ଭୁବନେଶ୍ୱର, ୨୪/୦୭: ରାଜ୍ୟରେ ମହିଳା ସୁରକ୍ଷିତ ନୁହନ୍ତି । ଦୁଷ୍କର୍ମ, ଗଣଦୁଷ୍କର୍ମ ବଢ଼ିବାରେ ଲାଗିଛି । ନାରୀଙ୍କ ପ୍ରତି ଶୋଷଣ ବଢ଼ୁଛି, ହତ୍ୟା ହେଉଛି । ଅଧିକାଂଶ ସମୟରେ ପୀଡିତାଙ୍କ ଅଭିଯୋଗ କେହି ଶୁଣୁ ନାହାନ୍ତି । ଶେଷରେ ଉପାୟ ନପାଇ ଆତ୍ମହତ୍ୟା କରୁଛନ୍ତି । ହେଲେ କଂଗ୍ରେସ ଏବେ ମହିଳାଙ୍କ ଦୁଃଖ ବୁଝିବ । ସେଥିପାଇଁ ମହିଳା ଅଭିଯୋଗ ପ୍ରତିକାର ପ୍ରକୋଷ୍ଠ ଗଠନ ହେବା 'ନାରୀ ନ୍ୟାୟ ବାହିନୀ’ ଆପ୍ ଲଞ୍ଚ ହୋଇଛି । ଏଥିରେ ୧୦ଜଣ ଆଇନଜୀବୀଙ୍କୁ ନିଯୁକ୍ତ କରାଯାଇଛି । ପ୍ରତି ଜିଲ୍ଲାରେ ମଧ୍ୟ ଜଣିଏ ଲେଖାଏଁ ଓକିଲ ରହିବେ । ପୀଡ଼ିତାଙ୍କୁ ସାହାଯ୍ୟ କରିବ ମହିଳା କଂଗ୍ରେସ ଓ କଂଗ୍ରେସ । ରାଜ୍ୟରେ ଆଇନ ଶୃଙ୍ଖଳା ବ୍ୟବସ୍ଥା ଫେଲ୍ ମାରିଥିବାରୁ ରାଜ୍ୟ ଅପରାଧ ବଢ଼ି ଚାଲିଛି । ଏବେ ସମୟ ଆସିଛି, ସାଧାରଣ ନାଗରିକ ଜାଗ୍ରତ ହେଲେ ନାରୀ ନିର୍ଯାତନା ଉପରେ ରୋକ୍ ଲାଗିବ । ପୁଲିସ ଅପରାଧ ରୋକିବା ବଦଳରେ ସେମାନଙ୍କୁ ସୁରକ୍ଷା ହେଉଛି ବୋଲି ପିସିସି ସଭାପତି ଭକ୍ତଚରଣ ଦାସ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, କଂଗ୍ରେସ ଭବନରେ 'ମହିଳା ଅଭିଯୋଗ ପ୍ରତିକାର ପ୍ରକୋଷ୍ଠ' ଆରମ୍ଭ ହୋଇଛି । ନାରୀଙ୍କୁ ନ୍ୟାୟ ମିଳିବା ନେଇ ଆମେ ପାଞ୍ଚ ମାସ ହେଲା ସଂଗ୍ରାମ କରୁଛୁ। ବାଲେଶ୍ୱର ପୀଡ଼ିତାଙ୍କ ଘଟଣା ବେଳେ କଂଗ୍ରେସ ମହିଳା 'ଅଭିଯୋଗ ପ୍ରତିକାର ପ୍ରକୋଷ୍ଠ' ଗଠନ କରିବୁ ବୋଲି ଘୋଷଣା କରିଥିଲା । ସେଠି ମହିଳାମାନେ ତାଙ୍କ ନାଁ ଗୋପନ ରଖି ଅଭିଯୋଗ କରିପାରିବେ । ଏବେ ରାଜ୍ୟରେ ମହିଳାମାନେ ସଚେତନ ହୋଇଛନ୍ତି । କୌଣସି ଘଟଣା ଘଟିବା ପରେ ତୁରନ୍ତ ଜଣାଉଛନ୍ତି। ବନ୍ଦ ଶାନ୍ତିପୂର୍ଣ ହୋଇଥିଲା ବୋଲି ନ୍ୟାୟାଳୟ ମଧ୍ୟ କହିଛନ୍ତି । ନାରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ରାଜ୍ୟ କଂଗ୍ରେସ ଆପ୍ ଲଞ୍ଚ କରିଛି । ଏହି ‘ନାରୀ ନ୍ୟାୟ ବାହିନୀ’ ଆପ୍ ଦ୍ୱାରା ସମ୍ପୂର୍ଣ ସମାଧାନ ନ ହୋଇ ପାରିଲେ ବି ସଂଗ୍ରାମ ଜାରି ରହିବ ।
ମହିଳା କଂଗ୍ରେସ ସଭାପତି ମିନାକ୍ଷୀ ବାହିନୀପତି କହିଛନ୍ତି, ନ୍ୟାୟ ପାଇଁ ମହିଳାମାନେ ଲଢୁଛନ୍ତି। ଯେଉଁମାନେ ନ୍ୟାୟ ପାଉନାହାନ୍ତି, ସେମାନେ ଆପ୍ ମାଧ୍ୟମରେ ନ୍ୟାୟ ପାଇବେ। ଜିଲ୍ଲା ଏବଂ ନିର୍ବାଚନମଣ୍ଡଳୀ ଲେଖିବା ପରେ ଆମେ ଆଗେଇବୁ ବୋଲି ମିନାକ୍ଷୀ ବାହିନୀପତି କହିଛନ୍ତି । ଏହା ଏବେ ପୋର୍ଟାଲ ଭାବେ ଅଛି। ପନ୍ଦର ଦିନ ପରେ ଆପ୍ ହୋଇପାରିବ। ସେହିପରି ଇମେଲ ବି ରହିବ ବୋଲି ସୂଚନା ଦେଇଛନ୍ତି। ତେବେ ନାରୀ ନ୍ୟାୟ ବାହିନୀ ଓ ମହିଳା ଅଭିଯୋଗ ପ୍ରକୋଷ୍ଠ ଅଲଗା ଅଲଗା ରହିଛି । କଂଗ୍ରେସ ଭବନରେ ଏହା ଖୋଲିବ। ଚବିଶ ଘଣ୍ଟା ଅଭିଯୋଗ ହୋଇ ପାରିବ ।
