଲେ ?
କର୍ଣ୍ଣାଟକରେ ନେତୃତ୍ୱ ପରିବର୍ତ୍ତନ ନେଇ ଚାଲିଥିବା କଳ୍ପନାଜଳ୍ପନା ମଧ୍ୟରେ, କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ବୁଧବାର କହିଛନ୍ତି ଯେ, ସେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ସହିତ ଆଲୋଚନା କରିବେ । ଆଉ ଏହା ପରେ ଏହି ସମସ୍ୟାର ସମାଧାନ କରିବେ। କର୍ଣ୍ଣାଟକ ପ୍ରସଙ୍ଗ ବିଷୟରେ ପଚରାଯିବାରୁ, ସେ କହିଛନ୍ତି, "ମୁଁ ସୋନିଆ ଜୀ ଏବଂ ରାହୁଲ ଜୀଙ୍କ ସହିତ ଆଲୋଚନା କରିବି, ଏବଂ ତା'ପରେ ଏହି ସମସ୍ୟାର ସମାଧାନ ହେବ।" ନଭେମ୍ବର ୨୦ ତାରିଖରେ କଂଗ୍ରେସ ସରକାର ଏହାର ପାଞ୍ଚ ବର୍ଷର କାର୍ଯ୍ୟକାଳର ଅଢ଼େଇ ବର୍ଷ ପୂରଣ କରିବା ପରେ, ଏହି ଆଲୋଚନା ତୀବ୍ର ହୋଇଛି । କାରଣ ୨୦୨୩ ରେ ମୁଖ୍ୟମନ୍ତ୍ରୀ ସିଦ୍ଧରମୈୟା ଏବଂ ଶିବକୁମାରଙ୍କ ମଧ୍ୟରେ ଏକ କଥିତ "ଶକ୍ତି-ବଣ୍ଟନ" ଚୁକ୍ତିନାମା ହୋଇଥିବା ଦାବି କରାଯାଉଛି।
ଆମର ଗୋଷ୍ଠୀରେ ୧୪୦ ବିଧାୟକ ଅଛନ୍ତି : ଶିବକୁମାର
ଏହି ବିବାଦ ଭିତରେ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ଏକ ପ୍ରମୁଖ ବିବୃତ୍ତି ଏବେ ସାମ୍ନାକୁ ଆସିଛି । ସେ କହିଛନ୍ତି ଯେ ଏଥିରେ କୌଣସି ଦ୍ୱନ୍ଦ୍ୱ ନାହିଁ। କେହି କିଛି ଦାବି କରିବା ଉଚିତ୍ ନୁହେଁ। କୌଣସି ଗୋଷ୍ଠୀ ନାହିଁ। କେବଳ ଗୋଟିଏ ଗୋଷ୍ଠୀ ଅଛି, ତାହା ହେଉଛି କଂଗ୍ରେସ ଗୋଷ୍ଠୀ। ଆମ ଗୋଷ୍ଠୀରେ ୧୪୦ ଜଣ ବିଧାୟକ ଅଛନ୍ତି। ଏହା କହି ସେ ରାଜ୍ୟ କଂଗ୍ରେସ ଭିତରେ ଚାଲିଥିବା ବିବାଦକୁ ଘୋଡାଇବାକୁ ଚେଷ୍ଟା କରିଥିଲେ। ତେବେ ପୂର୍ବରୁ ମୁଖ୍ୟମନ୍ତ୍ରୀ ସିଦ୍ଧରମୈୟା ସ୍ପଷ୍ଟ କରିଥିଲେ ଯେ, ସେ ପୂର୍ଣ୍ଣ ପାଞ୍ଚ ବର୍ଷ ପାଇଁ ମୁଖ୍ୟମନ୍ତ୍ରୀ ରହିବେ ଏବଂ ଆଗାମୀ ରାଜ୍ୟ ବଜେଟ୍ ମଧ୍ୟ ଉପସ୍ଥାପନ କରିବେ।
ଦିଲ୍ଲୀରୁ ଫେରିଥିବା ବିଧାୟକ ମାନେ କ’ଣ କହିଥିଲେ?
ଏହି ସମୟରେ ମଙ୍ଗଳବାର ନୂଆଦିଲ୍ଲୀରୁ ବେଙ୍ଗାଲୁରୁ ଫେରିଥିବା କିଛି କଂଗ୍ରେସ ବିଧାୟକ କହିଛନ୍ତି ଯେ, ଶୀର୍ଷ ନେତୃତ୍ୱ ଏହି ବିଷୟରେ ନିଷ୍ପତ୍ତି ନେବେ । କିଛି ବିଧାୟକ କହିଛନ୍ତି ଯେ ସେମାନେ ହାଇକମାଣ୍ଡଙ୍କୁ ମୁଖ୍ୟମନ୍ତ୍ରୀ ପ୍ରସଙ୍ଗରେ ଯଥାଶୀଘ୍ର ଦ୍ୱନ୍ଦ୍ୱ ଦୂର କରିବାକୁ ଅନୁରୋଧ କରିଛନ୍ତି । ଆଉ କିଛି ଜଣ ବିଧାୟକ ପ୍ରସ୍ତାବିତ କ୍ୟାବିନେଟ୍ ପୁନର୍ଗଠନ ସମୟରେ ଯୁବ କିମ୍ବା ନୂତନ ମୁହଁ ପାଇଁ ସୁଯୋଗ ଦେବାକୁ ଦାବି କରିଛନ୍ତି।
