ଜଳେଶ୍ୱର, ୧୮/୦୬(ଆପ୍ର): ଝିଅ ଜନ୍ମ ହେଲା ବୋଲି ୧୦ ଦିନର ପ୍ରସବ ମହିଳାକୁ ନିର୍ଯାତନା ଦେଇ ଶାଶୁ ଘର ଲୋକ ମାରିଦେଲେ। କିଛି ଏମିତି ଅଭିଯୋଗ ଆଣିଛନ୍ତି ଝିଅର ବାପ ଘର ଲୋକେ। ପୋଲିସର ଏହି ମାମଲାର ତଦନ୍ତ ଜାରୀ କରିବା ସହ ମହିଳାଙ୍କ ସ୍ୱାମୀ, କକା ଓ ଶଶୁରଙ୍କୁ ଥାନାରେ ଅଟକ ରଖିଛି ।
ଏଭଳି ଘଟଣା ଘଟିଛି ବାଲେଶ୍ୱର ଜିଲ୍ଲା ଜଳେଶ୍ୱର ଥାନାପଥରପୁରା ଗ୍ରାମରେ । ଜଳେଶ୍ୱର ପୌପରିଷଦର ଭାଏସ ଚେୟାରମେନ ପୁଷ୍ପପ୍ରିୟା କାମିଳାଙ୍କର ତୃତୀୟ ପୁତ୍ର ରିତେଶ କାମିଳାଙ୍କୁ ଚକବିଷ୍ଣୁ ଗ୍ରାମର ଜଳନ୍ଧର ପ୍ରଧାନଙ୍କର ଝିଅ ନମିତାଙ୍କ ସହିତ ଦୀର୍ଘ ୩ ବର୍ଷ ତଳେ ବୈଦିକ ରୀତିରେ ବିବାହ ହୋଇଥିଲା। ସେବେଠାରୁ ହସଖୁସିର ସଂସାର ଚାଲି ଆସୁଥିଲା ବେଳେ ତାଙ୍କର ୧୦ଦିନର ଝିଅଟିଏ ରହିଛି। ତେବେ ଆଜି ସକାଳ ୧୦ଟା ସମୟରେ ନମିତାକୁ ଗୁରୁତର ଅବସ୍ଥାରେ ଶାଶୁ ଘର ଲୋକ ଜଳେଶ୍ୱର ଜିକେ ଭଟ୍ଟର ହସ୍ପିଟାଲକୁ ନେଇ ଆସିଥିଲେ । ମାତ୍ର ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ ।
ନମିତା ବେକରେ ରଶିଦେଇ ଆତ୍ମହତ୍ୟା କରିଥିବା କଥା ଶାଶୁ ଘର ଲୋକ କହୁଥିଲା ବେଳେ ନମିତା ଝିଅ ଜନ୍ମ କରିଥିବାରୁ ତାକୁ ଶାଶୁ ଘର ଲୋକ ନିର୍ଯାତନା ଦେଇ ମାରିଥିବା ନେଇ ବାପ ଘର ଲୋକ ଅଭିଯୋଗ ଆଣିଛନ୍ତି। ଖବର ପାଇ ଜଳେଶ୍ୱର ପୋଲିସ ଘଟଣା ସ୍ଥଳରେ ପହଂଚି ଶବ ଜବତ କରିବା ସହ ସ୍ୱାମୀ ଜଳନ୍ଧର ଓ କକା ଶଶୁର ବସନ୍ତ କାମିଳାଙ୍କୁ ଅଟକ ରଖି ତଦନ୍ତ ଜାରି ରଖିଛି। ଅନ୍ୟପଟେ ଝିଅର ପରିବାର ପକ୍ଷରୁ ସାଇଣ୍ଟିଫିକ ଟିମକୁ ଖବର ଦିଆଯାଇଛି। ତେବେ ତଦନ୍ତ ପରେ ଏହା ହତ୍ୟାକି ଆତ୍ମହତ୍ୟା ଏନେଇ ଗୁମର ଫିଟିବ ?
