ହସ୍ପିଟାଲରେ ପତ୍ନୀଙ୍କୁ ମଶା କାମୁଡ଼ିବା ଅଭିଯୋଗ କଲେ ସ୍ୱାମୀ, ଅଧା ରାତିରେ ଅଗରବତି ଧରି ପହଞ୍ଚିଲା ପୁଲିସ
ନୂଆଦିଲ୍ଲୀ ୨୩/୦୩: ଉତ୍ତରପ୍ରଦେଶର ସମ୍ଭଲ ଜିଲ୍ଲାରେ ଏକ ମଜାଦାର ମାମଲା ସାମ୍ନାକୁ ଆସିଛି । ସ୍ଥାନୀୟ ଚନ୍ଦୌସି ସ୍ଥିତ ଏକ ପ୍ରାଇଭେଟ୍ ହସ୍ପିଟାଲରେ ଭର୍ତ୍ତି ହୋଇଥିବା ଜଣେ ମହିଳା ମଶା କାମୁଡ଼ାକୁ ନେଇ ବିରକ୍ତ ହୋଇପଡ଼ିଲେ । ତାଙ୍କ ସ୍ୱାମୀ ଅଧା ରାତିରେ ୟୁପି ପୁଲିସକୁ ଟ୍ୱିଟ୍ କରି ସାହାଯ୍ୟ ମାଗିଲେ । ପୁଲିସ ମଧ୍ୟ ସଙ୍ଗେସଙ୍ଗେ କାର୍ଯ୍ୟାନୁଷ୍ଠାନ ଗ୍ରହଣ କଲା । ଜଣେ ପୁଲିସକର୍ମୀ ମଶା ନାଶକ ଅଗରବତୀ ଧରି ମହିଳାଙ୍କ ପାଖରେ ପହଞ୍ଚିଗଲେ ।
ବ୍ୟକ୍ତି ଜଣକ ୟୁପି ପୁଲିସକୁ ଟ୍ୱିଟ୍ କରି ଉଲ୍ଲେଖ କରିଛନ୍ତି, ଚନ୍ଦୌସି ସ୍ଥିତ ହରି ପ୍ରକାଶ ନର୍ସିଂହୋମ୍ରେ ମୋ ପତ୍ନୀ ଏକ କୁନି ପରୀ(କନ୍ୟା ସନ୍ତାନ)କୁ ଜନ୍ମ ଦେଇଛନ୍ତି । କିନ୍ତୁ ସେ ଏଠାରେ ଖୁବ୍ ସମସ୍ୟାର ସମ୍ମୁଖୀନ ହେଉଛନ୍ତି । କାରଣ ମଶା ତାଙ୍କୁ ଖୁବ୍ ଯନ୍ତ୍ରଣା ଦେଉଛନ୍ତି । ଦୟାକରି ମୋତେ ସଙ୍ଗେସଙ୍ଗେ ଏକ ମୋର୍ଟିନ୍ ପ୍ରଦାନ କରନ୍ତୁ ।’
ତାଙ୍କର ଟ୍ୱିଟ୍ ପରେ ୟୁପି ପୁଲିସ ସଙ୍ଗେସଙ୍ଗେ ଆକ୍ସନ୍ ମୋଡ୍କୁ ଆସିଲା । ଜଣେ ପୁଲିସକର୍ମୀ ମଶା ଅଗରବତି ଧରି ହସ୍ପିଟାଲରେ ପହଞ୍ଚିଲେ । ତତ୍କାଳ ଆକ୍ସନ୍ ପାଇଁ ବ୍ୟକ୍ତି ଜଣକ ସମ୍ଭଲ ପୁଲିସକୁ ଧନ୍ୟବାଦ ଜଣାଇଛନ୍ତି ।
