ଭାଲୁ ଆକ୍ରମଣରେ ମହିଳା ଗୁରୁତର, ଡାକ୍ତରଖାନାରେ ଭର୍ତ୍ତି

ଦେବଗଡ଼, ୧୦/୯ :  ଦେବଗଡ଼ ଜିଲ୍ଲା ରିଆମାଳ ବ୍ଲକ ନୂଆପଡ଼ା ଗ୍ରାମରେ ଜଣେ ମହିଳା ଭାଲୁ ଆକ୍ରମଣରେ ଗୁରୁତର ହୋଇଛନ୍ତି । ଗୁରୁତର ଜଣଙ୍କ ହେଲେ ସ୍ବର୍ଗତ ଖଗେଶ୍ବର ସେଠୀଙ୍କ ସ୍ତ୍ରୀ ମେନକା (୬୫) । ଘଟଣା ଅନୁସାରେ,  ଶନିବାର ଅପରାହ୍ନ ୪ଟା ସମୟରେ ଗ୍ରାମର ଲାଭ ପଡ଼ିଆ ବାଟ ନାଳ ପାଖକୁ  ମେନକା ଶୌଚ ହେବା ପାଇଁ ଯାଇଥିଲେ । ଏହି ସମୟରେ ହଠାତ୍ ଏକ ଭାଲୁ ଆସି ତାଙ୍କୁ ଆକ୍ରମଣ କରିଥିଲା । ପରେ ମେନକାଙ୍କ ଚିତ୍କାର ଶୁଣି ଗ୍ରାମବାସୀ ସେହି ସ୍ଥାନକୁ ଦୌଡି ଆସିବା ସହ ଭାଲୁ କବଳରୁ ମେନକାକୁ ଉଦ୍ଧାର କରିଥିଲେ ।

ପରେ  ତାଙ୍କୁ ପରିବାର ଲୋକେ ଗୁରୁତର ଅବସ୍ଥାରେ ଛେଣ୍ଡିପଦା ଡାକ୍ତରଖାନାରେ ଭର୍ତ୍ତି କରିଥିଲେ । ବର୍ତ୍ତମାନ ମେନକାଙ୍କ ସ୍ବାସ୍ଥ୍ୟ ଅବସ୍ଥା ଭଲ ଥିବା ସୂଚନା ମିଳିଛି ।