ନୂଆଦିଲ୍ଲୀ ୧୫/୧୨: ଭାରତରେ ଲୋକେ ଏସ୍କାଲେଟର୍ରେ ଓଲଟା ଦିଗରେ ଚାଲିବା ସାଧାରଣ କଥା । ଅନେକ ଥର ଜାଣିଶୁଣି ଲୋକେ ଏପରି କରନ୍ତି । କିନ୍ତୁ ଏଥିପାଇଁ କାହା ବିରୋଧରେ ମକଦ୍ଦମା ବିଷୟରେ ଶୁଣିଛନ୍ତି? ଏଭଳି ଏକ ମାମଲା ଲଣ୍ଡନରେ ସାମ୍ନାକୁ ଆସିଛି । ଏଠାରେ ଏସ୍କାଲେଟର୍ରେ ଓଲଟା ଦିଗରେ ଚାଲିବାକୁ ଚେଷ୍ଟା କରିବା ଜଣେ ମହିଳାଙ୍କ ପାଇଁ ମହଙ୍ଗା ପଡ଼ିଛି । ଏ ନେଇ ତାଙ୍କ ବିରୋଧରେ ମକଦ୍ଦମା ଚାଲିଛି । ତାଙ୍କ ଉପରେ ୧୦୦୦ ପାଉଣ୍ଡ୍ ପର୍ଯ୍ୟନ୍ତ ଜରିମାନା ଲାଗିବାର ଆଶଙ୍କା ମଧ୍ୟ ହୋଇଛି । ଏହି ଘଟଣା ସାର୍ବଜନୀନ ପରିବହନ ନିୟମର କଡ଼ାକଡ଼ି ପାଳନକୁ ଦର୍ଶାଇଛି ।
ରିପୋର୍ଟ ଅନୁସାରେ, ସାଉଥ୍-ଇଷ୍ଟ୍ ଲଣ୍ଡନ ବାସିନ୍ଦା ୩୨ ବର୍ଷୀୟା ମିଶେଲା କୋପଲାଣ୍ଡଙ୍କ ବିରୋଧରେ ଅଭିଯୋଗ ଯେ ସେ ନର୍ଥ ଗ୍ରୀନୱିଚ୍ ଅଣ୍ଡର୍ଗ୍ରାଉଣ୍ଡ ଷ୍ଟେସନ୍ରେ ଏସ୍କାଲେଟର୍ର ଉପଯୋଗ ଓଲଟା ଦିଗରେ କରିଛନ୍ତି । ସେ ଏସ୍କାଲେଟର୍ରେ ଚାଲିବାକୁ ଚେଷ୍ଟା କରୁଥିଲେ, କିନ୍ତୁ କୌଣସି ନିର୍ଦ୍ଧାରିତ ଦିଗରେ ଚାଲିବାର ତାଙ୍କୁ ଦେଖାଗଲା ନାହିଁ । ତେବେ ସେ ପ୍ରକୃତରେ କେଉଁ ଦିଗରେ ଚାଲୁଥିଲେ, ତାହା ସ୍ପଷ୍ଟ ହୋଇନାହିଁ । ଏହା ସତ୍ତେ୍ୱ ତାଙ୍କ ବିରୋଧରେ ମାମଲା କୋର୍ଟରେ ପହଞ୍ଚିଛି ।
ମିଶେଲା ଗତ ଶୁକ୍ରବାର ବ୍ରମ୍ଲି ମାଜିଷ୍ଟ୍ରେଟ୍ କୋର୍ଟରେ ହାଜର ହୋଇଥିଲେ । ବିଚାରପତିଙ୍କ ସମ୍ମୁଖରେ ସେ ନିଜକୁ ଦୋଷୀ ମାନିବାକୁ ସ୍ପଷ୍ଟ ମନା କରିଦେଲେ । କୋର୍ଟ ବାହାରେ ତାଙ୍କୁ ଆଶାବାଡ଼ି ସାହାରାରେ ଚାଲୁଥିବା ମଧ୍ୟ ଦେଖିବାକୁ ମିଳିଲା । ମାମଲାର ଶୁଣାଣି ଆସନ୍ତା ଏପ୍ରିଲରେ ହେବ । ବ୍ରିଟେନର ରେଳବାଇ ନିୟମର ଉପକରଣ ଓ ସୁରକ୍ଷା ସେକ୍ସନ୍ରେ ସ୍ପଷ୍ଟ ଉଲ୍ଲେଖ ହୋଇଛି, ବ୍ୟକ୍ତି କେବଳ ଯାତ୍ରାର ନିର୍ଦ୍ଧାରିତ ଦିଗରେ ହିଁ ଏସ୍କାଲେଟର୍ ବ୍ୟବହାର କରିପାରିବେ । ଏହି ନିୟମ ଉଲ୍ଲଂଘନ କଲେ ୧୦୦୦ ପାଉଣ୍ଡ୍ ପର୍ଯ୍ୟନ୍ତ ଜରିମାନା ହୋଇପାରେ ।
