ଆଳି, ୩/୬ : କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ୍ ମେଣ୍ଢାପୁର ପଞ୍ଚାୟତର ରସୁଲପୁର କାଜିସାହି ଓ ତଳସାହି ଗ୍ରାମର ଦୁଇ ହଜାରରୁ ଉର୍ଦ୍ଧ୍ଵ ଲୋକ ପିଇବା ପାଣିରୁ ବଞ୍ଚିତ। ଏନେଇ ଗତ ୧୭ ତାରିଖରେ ଗ୍ରାମର ଶତାଧିକ ମହିଳା ବ୍ଲକରେ ବିଡିଓଙ୍କୁ ଭେଟି ପାଣି ସମସ୍ୟା ସମାଧାନ କରିବାକୁ ଦାବି କରିଥିଲେ। ବିଡିଓ ପଞ୍ଚାୟତର ସରପଞ୍ଚ, ଜଳଯୋଗାଣ ବିଭାଗ ଓ ବିଭାଗୀୟ ଅଧିକାରୀଙ୍କ ସହ ଆଲୋଚନା କରି ଟ୍ୟାଙ୍କର ଯୋଗେ ପାଣି ଦେବାର ବ୍ୟବସ୍ଥା କରିଥିଲେ। ମାତ୍ର ସପ୍ତାହେ ପରେ ଟ୍ୟାଙ୍କର ପାଣି ଯୋଗାଣ ବନ୍ଦ ହୋଇଗଲା। ଯାହାଫଳରେ ପୁନର୍ବାର ଲୋକମାନେ ପାଣି ପାଇଁ ହଇରାଣ ହେଲେ। ଆଜି ଶତାଧିକ ମହିଳା ପୁନର୍ବାର ବ୍ଳକ କାର୍ଯ୍ୟାଳୟକୁ ଆସି ଅଫିସ୍ ତାଲା ପକାଇ ପ୍ରତିବାଦ କରିଛନ୍ତି।
ବିଡିଓ ସେମାନଙ୍କ ନିକଟକୁ ନଆସିବାରୁ ସେମାନେ ବ୍ଲକ ସଭାଗୃହରେ ପଶି ହୋ ହାଲ୍ଲା କରିଥିଲେ। ଆଗେ ପାଣି ଦିଅ ତାପରେ ମିଟିଂ କରିବ କହି ହଙ୍ଗାମା କରିଥିଲେ। ବିଡିଓ ମିଟିଂ ଛାଡ଼ି ସେମାନଙ୍କ କଥା ବୁଝିବାକୁ ଆସିଥିବା ବେଳେ ବ୍ଲକ କର୍ମଚାରୀମାନେ ଛତ୍ରଭଙ୍ଗ ଦେଇଥିଲେ। ଦୀର୍ଘ ଦୁଇ ଘଣ୍ଟା କାଳ ବିଡିଓ ଓ ଗ୍ରାମବାସୀଙ୍କ ମଧ୍ୟରେ ଆଲୋଚନା ପରେ ବିଡିଓ ଜଳଯୋଗାଣ ବିଭାଗ ଯନ୍ତ୍ରୀଙ୍କ ସହ ଗ୍ରାମରେ ପହଞ୍ଚିଥିବା ଜଣାପଡିଛି।
